«បើគ្មានការរួបរួមជាតិ និងសាមគ្គីភាព នៅក្នុងពិភពលោកទេ សូមរំពឹងទុកទៅថា ការរាតត្បាតដ៏សាហាវ នឹងកើតមានទៀត នៅថ្ងៃខាងមុខ។ សូមរួមគ្នា ដើម្បីបញ្ចៀសរឿងដ៏ខ្លោចផ្សារនេះ។»
ខាងលើនេះ ជាការព្រមានឡើង របស់លោក តេដ្រូស៍ អាដាណុម ហ្គេប្រេយ៉េស៊ុស (Tedros Adhanom Ghebreyesus) អគ្គនាយកអង្គការសុខភាពពិភពលោក (WHO /OMS) ដែលបានថ្លែង តាមរយៈវីដេអូមួយ (ខាងក្រោម) ក្នុងថ្ងៃពុធទី២២ ខែមេសា ឆ្នាំ២០២០។
កាលពីថ្ងៃចន្ទ លោកបានអំពាវនាវ ឲ្យមាន«ការរួបរួមជាតិ» និង«សាមគ្គីភាពក្នុងពិភពលោក» និងរំឭកសារជាថ្មីថា នៅមានមនុស្សជាច្រើន បន្តមិនយល់ថា មេរោគដ៏ចង្រៃ បានបង្កឲ្យមានការរាតត្បាត នៃជំង«Covid-19» នៅគ្រប់ជ្រុងទាំងអស់ នៃផែនដី។
ការរំឭករបស់លោក តេដ្រូស៍ ទំនងជាចម្លើយ តបនឹងប្រធានាធិបតីអាមេរិក លោក ដូណាល់ ត្រាំ (Donald Trump) ដែលគ្រោងបន្ធូរវិធានការ ទប់ស្កាល់ជំងឺដ៏ចង្រៃ ដើម្បីអ្វីមួយ ដែលលោក ត្រាំ ហៅថា ចង់ផ្ដល់សន្ទុះសារជាថ្មី ទៅដល់សេដ្ឋកិច្ច។
លោក តេដ្រូស៍ បានថ្លែងក្នុងវីដេអូថា៖
«ជាមេរោគមួយប្រភេទ ដែលមនុស្សជាច្រើន នៅតែមិនយល់។ ប្រទេសជាច្រើន ដែលសុទ្ធសឹងជាប្រទេសមានការអភិវឌ្ឍ បានធ្វើសេចក្ដីសន្និដ្ឋាន ដោយខ្លួនឯង អំពីអ្វីដែលពួកគេមិនបានដឹង (…) ហើយយើងបាននិយាយប្រាប់មុន រួចជាស្រេចហើយ បើសូម្បីប្រទេសមានការអភិវឌ្ឍនោះក្ដី។»
«មេរោគនេះ នឹងផ្ទុះឡើងខ្លាំង ទោះនៅក្នុងប្រទេស មានការអភិវឌ្ឍ ក៏ដោយ។ ហើយវាក៏បានកើតឡើងមែន។»
លោកបន្តថា៖
«សូមរួមគ្នាបញ្ឈប់ ការផ្ទុះឡើងបន្ថែមទៀត! សូមរួមគ្នាបញ្ឈប់ នូវរឿងដ៏ខ្លោចផ្សារ។ ដូច្នេះ សូមនិយាយទាំងអស់គ្នាថា វាគ្រប់គ្រាន់ហើយ៕»