ក្នុងពិធីបិទបញ្ចប់«ល្បែងអូឡាំពិក» នៅរាជធានីតូក្យូ (ជប៉ុន) យប់ថ្ងៃអាទិត្យទី៨ ខែសីហានេះ អ្នកស្រី អាន អ៊ីដាលហ្គោ (Anne Hidalgo) អភិបាលរដ្ឋធានី ប៉ារីស បានទទួលទង់របស់គណៈកម្មការអូឡាំពិកអន្តរជាតិ ដើម្បីជានិមិត្តរូបរបស់រដ្ឋធានីប៉ារីស (បារាំង) ក្នុងការទទួលខ្លួន ធ្វើជាម្ចាស់ផ្ទះសម្រាប់ព្រឹត្តិការណ៍ប្រកួតល្បែងអូឡាំពិក នៅឆ្នាំ២០២៤ខាងមុខ។
ទង់អូឡាំពិកនោះ ត្រូវបានផ្ទេរពីអ្នកស្រី«Yuriko Koike» អភិបាលរាជធានី តូក្យូ តាមរយៈលោក «Thomas Bach» ប្រធានគណៈកម្មការអូឡាំពិកអន្តរជាតិ មុននឹងត្រូវបានអ្នកស្រី អាន អ៊ីដាលហ្គោ លើកគ្រវីទៅកាន់ពិភពលោក។
ព្រឹត្តិការណ៍ល្បែងអូឡាំពិក លើកទី៣៣ នឹងប្រព្រឹត្តិទៅនៅរដ្ឋធានី ប៉ារីស ព្រមទាំងតំបន់មួយចំនួន នៅក្នុងប្រទេសបារាំង ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ឆ្នាំ២០២៤ (ខណៈល្បែងអូឡាំពិកសម្រាប់ជនពិការ នឹងប្រព្រឹត្តិទៅ ពីថ្ងៃទី២៨ ខែសីហា ដល់ថ្ងៃទី៨ ខែកញ្ញា ឆ្នាំដដែល)។
ប្រសិនជាអ្នកស្រី អាន អ៊ីដាលហ្គោ បានទទួលទង់អូឡាំពិក នៅឯពិធីបិទបញ្ចប់ល្បែងអូឡាំពិក លើកទី៣២ ក្នុងរាជធានីតូក្យូនោះ នៅឯរដ្ឋធានីប៉ារីសឯនេះ ក៏មានប្រារព្ធពិធីអបអរសាទរ និមិត្តរូបជាផ្លូវការនេះដែរ ដោយមានការចូលរួម ពីបណ្ដាកីឡាករបារាំង ដែលទើបនឹងត្រឡប់ពីប្រទេសជប៉ុន និងបណ្ដាអ្នកគាំទ្រនោះផង៕
ខាងក្រោមនេះ ជាទីតាំងមួយចំនួន នៅកណ្ដាលនិងជុំវិញរដ្ឋធានីប៉ារីស ដែលត្រូវយកមករៀបចំ ធ្វើជាទីលានប្រកួតល្បែងអូឡាំពិក៖