លោក សម រង្ស៊ី មេដឹកនាំប្រឆាំងកម្ពុជា។ (រូបថត EPA)
តបទៅនឹងសារបែកធ្លាយ របស់លោកនាយករដ្ឋមន្ត្រី ហ៊ុន សែន កាលពីម្សិលម៉ិញ លោក សម រង្ស៊ី មេដឹកនាំប្រឆាំងបានថ្លែងព្រមានលោក ហ៊ុន សែន វិញថា លោក (សម រង្ស៊ី) នឹងមិនឲ្យលោក ហ៊ុន សែន ចាប់ខ្លួនងាយៗ នោះឡើយ។
មេដឹកនាំប្រឆាំង បានថ្លែងតាមវិទ្យុអាស៊ីសេរី កាលពីមុននេះថា គឺផ្ទុយទៅវិញ លោកនឹងដឹកនាំកម្លាំងពលរដ្ឋ រាប់ម៉ឺនរាប់សែន ឬឈានទៅរាប់លាននាក់ ឲ្យងើបឈរឡើង ដើម្បីទៅចាប់លោក ហ៊ុន សែន ឲ្យទាល់តែបានក្នុងឆ្នាំ២០១៩នេះ។
ក្នុងសារជាលក្ខណៈឯកជន ជាង១២នាទី ដែលលោកបានបញ្ជូន ទៅកាន់មនុស្សជំនិតៗរបស់លោក នៅក្នុងប្រព័ន្ធបញ្ជូនសារមួយ លោក ហ៊ុន សែន បានបញ្ជាទៅមន្ត្រីអ្នកនាំពាក្យទាំងឡាយ រាប់ទាំងអ្នកនាំពាក្យស្ថាប័ននីតិបញ្ញត្តិផង ឲ្យឈប់ឆ្លើយឆ្លងជាមួយលោក សម រង្ស៊ី ព្រោះលោកយល់ថា សកម្មភាពសព្វថ្ងៃរបស់មេដឹកនាំប្រឆាំង ជាល្បិចរបស់មេដឹកនាំរូបនេះដើម្បីកុំឲ្យគេភ្លេច នឹងអាលចូលមកក្នុងកញ្ចប់ នៃកិច្ចចរចាជាយថាហេតុណាមួយ ហើយក្លាយជាភាគីមួយដើម្បីមកតថ្លៃជាមួយលោក។
ជាប្រតិកម្មតបវិញភ្លាមៗ សំដីរបស់លោក ហ៊ុន សែន តាមរយៈសារជាឯកជនខាងលើ ត្រូវបានមេដឹកនាំប្រឆាំងចាត់ទុក ថាជាសំដី«ទ័លច្រក» និង«ជ្រួលច្របល់»។
លោក សម រង្ស៊ី បានថ្លែងបន្តតាមវិទ្យុអាស៊ីសេរី ដោយអះអាងជាថ្មីថា លោកមិនឆោតឲ្យលោក ហ៊ុន សែន ឬជនបាតដៃទី៣ណាមួយ មកចាប់ខ្លួនលោក ឬសម្លាប់លោកដោយងាយៗនោះឡើយ។ លោកពន្យល់ថា លោកមិនចុះពីយន្ដហោះ ហើយឡើងរថយន្ដ ដើម្បីឲ្យលោក ហ៊ុន សែន ចាប់ខ្លួនឬសម្លាប់នោះទេ។ លោកថា អានេះជា«សេណារីយ៉ូ» ដែលលោក ហ៊ុន សែន ដឹងហើយ ដូច្នេះលោកមិនដើរតាមសេណារីយ៉ូនេះឡើយ៕