ទិដ្ឋភាពដុតបំផ្លាញលំនៅដ្ឋានពលរដ្ឋ នៅចំពោះពលរដ្ឋ ដែលជាម្ចាស់លំនៅដ្ឋាន។ (រូបថតអង្គការសង្គមស៊ីវិល)
តុលាការថៃ ដែលស្ថិតក្នុងភាគខាងត្បូង រាជធានីបាងកក នឹងចេញសេចក្តីសម្រេច នៅថ្ងៃសុក្រ ទី៣១ ខែកក្កដាស្អែក លើបណ្តឹងជាសមូហភាពឆ្លងដែនដំបូងបង្អស់ នៅក្នុងតំបន់អាស៊ីអាគ្នេយ៍ ដែលប្ដឹងដោយពលរដ្ឋកម្ពុជា ប្រឆាំងក្រុមហ៊ុនស្ករថៃដ៏ធំមួយ ឈ្មោះ «Mitr Phol» ជុំវិញការរំលោភបំពានសិទ្ធិមនុស្ស ដែលបានប្រព្រឹត្តិទៅ តាំងពីឆ្នាំ២០០៨។
សេចក្ដីប្រកាសព័ត៌មាន របស់អង្គការសង្គមស៊ីវិលជាតិ និងអន្តរជាតិចំនួន៦ ដែលទស្សនាវដ្ដីមនោរម្យ.អាំងហ្វូ ទទួលបានកាលពីមុននេះបន្តិច បានឲ្យដឹងថា ការសម្រេចរបស់«តុលាការថៃ» នឹងកំណត់ពីសិទ្ធិទទួលបានយុត្តិធម៌ សម្រាប់ដើមបណ្ដឹង ដែលជាពលរដ្ឋខ្មែររងគ្រោះ តាមរយៈប្រព័ន្ធយុត្តិធម៌របស់ថៃ ក៏ដូចជាគណនេយ្យភាពសាជីវកម្ម នៅក្នុងតំបន់ផងដែរ។
កាលពីឆ្នាំ២០០៨ រដ្ឋាភិបាលលោក ហ៊ុន សែន តាមរយៈក្រសួងកសិកម្ម បានផ្ដល់ដីវិនិយោគជិត ២ម៉ឺនហិតា ដល់ក្រុមហ៊ុនថៃ «Mitr Pohl» ធ្វើការវិនិយោគដាំអំពៅ ចំនួន ៧០ឆ្នាំ ក្នុងស្រុកសំរោង និងចុងកាល់ នៃខេត្តឧត្តរមានជ័យ ដែលបានប៉ះពាល់ដល់ពលរដ្ឋជាង ៧០០គ្រួសារ ដែលរស់នៅតំបន់ទាំងនោះ រហូតឈានដល់ការប្រើប្រាស់ហិង្សារវាងពលរដ្ឋ នឹងក្រុមហ៊ុន។
ក្រុមហ៊ុនស្ករថៃ «Mitr Pohl» នៅពេលនោះ មានក្រុមហ៊ុនភ្នាក់ងារប្រតិបត្តិចំនួន៣ ក្នុងប្រទេសកម្ពុជា រួមមានក្រុមហ៊ុន អង្គរស៊ូហ្គឺ (Angkor Sugar) ទន្លេ ស៊ូហ្គឺខេន (Tonle Sugar Cane) និង ខេន និងស៊ូហ្គឺវ៉ាឡេ (Cane and Sugar Valley)។
សេចក្ដីប្រកាសព័ត៌មាន របស់ក្រុមអង្គការសង្គមស៊ីវិល បានឲ្យដឹងថា៖
«ផ្ទះនិងទ្រព្យសម្បត្តិរបស់ដើមបណ្ដឹង (ពលរដ្ឋខ្មែររងគ្រោះ) ត្រូវបានដុតបំផ្លាញចោល ហើយប្រជាពលរដ្ឋរងគ្រោះ ត្រូវបានគម្រាមកំហែង ដោយប្រើអំពើហិង្សាលើរូបរាងកាយ និងចាប់ដាក់ពន្ធនាគារ នៅពេលពលរដ្ឋធ្វើការតវ៉ានឹងក្រុមហ៊ុន។»
ពលរដ្ឋខ្មែរបាននាំគ្នាតវ៉ា ស្វែងរកដំណោះស្រាយ ពីអាជ្ញាធរកម្ពុជា គ្រប់លំដាប់ថ្នាក់ តែគ្មានលទ្ធផល ទើបចុងក្រោយបានដាក់ពាក្យបណ្តឹង ទៅគណៈកម្មការសិទ្ធិមនុស្សថៃ មុននឹងស្ថាប័នថៃមួយនេះ ចាប់ធ្វើការស៊ើបអង្កេត ចាប់តាំងពីឆ្នាំ ២០១០មក។
ប៉ុន្តែជម្លោះបានបន្ត ដោយគ្មានដំណោះស្រាយ និងបន្ទាប់ពីការស៊ើបអង្កេត របស់គណៈកម្មការសិទ្ធិមនុស្សថៃ ប្រទេសថៃបានដាក់សំណើរ មកកាន់រដ្ឋាភិបាលកម្ពុជា ឲ្យបញ្ឈប់ការវិនិយោគរបស់ក្រុមហ៊ុន «Mitr Pohl» ខាងលើ នៅឆ្នាំ២០១៥។
លោក អៀង វុទ្ធី នាយកប្រតិបត្តិអង្គការសមធម៌កម្ពុជា ត្រូវបានស្រង់សំដី មកអះអាងក្នុងសេចក្ដីប្រកាសព័ត៌មានថា៖
«ឋានៈជាបណ្ដឹងសមូហភាព គឺមានការចាំបាច់ ដើម្បីការពារសិទ្ធិប្រជាជនកម្ពុជា ដែលងាយរងគ្រោះទាំងនេះ។ ការផ្ដល់នូវឋានៈប្រភេទនេះ នឹងក្លាយជាគំរូផ្លូវច្បាប់ដ៏រឹងមាំមួយ ដែលបង្ហាញថា ក្រុមហ៊ុនសាជីវកម្មធំៗនឹងត្រូវទទួលខុសត្រូវ ចំពោះព្យសនកម្មទាំងឡាយ ដែលបណ្ដាលមកពីប្រតិបត្តិការរបស់ខ្លួន មិនថានៅទីណានោះទេ។»
រីឯអ្នកស្រី «Sor. Rattanamanee Polkla» មេធាវីរបស់មជ្ឈមណ្ឌលធនធានសហគមន៍ បានថ្លែងឲ្យដឹងដែរថា៖
«រឿងក្ដីនេះ ជាការសាកល្បងដ៏ពិតប្រាកដមួយថា តើប្រព័ន្ធយុត្តិធម៌របស់ប្រទេសថៃ គឺ គ្រាន់តែសម្រាប់រឿងក្ដីក្នុងស្រុក ឬសម្រាប់មនុស្សគ្រប់គ្នា ដែលស្វែងរកយុត្តិធម៌ រួមទាំងបណ្ដឹងឆ្លងដែនផងដែរ។ ករណីនេះ ជាឱកាសមួយសម្រាប់ប្រទេសថៃ ដើម្បីបង្ហាញដល់ប្រជាជនថៃ និងសហគមន៍អន្តរជាតិ ថាប្រទេសថៃនឹងលើកស្ទួយសិទ្ធិមនុស្ស (…)៕»