អាជ្ញាធរអង់គ្លេសត្រូវការរយៈពេលរហូតដល់៣៦ម៉ោង ដើម្បីបញ្ជាក់ថា សាកសពដែលត្រូវបានស្រង់ចេញពីក្នុងសមុទ្រ កាលពីព្រឹកថ្ងៃពុធ គឺពិតជា«រូបរាងសេសសល់» របស់កីឡាករ អេមីលីយ៉ាណូ សាឡា (Emiliano Sala) ខ្សែប្រយុទ្ធដែលបានចាកចេញពីក្រុម ណង់ (Fc Nantes – បារាំង) ទៅកាន់ក្រុម កាឌីហ្វ (Cardiff City – អង់គ្លេស)។
ដំណឹងដ៏អកុសល ដែលបញ្ចាក់ពីអត្តសញ្ញាណរបស់កីឡាករ បានធ្លាក់មកដល់ ក្នុងយប់ថ្ងៃព្រហស្បត្តិ៍ម្សិលម៉ិញ ដែលធ្វើឡើងដោយអាជ្ញាធរអង់គ្លេស នៃតំបន់ «Dorset» ភាគខាងត្បូងចក្រភពអង់គ្លេស។
សេចក្ដីប្រកាសព័ត៌មានរបស់នគរបាល «Dorset» បានអះអាងថា បន្ទាប់ពីពិនិត្យយ៉ាងដិតដល់ ទៅលើសាកសពដែលស្រង់បាន នោះគឺពិតជា«រូបរាងសេសសល់» របស់កីឡាករ សាឡា។ ក្នុងពេលបន្ទាប់មក អាជ្ញាធរបានបញ្ជូនសាកសព ទៅកាន់ក្រុង «Bournemouth» ដើម្បីប្រគល់ជាបន្ត ទៅឲ្យក្រុមគ្រួសាររបស់កីឡាករ ដែលនឹងប្រារព្ធពិធីរំលឹកវិញ្ញាណក្ខន្ធ នៅក្នុងប្រទេសអាហ្សង់ទីន។
រឿងរ៉ាវបានកើតឡើងនៅយប់ថ្ងៃទី២១ ខែមករា ឆ្នាំ២០១៩ ខណៈពេលយន្ដហោះ ដែលដឹកកីឡាករ សាឡា បានហោះចេញពីក្រុង ណង់ (បារាំង) ឆ្ពោះទៅក្រុង កាឌីហ្វ (អង់គ្លេស) ប្រមាណជា១ម៉ោងក្រោយមក ស្រាប់តែបាត់ដំណឹងសូន្យឈឹង នៅលើសមុទ្រ ម៉ង់ ត្រង់ចំណុចមួយ នៅខាងជើងប្រជុំកោះ «Guernesey» នៃចក្រភពអង់គ្លេស។
ក្នុងពេលភ្លាមៗ អាជ្ញាធរនៃប្រជុំកោះ «Guernesey» បានព្យាយាមស្វែងរកស្លាកស្នាមយន្ដហោះ តែមិនបានជោគជ័យទេ។ បន្ទាប់ពីអាជ្ញាធរបានសម្រេចចិត្តបញ្ឈប់ការរុករក ក្រុមគ្រួសាររបស់កីឡាករ បានសម្រេចចិត្តជួលក្រុមហ៊ុនឯកជនមួយ ដើម្បីបន្តកិច្ចការរុករកតួយន្ដហោះ ដោយប្រើប្រាស់ថវិកា ដែលផ្ដល់ដោយសប្បុរសជន នៅលើបណ្ដាញអ៊ិនធើណែត។
ការរុករកនោះ បានអនុញ្ញាតឲ្យគេរកឃើញតួយន្ដហោះនោះមែន នៅព្រឹកថ្ងៃអាទិត្យកន្លងមកនេះ។ រូបភាពដំបូង ដែលថតដោយកាម៉េរាមនុស្សយន្ដ បានបង្ហាញថា នៅក្នុងតួយន្ដហោះ មានសាកសពមួយ ពីក្នុងចំណោមមនុស្សពីរនាក់ ដែលបានជិះក្នុងយន្ដហោះ (កីឡាករ និងអ្នកបើកយន្ដហោះ)។
អ្វីដែលត្រូវធ្វើនៅពេលនេះ គឺស្វែងរកសាកសពមួយទៀត ដែលជាអ្នកបើកយន្ដហោះ លោក ដេវិដ អាបូតសុន (David Ibbotson) ខណៈអាជ្ញាធរមានគម្រោងស្រង់តួយន្ដហោះទាំងមូល ចេញពីសមុទ្រ ដើម្បីធ្វើការស៊ើបអង្កេត ពីមូលហេតុដែលឈានទៅដល់គ្រោះធ្លាក់យន្ដហោះដូច្នេះ៕