ការវាយប្រហារផ្នែកបច្ចេកវិទ្យា តាមបណ្ដាញអ៊ិនធើណែត ពីសំណាក់ប្រទេសរ៉ុស្ស៊ី ទៅលើបណ្ដាភ្នាក់ងាររដ្ឋាភិបាលអាមេរិក នឹងមិនអាចបន្តនៅដោយគ្មាន«ការឆ្លើយតប»ឡើយ។ ប្រធានាធិបតីជាប់ឆ្នោតថ្មី របស់សហរដ្ឋអាមេរិក លោក ចូ បៃដិន (Joe Biden) បានអះអាងឡើងយ៉ាងដូច្នេះ និងបានបរិហារ អំពីភាពមិនអើពើរបស់លោក ដូណាល់ ត្រាំ (Donald Trump) ប្រធានាធិបតីជិតផុតអាណត្តិ។
នៅក្នុងសន្និសីទសារព័ត៌មាន ក្នុងថ្ងៃអង្គារពី២២ ខែធ្នូ លោក បៃដិន បញ្ជាក់ថា លោកនិងរដ្ឋបាលរបស់លោក និងមិនបន្តឲ្យការវាយប្រហារផ្នែកបច្ចេកវិទ្យានេះ បន្តនៅដោយគ្មាន«ការឆ្លើយតប» ដោយលោកបានលើកឡើង ពីវិធានការដ៏ចាំបាច់ ដើម្បីវាយបកទៅលើអ្នកទទួលខុសត្រូវ ចំពោះទង្វើខាងលើ។ លោកប្រធានាធិបតីជាប់ឆ្នោត បានបន្តថា៖
«ការវាយប្រហារនេះ បានកើតឡើងឡើង ក្រោមការឃ្លាំមើល របស់លោក ដូណាល់ ត្រាំ តែលោកមិនបានអើពើ យកភ្នែកមើលទេ។»
លោក បៃដិន លើកឡើងថា ការបំពាក់ប្រព័ន្ធសុវត្ថិភាព ចំពោះលំហអ៊ិនធើណែត សម្រាប់ភ្នាក់ងាររដ្ឋាភិបាល អាចនឹងត្រូវចំណាយប្រាក់ រាប់ពាន់លានដុល្លារ។ លោករៀបរាប់ទៀតថា៖
«ខ្ញុំនឹងធ្វើរឿងណា ដែលចាំបាច់ ក្នុងនោះទី១ កំណត់ទំហំនៃការខូចខាត ទី២ តើវាកើតឡើងរបៀបណា និងទី៣ គឺអ្វីដែលខ្ញុំត្រូវធ្វើ នៅក្នុងផ្ទៃក្នុងនៃរដ្ឋបាលរបស់ខ្ញុំ ដើម្បីការពារលំហអ៊ិនធើណែត នាពេលអនាគត។»
ក្នុងពេលកន្លងមក លោក ដូណាល់ ត្រាំ បានព្យាយាមកាត់បន្ថយ អំពីទំហំនៃការវាយប្រហារតាមអ៊ិនធើណែត ក៏ដូចជាទំហំ នៃការទទួលខុសត្រូវរបស់ប្រទេសរ៉ុស្ស៊ី នៅក្នុងសង្គ្រាមមួយនេះ។ ផ្ទុយទៅវិញ លោក«Bill Barr» រដ្ឋមន្ត្រីយុត្តិធម៌ ដែលកំពុងត្រៀមចាកចេញពីរដ្ឋាភិបាល បាននិយាយកាលពីថ្ងៃចន្ទ បញ្ច្រាសពីលោក ដូណាល់ ត្រាំ ដោយអះអាងថា ក្រុងមូស្គូពិតជានៅពីក្រោយសកម្មភាពទាំងនោះ៕