ក្រុម រៀល ម៉ាឌ្រីត (Real Madrid – អេស្ប៉ាញ) បានហាលអាវទល់នឹងក្រុម មេនឆេស្ទើរស៊ីធី (Manchester City – អង់គ្លេស) ខណៈក្រុម ជូវេនទូស (Juventus Turin – អ៊ីតាលី) បានហាលអាវទល់នឹងក្រុម លីយ៉ុង (Olymic Lyonnais – បារាំង) ក្នុងការប្រកួតចំនួនពីរ នៃជុំទីពីរ វគ្គ១/៨ ក្របខណ្ឌ«Champions League»។
ជ័យជំនះ នៃការប្រកួតយប់ថ្ងៃសុក្រនេះ នឹងអនុញ្ញាតឲ្យក្រុម មេនស៊ីធី និងក្រុម លីយ៉ុង ឡើងទៅជួបគ្នា ក្នុងវគ្គ១/៤ ក្នុងរដ្ឋធានីលីស្បន នៃប្រទេសព័រទុយហ្គាល់ ក្នុងយប់ថ្ងៃសៅរ៍ ចុងសប្ដាហ៍ខាងមុខ។
តែការប្រកួតទាំងពីរ ក្នុងយប់នេះ បានទុកស្លាកស្នម ឲ្យក្រុមបាល់ទាត់យក្ស ពីរទៀត ដែលធ្លាប់មានប្រវត្តិលើកពាន «Champions League» ជាច្រើនដង មានកីឡាករខ្លាំងៗ និងសុទ្ធតែឈ្នះជាជើងឯក ប្រចាំប្រទេសអេស្ប៉ាញ (ក្រុមរៀល) និងអ៊ីតាលី (ក្រុមជូវេនទូស) ក្នុងរដូវកាលនេះ តែបែរជាទទួលបរាជ័យយ៉ាងជូរចត់ ទល់នឹងក្រុម មេនស៊ីធី (លេខ២ ក្របខណ្ឌ Premier League) និងក្រុមលីយ៉ុង (លេខ៧ ក្របខណ្ឌ Ligue 1)។
