បារាំង-អាល្លឺម៉ង់ ស្នើកម្ចី៥០០កោដិអ៊ឺរ៉ូ ដើម្បីឲ្យសេដ្ឋកិច្ចអ៊ឺរ៉ុបងើបឡើងវិញ
មហាយក្សពីរនៅក្នុងសហភាពអ៊ឺរ៉ុប បារាំង-អាល្លឺម៉ង់ បានស្នើគម្រោងថវិកា ៥០០កោដិ អ៊ឺរ៉ូ ដើម្បីអនុញ្ញាត ឲ្យសេដ្ឋកិច្ចអ៊ឺរ៉ុប ងើបចេញពីវិបត្តិ នៃជំងឺ«Covid-19»។
ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) និងអធិការបតីអាល្លឺម៉ង់ អ្នកស្រី អង់ជឺឡា មែរគែល (Angela Merkel) បានលើកឡើងដូច្នេះ នៅក្នុងសន្និសីទសារព័ត៌មានរួមមួយ ក្នុងរសៀលថ្ងៃចន្ទនេះ។
មេដឹកនាំទាំងពីរ បានប្រកាសឡើង ដូចគ្នាថា៖
«ដើម្បីគាំទ្រ ដល់ការងើបឡើងវិញ ប្រកបដោយចីរភាព ដែលធ្វើការស្តារ និងពង្រឹង កំណើនសេដ្ឋកិច្ចអ៊ឺរ៉ុប ប្រទេសអាល្លឺម៉ង់ និងបារាំង គាំទ្រការបង្កើតមូលនិធិសង្គ្រោះមួយ ដែលមានមហិច្ចតា ជាលក្ខណៈបណ្ដោះអាសន្ន និងមានទិសដៅច្បាស់លាស់ នៅក្នុងក្របខណ្ឌ នៃគម្រោងថវិកាលើកក្រោយ របស់សហភាពអ៊ឺរ៉ុប ដែលមានទំហំទឹកប្រាក់ ៥០០ ពាន់លានអឺរ៉ូ។»
គំនិតផ្ដួចផ្ដើម បារាំង-អាល្លឺម៉ង់ ដ៏ល្អ…
នៅក្នុងនីតិវិធី នៃគម្រោងថវិកានេះ ក្រុងប៉ារីស និងប៊ែរឡាំង ស្នើឲ្យគណៈកម្មការអ៊ឺរ៉ុប ផ្ដល់ហិរញ្ញប្បទាន សម្រាប់គម្រោងគាំទ្រនេះ ដោយធ្វើការខ្ចីប្រាក់ (ជាឧទាហរណ៍ ខ្ចីពីធនាគារ ឬពីប្រទេសដែលមានប្រាក់) ក្នុងនាមសហភាពអ៊ឺរ៉ុប។ ហើយប្រាក់ទាំងនោះ នឹងត្រូវបញ្ជូន ទៅជួយបណ្ដាប្រទេស នៅក្នុងសហភាព ទៅកាន់វិស័យ និងទៅកាន់តំបន់ណា ដែលរងផលប៉ះពាល់ ខ្លាំងជាងគេ ពីវិបត្តិជំងឺរាតត្បាត។
ភ្លាមៗ នៅក្រោយការប្រកាសនេះ គណៈកម្មការអ៊ឺរ៉ុប (ឬហៅម្យ៉ាងទៀត ជារដ្ឋាភិបាលសហភាពអ៊ឺរ៉ុប) បានសំដែង ការពេញចិត្តពេញថ្លើម របស់ខ្លួន ដោយហៅគម្រោងនេះ ថាជាគំនិតផ្ដួចផ្ដើមដ៏ល្អ។
សេចក្ដីប្រកាស របស់មេដឹកនាំទាំងពីរ បានឲ្យដឹងទៀតថា ទឹកប្រាក់ដែលខ្ចីបានខាងលើ នឹងត្រូវសងវិញ ជាបន្តបន្ទាប់ ដោយប្រើរយៈពេលច្រើនឆ្នាំ។ ហើយគម្រោងនេះ មិនមែនជាការដាក់កំហិត ឬជាបំណុល ដែលធ្វើឡើងរវាងបណ្ដារដ្ឋ នៅក្នុងសហភាពអ៊ឺរ៉ុបនោះទេ តែវាជាគម្រោង ដ៏ស្មោះសរ ដើម្បីជួយឲ្យសេដ្ឋកិច្ច ងើបឡើងវិញ៕
