កាលពីថ្ងៃពុធ ប្រទេសកូវ៉េត ទើបនឹងសម្ពោធស្ពានមួយ ប្រវែង៣៦គីឡូម៉ែត្រ នៅលើឈូងសមុទ្រ ហ្គោល។ បើមើលតាមប្រវែងរបស់វា ស្ពានថ្មីនេះ ស្ថិតក្នុងចំណោមស្ពានដ៏វែងជាងគេបំផុត នៅលើពិភពលោក។
ស្ពានឈ្មោះ «Jaber» ដែលឧទ្ធឹសដល់ព្រះអង្គម្ចាស់ «Jaber al-Ahmad Al-Sabah» ភ្ជាប់រដ្ឋធានីនៃប្រទេសកូវ៉េត ទៅកាន់ក្រុង «Subbiya» ដែលស្ថិតនៅភាគខាងជើងប្រទេស។ ទីនោះនឹងត្រូវក្លាយជា តំបន់សេដ្ឋកិច្ចពិសេសមួយ ដោយសារស្ថានភាពភូមិសាស្ត្រ នៅក្បែរទាំងព្រំដែនទឹក និងទាំងព្រំដែនគោក នៃប្រទេសអៀរ៉ាក់ និងអៀរ៉ង់។
តំបន់សេដ្ឋកិច្ចពិសេសថ្មីនេះ មានឈ្មោះថា «Silk City» ជាលំហពាណិជ្ជកម្មសេរី រវាងអាស៊ីកណ្ដាល និងអ៊ឺរ៉ុប។ បើតាមរដ្ឋាភិបាលកូវ៉េត បានឲ្យដឹងថា ដើម្បីឲ្យគម្រោងនេះ ចេញជារូបរាង គេត្រូវការប្រាក់វិនិយោគ ប្រមាណជាង១០០ពាន់លានដុល្លារ។
ព្រះអង្គម្ចាស់ «Sabah al-Ahmad Al-Sabah» នៃប្រទេសកូវ៉េត បានធ្វើជាអធិបតីនៃពិធីសម្ភោធស្ពានខាងលើ ដោយមានការចូលរួម ពីនាយករដ្ឋមន្ត្រីកូរ៉េខាងត្បូង លោក លី ណាកយ៉ុង (Lee Nak-Yeon) និងប្រធានព្រឹទ្ធសភាបារាំង លោក ហ្សេរ៉ា ឡាឆេរ (Gérard Larcher) នោះផង។
គឺក្រុមហ៊ុនបារាំង ឈ្មោះ «SYSTRA» ជាអ្នកបង្កើតគម្រោងស្ពាន «Jaber» នេះឡើង ខណៈក្រុមសាងសង់ គឺសហគ្រាសកូរ៉េ ឈ្មោះ «Hyundai Engineering and Construction» ដែលត្រូវការពេល រាប់ពីដើមដំបូង រហូតដល់ពេលបញ្ចប់ការសាងសង់ មានរយៈពេលសរុប ៥ឆ្នាំ។
តម្លៃសាងសង់ស្ពានដ៏វែងនេះ មានប្រមាណជា ៣,៦ពាន់លានដុល្លារ ដែលត្រូវជា ៣,២ពាន់លានអ៊ឺរ៉ូ៕