ពីឆ្វេងទៅស្ដាំ៖ លោក ដូណាល់ ត្រាំ ប្រធានាធិបតីចប់អាណត្តិ - បេក្ខជនប្រធានាធិបតី សម្រាប់អាណត្តិថ្មី និងលោក ចូ បៃដេន បេក្ខជនប្រធានាធិបតី នៅសហរដ្ឋអាមេរិក។ (រូបថតសហការី)
លោក ដូណាល់ ត្រាំ (Donald Trump) អាចនឹងត្រូវអូសចេញ ពីសេតវិមាន បើសិនជាប្រធានាធិបតីផុតអាណត្តិរូបនេះ នៅ«ក្រាញអំណាច» នៅទីនោះតទៅទៀត។ នេះ បើតាមលោក «Andrew Bates» អ្នកនាំពាក្យរបស់លោក ចូ បៃដេន (Joe Biden) បេក្ខជនប្រធានាធិបតីអាមេរិក ពីគណបក្សប្រជាធិបតេយ្យ។
បើតាមលទ្ធផលស្ទាបស្ទង់ នៃការបោះឆ្នោតប្រធានាធិបតី ក្នុងនាទីចុងក្រោយនេះ បង្ហាញថា លោក ចូ បៃដេន អាយុ៧៧ឆ្នាំ កំពុងបោះជំហាន កាន់តែកៀក ឆ្ពោះទៅកាន់កាប់សេតវិមាន សម្រាប់រយៈពេលបួនឆ្នាំទៅមុខ។
អ្នកនាំពាក្យរបស់លោក បានឆ្លៀតឱកាសនេះ ថ្លែងទៅកាន់ប្រព័ន្ធសារព័ត៌មានថា គឺ«ពលរដ្ឋអាមេរិក ជាអ្នកសម្រេច នៅក្នុងលទ្ធផល នៃការបោះឆ្នោត»។ លោក «Andrew Bates» បន្តថា៖
«ហើយកងកម្លាំងអាជ្ញាធរអាមេរិក ពិតជាមានលទ្ធភាព ក្នុងការបណ្ដេញ នូវជនណាក៏ដោយ ដែលរស់នៅទាំងបំពាន នៅក្នុងសេតវិមាន ឲ្យចេញពីទីនោះ។»
នៅសល់រដ្ឋចំនួន៥ទៀត ដែលមិនទាន់បញ្ចប់ការរាប់សន្លឹកឆ្នោត ជាពិសេសសន្លឹកឆ្នោត ដែលត្រូវបានបោះទុកជាមុន និងផ្ញើរតាមប្រៃសណីយ៍ ដើម្បីបង្ការការរាតត្បាតជំងឺ «Covid-19»។
បើតាមលទ្ធផលស្ទាបស្ទង់ នៅនាទីចុងក្រោយ លោក ចូ បៃដេន នៅសល់តែ៦សម្លេង នៃអង្គបោះឆ្នោត (អ្នកតំណាងម្ចាស់ឆ្នោត) ទៀតប៉ុណ្ណោះ ដើម្បីបង្គ្រប់២៧០សម្លេង ដែលគ្រប់គ្រាន់ក្នុងការប្រកាសជ័យជំនះ ក្នុងការបោះឆ្នោតប្រធានាធិបតីអាមេរិក ឆ្នាំ២០២០នេះ។
តែពីក្នុងចំណោមរដ្ឋទាំង៥ចុងក្រោយ មានរដ្ឋចំនួនបី បានបង្ហាញលទ្ធផលស្ទាបស្ទង់ ថា លោក ចូ បៃដេន បាននាំមុខពីលោក ដូណាល់ ត្រាំ។ គេសង្ឃឹមថា លទ្ធផលបញ្ចប់ការរាប់សន្លឹកឆ្នោត ក្នុងរដ្ឋមួយ (ពីចំណោមរដ្ឋទាំងបី) នឹងអាចផ្សាយចេញ ជាសាធារណៈ ក្នុងប៉ុន្មាននាទី ឬយូបំផុត ប៉ុន្មានម៉ោងខាងមុខ។
តែលោក ដូណាល់ ត្រាំ បានលើកឡើង ពីការលួចបន្លំសន្លឹកឆ្នោត និងបានប្ដឹងឡើងទៅកាន់តុលាការធម្មនុញ្ញ ដើម្បីស្នើឲ្យបញ្ឈប់ការរាប់សន្លឹកឆ្នោត ឬស្នើឲ្យពិនិត្យ និងរាប់សន្លឹកឆ្នោតឡើងវិញ។
យ៉ាងណា លោក «Larry Kudlow» ទីប្រឹក្សាទទួលបន្ទុកសេដ្ឋកិច្ច របស់លោក ត្រាំ បានថ្លែងតាម ទូរទស្សន៍ «CNBC» ក្នុងថ្ងៃសុក្រនេះថា ការផ្ទេរអំណាច នៅក្នុងភាពស្ងប់ស្ងៀម ដូចទម្លាប់ធម្មតា នឹងបញ្ចៀសវិបត្តិទីផ្សារភាគហ៊ុន និងសេដ្ឋកិច្ចរបស់ប្រទេសមហាអំណាចមួយនេះ។
លោក «Larry Kudlow» បានពន្យល់ថា៖
«ខ្ញុំគិតថា ការផ្ទេរអំណាច នឹងប្រព្រឹត្តិទៅដោយសន្តិវិធី (…) សហរដ្ឋអាមេរិក គឺជាប្រទេសប្រជាធិបតេយ្យធំជាងគេ នៅលើពិភពលោក។ យើងគោរពច្បាប់ ហើយលោកប្រធានាធិបតី ក៏គោរពច្បាប់ដូច្នេះដែរ៕»