កម្ពុជា

អគ្គិភ័យ​ឆេះ​«ក្លិបកម្សាន្ដ» នៅ​ក្បែរ​ទូត​រុស្ស៊ី ផ្សែងខ្មៅ​គ្រប​ភ្នំពេញ

«ក្លិបកម្សាន្ដ»មួយ ដែលមានឈ្មោះ «EDM» កណ្ដាលរាជធានីភ្នំពេញ បានត្រូវ​ព្រះអគ្គិ​ត្របាក់ ក្នុងរសៀលថ្ងៃទី២៤ ខែឧសភានេះ។ ក្លឹបនេះ មានទីតាំងក្បែរផ្សារទំនើប អ៊ីអន១ (AeOn1) និងខាងកើត​ស្ថានទូតរុស្ស៊ី ក្នុងសង្កាត់ទន្លេបាសាក់ ខ័ណ្ឌចំការមន។ 

ទិដ្ឋភាពផ្សែងខ្មៅខ្មួលខ្មាញ់ បានគ្របដណ្ដប់ ក្នុងផ្ទៃមេឃ នៃរាជធានីភ្នំពេញ ខណៈ​វីដេអូ​ជាច្រើន ដែល​បានថត​ពីទិដ្ឋភាពនេះ ត្រូវបានបង្ហោះ នៅពាសពេញបណ្ដាញសង្គម។

បើតាមប្រភពផ្ទាល់កន្លែង ឲ្យដឹងថា អគ្គិភ័យបានចាប់ផ្ដើមឆាបឆេះ ពីម៉ោង១៦ និង​២០នាទី ហើយ​នៅក្នុង​ពេលភ្លាមៗ គេមិនអាចបញ្ជាក់បានថា អគ្គិភ័យបានកើតឡើង បណ្ដាលពីអ្វី និងបង្ក​ឲ្យមាន​ការខូចខាត ដល់កម្រិតណា នោះនៅឡើយ។

អភិបាល​ខណ្ឌ​ចំការមន លោក ថេង សុថុល បានថ្លែងប្រាប់សារព័ត៌មានក្នុងស្រុក​ថា «ក្លិបកម្សាន្ដ»​​ខាងលើ ​បាន​បិទ​ដំណើរការ​របស់​ខ្លួន ទៅ​តាម​បទ​បញ្ជា​​របស់​រដ្ឋាភិបាល។

ក្នុងខណៈនេះ កងកម្លាំងអាជ្ញាធរ កំពុងធ្វើអន្តរាគមន៍ ក្នុងការរៀបចំសណ្ដាប់ធ្នាប់ និងចរាចរណ៍ រីឯក្រុម​ពន្លត់​អគ្គិភ័យ កំពុងប្រឹងប្រែង ធ្វើការពន្លត់ភ្លើង៕

ក. កេសរ កូល

អ្នកសារព័ត៌មាន និងជាអ្នកស្រាវជ្រាវ នៃទស្សនាវដ្ដីមនោរម្យ.អាំងហ្វូ។ អ្នកនាង កេសរ កូល មានជំនាញខាងព័ត៌មានក្នុងស្រុក និងព័ត៌មានក្នុងតំបន់អាស៊ី ប៉ាស៊ីភិក។