នគរបាលអ៊ីស្ត្រាអែល បានអះអាងថា ឯកអគ្គរដ្ឋទូតចិន ប្រចាំនៅអ៊ីស្ត្រាអែល ទំនងជាបានស្លាប់ ដោយអាការៈ«គាំងបេះដូង» នៅក្នុងដំណេករបស់លោក។
លោក ឌុយ វៃ (Du Wei) ដែលទើបនឹងចូលមកកាន់តំណែង កាលពីខែកុម្ភៈ ធ្វើជាមន្ត្រីការទូតចិន ប្រចាំនៅរដ្ឋធានី តែលអាវីវ ត្រូវបានរកឃើញស្លាប់ នៅថ្ងៃអាទិត្យទី១៧ ខែឧសភាម្សិលម៉ិញ នៅក្នុងនិវេសដ្ឋានខ្លួន ដែលស្ថិតក្នុងសង្កាត់ជាយក្រុងមួយ ឈ្មោះ«Herzliya»។
ប្រភពស្និតនឹងសំនុំរឿង បានអះអាងថា ក្នុងពេលភ្លាមៗ នគរបាលអ៊ីស្ត្រាអែល ដែលបានចុះទៅផ្ទាល់កន្លែង បានបើកការស៊ើបអង្កេត នៅចំពោះករណីមរណភាព ដ៏ទាន់ហន់នេះ។ ប្រភពដដែលនោះ ដែលត្រូវបានស្រង់សំដី ដោយសារព័ត៌មានក្នុងស្រុក បានអះអាងថា លោកឯកអគ្គរដ្ឋទូត ទំនងជាបានស្លាប់ ដោយអាការៈ«គាំងបេះដូង» ក្នុងយប់ថ្ងៃសៅរ៍ ចូលមកថ្ងៃអាទិត្យ។
ក្រសួងការបរទេសអ៊ីស្ត្រាអែល បានអះអាងប្រហាក់ប្រហែលគ្នាថា គ្រប់ភស្ដុតាងដែលទទួលបាន បញ្ជាក់ពីមរណភាព «តាមបែបធម្មជាតិ» របស់លោក ឌុយ វៃ។
រីឯក្រសួងការបរទេសចិនវិញ បានលើកឡើងថា ខ្លួននឹងធ្វើអត្ថាធិប្បាយ នៅលើសំនុំរឿងនេះ នៅពេលណា ដែលខ្លួនទទួលបានព័ត៌មាន«រឹងមាំ»ជាមុនសិន។ តែប្រភពមួយ ដែលត្រូវបានស្រង់សំដី ដោយបណ្ដាញព័ត៌មានបារាំង «France Info» បានអះអាងថា ក្រសួងការបរទេសចិន អះអាងពីមរណភាពដ៏ទាន់ហន់ និងតាមបែបធម្មជាតិ នៃមន្ត្រីការទូតរបស់ខ្លួន។
មរណភាពរបស់លោក បានកើតឡើង នៅតែប៉ុន្មានថ្ងៃ ក្រោយដំណើរទស្សនកិច្ច របស់រដ្ឋមន្ត្រីការបរទេសអាមេរិក លោក ម៉ៃ ភមភីអូ (Mike Pompeo) នៅក្នុងប្រទេសអ៊ីស្ត្រាអែល។
ប្រភពព័ត៌មានជាច្រើន អះអាងថា ប្រមុខការទូតអាមេរិក បានលើកឡើង កាលពីពេលថ្មីៗនេះ ទាមទារឲ្យអ៊ីស្ត្រាអែល ដាក់កំហិត ទៅលើការវិនិយោគរបស់ចិន នៅក្នុងវិស័យជាយុទ្ធសាស្ត្រមួយចំនួន នៅលើទឹកដីអ៊ីស្ត្រាអែល។
លោក វៃ មានសញ្ញាប័ត្រច្បាប់ និងធ្លាប់ជាឯកអគ្គរដ្ឋទូតចិន ប្រចាំនៅប្រទេសអ៊ុយក្រែន រវាងពីឆ្នាំ ២០១៦ មកទល់នឹងឆ្នាំ ២០១៩។ នៅមុនឆ្នាំ២០១៦ លោក ឌុយ វៃ មានតំណែងជានាយករង នៃនាយកដ្ឋានគម្រោងនយោបាយ របស់ក្រសួងការបរទេសចិន។
នៅមុន និងក្នុងពេលកើតហេតុ ភរិយា និងកូនប្រុសរបស់លោក ឌុយ វៃ មិនបានរស់នៅអ៊ីស្ត្រាអែល ជាមួយលោកនោះទេ៕
