មានកំហុសពីបទ«ខ្វះការទទួលខុសត្រូវ» និង«ភូតភរ» រហូតត្រូវលោកនាយករដ្ឋមន្ត្រី ហ៊ុន សែន បរិហារជាសាធារណៈ តែលោក ញឹម វណ្ណដា នៅតែមានតំណែង នៅក្នុងរដ្ឋាភិបាលលោក ហ៊ុន សែន ដដែលនៅឡើយ ដោយគ្រាន់តែប្ដូរ ពីអង្គុយក្នុងតំណែងជាអនុប្រធានទី១ នៃគណៈកម្មាធិការជាតិ គ្រប់គ្រងគ្រោះមហន្តរាយ (គ.ជ.គ.ម) ទៅអង្គុយនៅកន្លែងថ្មីប៉ុណ្ណោះ។
នេះ បើតាមព្រះរាជក្រឹត្យចំនួនពីរ ចុះព្រះហស្ថលេខា ដោយព្រះមហាក្សត្រ តាមសំណើររបស់លោក ហ៊ុន សែន នៅថ្ងៃទី២៤ ខែមិថុនា ឆ្នាំ២០១៩។ ព្រះរាជក្រឹត្យមួយ បានចែងដកលោក ញឹម វណ្ណដា ចេញពីតំណែងទេសរដ្ឋមន្រ្តី ទទួលបន្ទុកបេសកកម្មពិសេស ខណៈព្រះរាជក្រឹត្យមួយទៀត បានតែងតាំងលោក ញឹម វណ្ណដា ជាទីប្រឹក្សារដ្ឋាភិបាល ដែលមានឋានៈស្មើទេសរដ្ឋមន្រ្តី។
ដូច្នេះ លោក ញឹម វណ្ណដា មិនមានឋានានុក្រមជាទេសរដ្ឋមន្រ្តីទៀតទេ ប៉ុន្តែតំណែងថ្មី ជាទីប្រឹក្សារដ្ឋាភិបាល ធ្វើឲ្យលោក មានឋានៈស្មើទេសរដ្ឋមន្រ្តី។
កាលពីប៉ុន្មានម៉ោងមុន លោក ហ៊ុន សែន ដែលជាប្រធាន «គ.ជ.គ.ម» បានបង្ហោះសារ នៅលើទំព័រហ្វេសប៊ុករបស់លោក អះអាងថា លោកសម្រេចដកលោក ញឹម វណ្ណដា ចេញពីតំណែង ដោយសារមន្ត្រីជាន់ខ្ពស់រូបនេះ «ខ្វះការទទួលខុសត្រូវ» និង«ភូតភរ» ពាក់ព័ន្ធនឹងហេតុការណ៍ រលំបាក់អគារកំពស់៧ជាន់ ដែលសាងសង់ដោយក្រុមហ៊ុនចិន នៅខេត្តព្រះសីហនុ កាលពីព្រឹកថ្ងៃសៅរ៍កន្លងមក។
បុរសខ្លាំងកម្ពុជា បានសរសេរថា៖
«ថ្ងៃនេះ ខ្ញុំបានសម្រេចចិត្ត ដកឯកឧត្តម ញឹម វណ្ណដា ចេញពីតំណែង ជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ដោយមូលហេតុ ខ្វះការទទួលខុសត្រូវ និងភូតភរ។»
សម្រាប់អ្នកវិភាគនយោបាយ និងសង្គម លោកបណ្ឌិត មាស នី បានសំដែងចំងល់ នៅចំពោះការផ្លាស់ប្ដូរតំណែង ដ៏អស្ចារ្យខាងលើ។ លោកបានលើកឡើង ដោយមិនចំឈ្មោះ ថា តើការតែងតាំងរបៀបនេះ មានន័យថាម៉េច? ឬត្រូវហៅថា ជាមន្ត្រី«កុហកជាន់ខ្ពស់»?
តេីមាន័យថាម៉េច បេីដកដំណែង ថាដោយសារកុហក រួចតែងតាំង ឫបញ្ជូនអោយទៅធ្វេីជាទីប្រឹក្សាវិញ ។ តិចចុងបញ្ចប់ វានិងក្លាយជាមានមន្រ្តីកុហកជាន់ទាប និងមន្រ្តីកុហកជាន់ខ្ពស់ទៀតទៅ? ? ? ?
Posted by Meas Nee on Monday, June 24, 2019