អាមេរិក៖ ចូ បៃដេន ឈ្នះ ដូណាល់ ត្រាំ ក្លាយជា​«ប្រធានាធិបតីទី៤៦»

បេក្ខជនមកពីគណបក្សប្រជាធិបតេយ្យ លោក ចូ បៃដេន (Joe Biden) បានក្លាយ​ជា​«ប្រធានាធិបតីទី៤៦» នៃសហរដ្ឋអាមេរិក បន្ទាប់ពីលោកទទួលបានការគាំទ្រ លើសពី២៧០​សម្លេង នៃអង្គបោះឆ្នោត (អ្នកតំណាងម្ចាស់ឆ្នោត) ឈ្នះនាំមុខដាច់ លើលោក ដូណាល់ ត្រាំ (Donald Trump) ប្រធានាធិបតីចប់អាណត្តិ និងជាបេក្ខជន​មកពីគណបក្ស​សាធារណរដ្ឋ។

តាមការអះអាង របស់ប្រព័ន្ធផ្សព្វផ្សាយ និងសារព័ត៌មានធំៗ ដូចជា «AP» «Fox News» ឬ «CNN» ជាដើម បានឲ្យដឹងថា ក្នុងថ្ងៃសៅរ៍ ទី៧ ខែវិច្ឆិកានេះ រដ្ឋ«Pennsylvania»ដែលមានអង្គបោះឆ្នោត រហូតដល់២០ បានបញ្ចប់ការរាប់សន្លឹកឆ្នោតទាំងស្រុង និងបានផ្ដល់ជ័យជំនះ ឲ្យទៅលោក បៃដេន។

នៅមុនអត្ថបទនេះ​ចេញផ្សាយបន្តិច រដ្ឋ«Navara» ដែលមានអង្គបោះឆ្នោត ចំនួន៦​សម្លេង  ក៏បានបញ្ចប់​ការរាប់សន្លឹកឆ្នោត និងបានផ្ដល់ជ័យជំនះ សម្រាប់បេក្ខជនពី​គណបក្ស​ប្រជាធិបតេយ្យ​​រូបនេះដែរ។

ជារួម មកដល់នាទីនេះ លោក ចូ បៃដេន បានឈ្នះអង្គបោះឆ្នោត ចំនួន២៩០ ខណៈ​លោក ដូណាល់ ត្រាំ ទទួលបានត្រឹមតែ ២១៤ប៉ុណ្ណោះ។ ប៉ុន្តែចំនួនអង្គបោះឆ្នោត អាច​នឹង​កើនឡើង ឬនៅនឹងដដែល នៅពេលរដ្ឋចំនួនបីទៀត (Georgia, North Carolina និង Alaska) បញ្ចប់​ការរាប់​សន្លឹក​ឆ្នោត។

មានអាយុ៧៧ឆ្នាំ លោក ចូ បៃដេន ធ្លាប់ជាអនុប្រធានាធិបតី រវាងពីឆ្នាំ២០០៩ មកទល់​ឆ្នាំ២០១៧ ក្នុងអាណត្តិទាំងពីរ របស់លោកប្រធានាធិបតី បារ៉ាក់ អូបាម៉ា (Barack Obama)។ បើតាមនីតិវិធីផ្លូវការ លោក បៃដេន នឹងចូលស្បថឡើងកាន់តំណែង ជា​«ប្រធានាធិបតីទី៤៦»នៃប្រទេសមហាអំណាច ក្នុងខែមករា ឆ្នាំ២០២១ខាងមុខ៕

មតិយោបល់