ទិដ្ឋភាពកងកម្លាំងនគរបាល កំពុងធ្វើប្រតិបត្តិការ បង្ក្រាបភេរវកម្ម នៅកណ្ដាលរដ្ឋធានីវីយែន ប្រទេសអូទ្រីស ក្នុងយប់ថ្ងៃចន្ទទី២ ខែវិច្ឆិកា ឆ្នាំ២០២០។ (រូបថតសហការីលើទ្វីសធើរ)
ភ្លាមៗនៅក្រោយភេរវកម្ម៦កន្លែង នៅរដ្ឋធានីវីយែន (ប្រទេសអូទ្រីស) មេដឹកនាំអ៊ឺរ៉ុប បានបញ្ចេញសារ ប្រតិកម្មរួមគ្នា ដោយអះអាងថា អ៊ឺរ៉ុបនឹងមិនឱនក្បាល នៅក្រោមការគម្រាមកំហែង ពីសំណាក់ក្រុមភេរវជន ឬអង្គការភេរវនិយម ណាមួយឡើយ។
ស្នូកាំភ្លើងផ្ទុះជាច្រើនសិបគ្រាប់ បានលាន់ឮឡើង ក្នុងយប់ថ្ងៃចន្ទទី២ ខែវិច្ឆិកានេះ កណ្ដាលរដ្ឋធានីវីយែន។ សារព័ត៌មានក្នុងស្រុក បានឲ្យដឹង ក្នុងរបាយការណ៍បឋមថា មនុស្សពីរនាក់បានស្លាប់ ក្នុងនោះម្នាក់ជានគរបាល និងម្នាក់ទៀត ជាខ្មាន់កាំភ្លើង ហើយមនុស្សប្រមាណជា២៥នាក់ទៀត បានរងរបួស។
តែតុល្យភាពដែលទើបនឹងធ្លាក់មកដល់ ឲ្យដឹងទៀតថា មនុស្សស្លាប់អាចកើនឡើង ពី៣នាក់ ទៅដល់៨នាក់។
សម្រាប់លោក «Sebastian Kurz» អធិការបតីនៃប្រទេសអូទ្រីស បានបង្ហោះសារភ្លាមៗ ក្នុងរាត្រីថ្ងៃចន្ទនេះ ចាត់ទុកអំពើនេះ ថាជា«ការវាយប្រហារភេរវកម្ម ដ៏គួរឱ្យស្អប់ខ្ពើម» និងបានទទួលស្គាល់ថា ប្រទេសរបស់លោក កំពុងឆ្លងកាត់រាត្រី ដ៏ពិបាកមួយ ដោយអំពាវនាវ ទៅកាន់ពលរដ្ឋ ឲ្យសំងំនៅក្នុងលំនៅដ្ឋាន។
កាលពីសប្ដាហ៍កន្លងមកថ្មីៗ ប្រទេសបារាំង ដែលរួមទ្វីប ជាមួយអូទ្រីស បានពើបប្រទះ នឹងអំពើភេរវកម្មពីរដងរួចហើយ។ ប៉ុន្តែក្រុមភេរវជន នៅក្នុងប្រទេសបារាំង បានប្រើកាំបិត ដើម្បីវាយប្រហារ ទៅលើជនរងគ្រោះ។
ស្រង់ប្រភព ដោយទីភ្នាក់ងារព័ត៌មានបារាំង «AFP» វិមានប្រធានាធិបតីបារាំង បានឲ្យដឹង នៅក្រោយការវាយប្រហារ ក្នុងរដ្ឋធានីវីយែនថា លោកប្រធានាធិបតី អេម៉ានុយអែល ម៉ាក្រុង (Emmanuel Macron) បានជួបនិយាយទូរស័ព្ទ ដោយផ្ទាល់ ជាមួយលោក «Sebastian Kurz» ដើម្បីបង្ហាញពីសមានចិត្ត និងការគាំទ្រ«ទាំងស្រុង» ពីសំណាក់ប្រទេសបារាំង សម្រាប់ប្រទេសអូទ្រីស។
ក្នុងយប់ថ្ងៃចន្ទនេះដែរ លោក ម៉ាក្រុង បានបង្ហោះសារ នៅលើទំព័រទ្វីសធើររបស់លោកថា៖
«យើងសូមចែករំលែក ភាពតក់ស្លុត និងទុក្ខព្រួយ របស់ប្រជាជនអូទ្រីស ដែលបានរងការវាយប្រហារ ដោយអំពើភេរវកម្ម កណ្ដាលរដ្ឋធានីរបស់ពួកគេ។ បន្ទាប់ពីប្រទេសបារាំង ប្រទេសជាមិត្តមួយទៀត ក៏បានរងការវាយប្រហារ ដោយអំពើភេរវកម្មដែរ។»
ប្រធានាធិបតីបារាំង បានបន្តព្រមាន តបទៅក្រុមភេរវជនវិញថា៖
«នេះ ជាអ៊ឺរ៉ុបរបស់យើង។ សត្រូវរបស់យើង ត្រូវដឹងថា ពួកគេកំពុងលេង ជាមួយភ្លើង។ យើងនឹងមិនឱនក្បាល នៅចំពោះការគម្រាមកំហែង ណាមួយឡើយ។»
ចំពោះលោក បូរីស ចនសុន (Boris Johnson) នាយករដ្ឋមន្ត្រីនៃចក្រភពអង់គ្លេស បានបង្ហាញជំហររួម ដើម្បីប្រឆាំងភេរវកម្ម។ លោកសរសេរនៅលើបណ្ដាញសង្គមថា៖
«ខ្ញុំមានក្ដីរន្ធត់យ៉ាងខ្លាំង ចំពោះការវាយប្រហារដ៏សាហាវ នៅរដ្ឋធានីវីយែន នៅយប់នេះ។ ជំហររបស់ចក្រភពអង់គ្លេស គឺឈរជាមួយប្រជាជនអូទ្រីស។ យើងឈររួមគ្នា ជាមួយអ្នក ដើម្បីប្រឆាំងភេរវកម្ម។»
រីឯនាយករដ្ឋមន្ត្រី នៃប្រទេសប៊ែលហ្សិក លោក «Alexander De Croo» បានសំដែង«សាមគ្គីភាព» ចំពោះប្រជាជនអូទ្រីស និង«មរណទុក្ខ» ទៅដល់ក្រុមគ្រួសារនៃជនរងគ្រោះ។ លោក បញ្ជាក់ថា៖
«យើងនឹងមិនឱនក្បាលដាច់ខាត នៅចំពោះអំពើភេរវកម្ម។»
សម្រាប់លោក «Charles Michel» ប្រធានក្រុមប្រឹក្សាអ៊ឺរ៉ុប នៃសហភាពអ៊ឺរ៉ុប (EU) បានបង្ហោះសារ «ថ្កោលទោសយ៉ាងខ្លាំងក្លា» ចំពោះ«ទង្វើដ៏កំសាក»ខាងលើ។ លោកសរសេរថា៖
«អឺរ៉ុបសូមថ្កោលទោសយ៉ាងខ្លាំងក្លា ចំពោះទង្វើដ៏កំសាក ដែលរំលោភបំពានជីវិត និងតម្លៃមនុស្សជាតិ របស់យើង។ ខ្ញុំសូមសំដែង ការខ្វល់ខ្វាយ នៅជាមួយជនរងគ្រោះ និងប្រជាជន នៃរដ្ឋធានីវីយែន បន្ទាប់ពីមានការវាយប្រហារ ដ៏រន្ធត់ នៅរាត្រីនេះ។»
ប្រមុខគណៈកម្មការអ៊ឺរ៉ុប (ឬហៅម្យ៉ាងទៀត ជារដ្ឋាភិបាល នៃសហភាពអ៊ឺរ៉ុប) អ្នកស្រី «Ursula von der Leyen» បានលើកឡើងប្រហាក់ប្រហែលគ្នាថា៖
«ខ្ញុំមានក្ដីរន្ធត់ និងសោកសៅ ចំពោះការវាយប្រហារដ៏សាហាវ ដែលបានកើតឡើង នៅរដ្ឋធានីវីយែន។ ខ្ញុំសូមសំដែង ការខ្វល់ខ្វាយ នៅជាមួយជនរងគ្រោះ និងប្រជាជនអូទ្រីស។»
មេដឹកនាំអ៊ឺរ៉ុប រូបនេះ បានបន្តថា៖
«អឺរ៉ុបឈរជាមួយប្រទេសអូទ្រីស ក្នុងសាមគ្គីភាព ដ៏ពេញលេញមួយ។ កម្លាំងរបស់យើង មានអនុភាព ជាងភាពស្អប់ខ្ពើម និងភេរវកម្ម៕»