ប្រធានរដ្ឋសភានៃសហរដ្ឋអាមរិក អ្នកស្រី ណេនស៊ី ផេឡូស៊ី (Nancy Pelosi) បានប្រកាសនៅថ្ងៃសុក្រនេះ ថាអ្នកស្រីបានជួបជជែក ជាមួយមេបញ្ជាការកងទ័ពអាមេរិក ដើម្បីចង់បានការធានាថា ប្រធានាធិបតី«ដែលមានសតិមិននឹងនរ» ដូចលោក ដូណាល់ ត្រាំ (Donald Trump) នឹងមិនអាចប្រើ«កូដនុយក្លេអ៊ែរ» ដើម្បីធ្វើការវាយប្រហារ ជាយថាហេតុ និងតាមទំនើងចិត្តនោះឡើយ។
ក្នុងសំបុត្រមួយច្បាប់ ដែលបញ្ជូនទៅកាន់ក្រុមសមាជិកសភា អ្នកស្រី ណេនស៊ី ផេឡូស៊ី បានសរសេរឲ្យដឹងថា៖
«ព្រឹកមិញនេះ ខ្ញុំបានជួយនិយាយជាមួយ មេបញ្ជាការកងទ័ពអាមេរិក លោកឧត្ដមសេនីយ៍ “Mark Milley” ដើម្បីពិភាក្សាពីសំនុំរឿង ដែលត្រូវប្រុងប្រយ័ត្នមួយចំនួន ក្នុងការបញ្ចៀសកុំឲ្យប្រធានាធិបតីមួយរូប ដែលមានសតិមិននឹងនរ អាចបើកការវាយប្រហារ តាមផ្លូវយោធា ឬប្រើ«កូដនុយក្លេអ៊ែរ» ដើម្បីវាយប្រហារដោយអាវុធនុយក្លេអ៊ែរ។»
ប្រធានាធិបតីអាមេរិក គឺជា«អគ្គមេបញ្ជាការកងទ័ព»។ បន្ទាប់ពីបានស្បថចូលកាន់តំណែងរួច ប្រធានាធិបតីអាមេរិក ត្រូវបានឲ្យស្គាល់ នូវ«កូដនុយក្លេអ៊ែរ» និងមានជាប់នឹងខ្លួននូវប្រអប់មួយ ដែលអាចត្រូវបានយកមកប្រើ ដើម្បីបើកការវាយប្រហារ ដោយអាវុធនុយក្លេអ៊ែរ។
អ្នកនាំពាក្យរបស់មេបញ្ជាការកងទ័ព ត្រូវបានស្រង់សំដី ដោយទីភ្នាក់ងារព័ត៌មានបារាំង «AFP» មកបញ្ជាក់ថា លោកឧត្ដមសេនីយ៍ «Mark Milley» បានទទួលទូរស័ព្ទ ពីអ្នកស្រី ផេឡូស៊ី ដោយបានជជែកគ្នា អំពីប្រអប់ពិសេស ដែលអាចត្រូវប្រើ ដើម្បីធ្វើការវាយប្រហារដោយអាវុធនុយក្លេអ៊ែរ។ តែអ្នកនាំពាក្យរូបនោះ មិនបានលំអិតបន្ថែម ពីកិច្ចពិភាក្សាខាងលើទេ
យ៉ាងណា អ្នកស្រី ផេឡូស៊ី បានបន្តព្រមានលោក ត្រាំ ដែលអ្នកស្រីចាត់ទុក ថាមានសតិមិនគ្រប់ ថាគួរចាកចេញពីតំណែង ដោយខ្លួនឯង ជាជាងឲ្យអ្នកស្រី និងរដ្ឋសភាបើកនីតិវិធី ដើម្បីបណ្ដេញលោកចេញ។ អ្នកស្រីបន្តសរសេរថា៖
«ស្ថានភាពជាមួយប្រធានាធិបតី ដែលមានសតិមិនគ្រប់រូបនេះ មិនអាចបន្តឲ្យមានគ្រោះថ្នាក់ទៀតឡើយ៕»