ធនាគារអភិវឌ្ឍអាស៊ី «ADB / BAD» បានព្យាករថា កម្ពុជានឹងបាត់បង់ការងារ ប្រមាណជា ៣៩០ ០០០កន្លែង ក្នុងឆ្នាំ២០២០នេះ បណ្ដាលមកពីផលប៉ះពាល់ នៃជំងឺរាតត្បាតកូវីដ-១៩ (Covid-19)។ នេះ បើតាមការអះអាងឡើង របស់អ្នកស្រី «Sunniya Durrani-Jamal» នាយិកាស្ថាប័នអន្តរជាតិមួយនេះ ប្រចាំនៅកម្ពុជា។
ADB កាលពីពុធសប្ដាហ៍មុន ធនាគារមួយនេះ បានអនុម័តប្រាក់កម្ចី ចំនួន ២៥០ លានដុល្លារ សម្រាប់កម្ពុជា ចំពោះគម្រោងឆ្លើយតប ទៅនឹងការរាតត្បាតសកល នៃជំងឺកូវីដ-១៩ និងការស្ដារសេដ្ឋកិច្ចឡើងវិញ។
ក្នុងកិច្ចសម្ភាសន៍ជាមួយភ្នំពេញប៉ុស្តិ៍ ក្នុងសប្ដាហ៍នេះ អ្នកស្រីនាយិកា «Sunniya Durrani-Jamal» បានអះអាងថា កម្ចីសម្បទាននេះ នឹងមានរយៈពេល ២៤ ឆ្នាំ បូករួមទាំងរយៈពេលអនុគ្រោះ ៨ ឆ្នាំ។ កម្ចីនេះនឹងមានអត្រាការប្រាក់ ១ភាគរយក្នុង ១ឆ្នាំក្នុងរយៈពេលអនុគ្រោះ និងមានអត្រា ១,៥ភាគរយ នៅដំណាក់កាលបន្ទាប់។
បន្ថែមពីលើកម្ចីខាងលើនេះ ធនាគារអភិវឌ្ឍអាស៊ី នឹងផ្ដល់ជំនួយឥតសំណង ដល់កម្ពុជា ក៏ដូចជាជំនួយបច្ចេកទេស សម្រាប់កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះ ក្នុងកម្រិតទឹកប្រាក់ ៥ លានដុល្លារ ក្រោមក្របខណ្ឌ នៃកម្មវិធីប្រឹក្សាគោលនយោបាយ សម្រាប់ស្ដារសេដ្ឋកិច្ចឡើងវិញ ពីវិបត្តិកូវីដ១៩។
អ្នកស្រីត្រូវបានស្រង់សំដី មកផ្សាយថា៖
«កម្ពុជាកំពុងជួបនឹងបញ្ហាប្រឈម ដែលមិនធ្លាប់មាន បង្កដោយកូវីដ ១៩។ ដំណើរធ្លាក់ចុះ នៃសេដ្ឋកិច្ចនៅកម្ពុជា នឹងដាក់សម្ពាធលើពលរដ្ឋក្រីក្រ និងងាយរងគ្រោះ ហើយ ធនាគារអភិវឌ្ឍអាស៊ី ប៉ាន់ប្រមាណថា កូវីដ ១៩ នឹងនាំដល់ការបាត់បង់ការងារ ចំនួន ៣៩០ ០០០កន្លែង នៅឆ្នាំ ២០២០ នេះ។»
គ្រាន់តែក្នុងវិស័យកាត់ដេរមួយ វិបត្តិជំងឺរាតត្បាត «Covid-19»បានធ្វើឲ្យរោងចក្រ ប្រមាណ៤០០រោងចក្រ នៅកម្ពុជា បានបិទទ្វា ហើយបានបាត់បង់ការងារ ប្រមាណជា ១៥០ ០០០ការងាររួចហើយ។ នេះ បើតាមសេចក្ដីថ្លែងការណ៍មួយ របស់រោងចក្រកាត់ដេរនៅកម្ពុជា ហៅកាត់ថា «GMAC» ដែលចេញផ្សាយ កាលពីថ្ងៃទី៨ ខែកក្កដា។
តែតួលេខខាងលើ នៅមិនទាន់បញ្ចប់នៅឡើយ ដោយសមាគមដែលតំណាងឲ្យក្រុមថៅកែរោងចក្រ នៅកម្ពុជាមួយនេះ បានព្រមានបន្តថា វិបត្តិ «Covid-19» កំពុងធ្វើឲ្យរោងចក្រជាច្រើន និងកម្មកររាប់ម៉ឺននាក់បន្ថែមទៀត កំពុងស្ថិតក្នុងហនិភ័យ៕