ក្នុងរដ្ឋ«Karnataka» (ភាគខាងត្បូងឥណ្ឌា) បុរសម្នាក់អាយុ២៧ឆ្នាំ ដែលត្រូវបានគ្រូពេទ្យ ប្រកាសថាស្លាប់ បន្ទាប់ពីបានរងរបួសធ្ងន់ធ្ងរ នៅក្នុងគ្រោះថ្នាក់ដួលម៉ូតូ បានភ្ញាក់ដឹងខ្លួនមកវិញ នៅខណៈពេលសាកសព ត្រូវបានយកទៅធ្វើកោសល្យវិច្ច័យ។ នេះ បើតាមមន្ត្រីសុខាភិបាលឥណ្ឌា ដែលត្រូវបានស្រង់សំដី ដោយទីភ្នាក់ងារសារព័ត៌មានបារាំង «AFP»។
បុរសខាងលើ ដែលជាអ្នករស់នៅក្រុង «Mahalingapur» ត្រូវបានដឹកបញ្ជូនជាបន្ទាន់ ទៅកាន់មន្ទីរពេទ្យឯកជនមួយកន្លែង កាលពីចុងសប្ដាហ៍មុន។ តែនៅពេលដឹកទៅដល់ទីនោះ ក្រុមគ្រូពេទ្យបានប្រកាសថា បុរសបានផុតដង្ហើម និងស្លាប់រួចទៅហើយ។
ក្រុមគ្រួសាររបស់បុរស ក៏បានបញ្ជូនសាកសព ទៅកាន់មន្ទីរពេទ្យរដ្ឋមួយផ្សេង ដើម្បីអនុញ្ញាតឲ្យគ្រូពេទ្យធ្វើកោសល្យវិច្ច័យ មុននឹងសាកសព ត្រូវយកទៅបូជា (ឬបញ្ចុះ)។ នៅមុនពេលចាប់ផ្ដើមការវះកាត់សព ស្រាប់តែមន្ត្រីពេទ្យឃើញរាងកាយបុរស បានកម្រើកឡើង។
មន្ត្រីសុខាភិបាលប្រចាំតំបន់ បានប្រាប់ទីភ្នាក់ងារសារព័ត៌មានបារាំងថា បុរសខាងលើត្រូវបានបញ្ជូនចេញ ពីមន្ទីរធ្វើកោសល្យវិច្ច័យ ទៅសម្រាកព្យាបាល នៅក្នុងមន្ទីរពេទ្យមួយទៀត។ មកដល់ពេលនេះ ស្ថានភាពសុខភាពរបស់បុរស មានភាពប្រសើរឡើងហើយ។
មន្ត្រីដដែលបានទទួលស្គាល់ថា ក្រុមគ្រូពេទ្យនៅក្នុងមន្ទីរពេទ្យឯកជន បានធ្វើការវិន្និច្ឆ័យមិនត្រឹមត្រូវ ក្នុងការប្រកាសមរណភាពរបស់បុរស។ ហើយគឺក្រុមគ្រួសាររបស់បុរសរងគ្រោះ ដែលត្រូវដាក់បណ្ដឹង ទៅកាន់តុលាការ ជុំវិញភាពខ្ជីខ្ជាររបស់ក្រុមគ្រូពេទ្យទាំងនោះ៕