គ្មានទេដំណើរ ឆ្ពោះទៅកាន់តំណែងជានាយករដ្ឋមន្ត្រី របស់លោក ស ខេង និងលោក ទៀ បាញ់ ដោយហេតុថា ទម្រាំលោកនាយករដ្ឋមន្ត្រី ហ៊ុន សែន ចាកចេញពីអំណាច អស់លោកទាំងពីរនាក់ មានវ័យជ្រេណាស់ហើយ។ នេះ ជាការលើកឡើងរបស់លោក ហ៊ុន សែន ដោយផ្ទាល់មាត់ ក្នុងថ្ងៃអង្គារទី២៩ ខែធ្នូ ឆ្នាំ២០២០នេះ។
បុរសខ្លាំងនៅកម្ពុជា បានប្រកាសឲ្យដឹង ក្នុងរយៈពេលប៉ុន្មានសប្ដាហ៍ចុងក្រោយ ពីបេក្ខភាពនាយករដ្ឋមន្ត្រី របស់គណបក្សប្រជាជន ចំនួនពីរនាក់ គឺលោក ហ៊ុន ម៉ាណែត ដែលជាកូនប្រុសច្បង និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលធ្លាប់ជាជំនួយការផ្ទាល់ របស់លោក។
ការប្រកាសពីបេក្ខភាព ដែលសុទ្ធសឹងជាសាច់ឈាម និងជាមនុស្សជំនិតរបស់លោកខាងលើ បានបង្កចំងល់សម្រាប់បណ្ដាអ្នកឃ្លាំមើលបញ្ហានយោបាយ និងសង្គម នៅកម្ពុជា ដោយពួកគេលើកឡើងថា ហេតុអ្វីក៏គ្មានបេក្ខភាព របស់លោក ស ខេង រដ្ឋមន្ត្រីមហាផ្ទៃ និងលោក ទៀ បាញ់ រដ្ឋមន្ត្រីការពារជាតិ?
តបនឹងចំងល់ទាំងនេះ ចម្លើយមិនពិបាករកទេ សម្រាប់លោក ហ៊ុន សែន ព្រោះទម្រាំបុរសខ្លាំងរូបនេះ ឆ្អែតឆ្អន់នឹងអំណាច ដែលលោកអង្គុយ តាំងពីឆ្នាំ១៩៨៥ និងត្រៀមបន្តអង្គុយ រហូតដល់ឆ្នាំ២០២៨នោះ រដ្ឋមន្ត្រីចាស់វស្សាទាំងពីរនាក់ មានវ័យជ្រេណាស់ហើយ។
ថ្លែងចេញពីគេហដ្ឋានរបស់លោក នៅក្រុងតាខ្មៅ ខេត្តកណ្ដាល លោក ហ៊ុន សែន បានប្រកាសដូច្នេះថា៖
«ចុះបើពេលហ្នឹង [ឆ្នាំ២០២៨] ហ៊ុន សែន អាយុ៧៨ឆ្នាំហើយ ស ខេង មិន[ជិត]៨០ ទៀ បាញ់ មិនជិត៩០។ អ៊ីចឹង ឲ្យនៅធ្វើងាប់អីទៀត វាមិនទៅទាំងអស់គ្នាតែម្តង ម៉ាហ្វូងទៅទាំងអស់។ ឧបនាយករដ្ឋមន្ត្រី នៅក្មេងជាងគេ មានតែ អូន ព័ន្ធមុនីរ័ត្ន ទេ។»
នៅឆ្នាំ២០២៨ ឆ្នាំដែលលោក ហ៊ុន សែន ប្រកាសឈប់បន្តតំណែង ជានាយករដ្ឋមន្ត្រីនោះ លោក អូន ព័ន្ធមុនីរត្ន នឹងមានអាយុ ៦៣ឆ្នាំ ដែលជាអាយុមិនក្មេងណាស់ណា ដែលខុសពីលោក ហ៊ុន ម៉ាណែត កូនប្រុសច្បងរបស់លោក ហ៊ុន សែន ដែលនឹងមានអាយុ ត្រឹមតែ៥១ឆ្នាំប៉ុណ្ណោះ។
បេក្ខភាពរបស់លោក អូន ព័ន្ធមុនីរ័ត្ន ត្រូវបានក្រុមអ្នកវិភាគពន្យល់ថា គ្រាន់តែជាឆាកកំដរមួយ ដើម្បីឲ្យការបន្តតំណែងពីលោក ហ៊ុន សែន ដោយកូនប្រុសរបស់លោកគឺលោក ហ៊ុន ម៉ាណែត មានភាពល្អមើលប៉ុណ្ណោះ។
អ្នកវិភាគខ្លះពន្យល់ទៀតថា ទោះជានរណា ឡើងធ្វើជានាយករដ្ឋមន្ត្រីក៏ដោយ តែអ្នករុញខ្សែញាក់ពីក្រោយ នៅតែជាលោក ហ៊ុន សែន ដដែលជាដដែល៕