រូបសញ្ញារបស់ក្រុមហ៊ុន «Huawei» នៃប្រទេសចិន នៅចំពោះបច្ចេកវិទ្យាថ្មី «» សម្រាប់ប្រព័ន្ធទូរស័ព្ទដៃ។ (រូបថតផ្តិតពីអេក្រង់)
ក្រោមវិធានការការពារសន្តិសុខជាតិ ប្រទេសស៊ុយអែត បានសម្រេចធ្វើការហាមឃាត់ នូវរាល់សម្ភារៈបរិក្ខា របស់ក្រុមហ៊ុនចិនចំនួនពីរ គឺក្រុមហ៊ុន «Huawei»និង«ZTE» សម្រាប់បំពាក់លើបច្ចេកវិទ្យាថ្មី «5G» នៃសេវាកម្មទូរស័ព្ទដៃ។ នេះ បើតាមការប្រកាស របស់អាជ្ញាធរជាតិ ទទួលបន្ទុកទូរគមនាគម។
មិនត្រឹមតែសម្ភារៈថ្មីៗទេ តែបើសូម្បីសម្ភារៈបរិក្ខាចាស់ ដែលត្រូវបានបំពាក់រួចហើយ ក៏នឹងត្រូវដកចេញទាំងអស់ និងទាំងស្រុង ចាប់ពីពេលនេះ រហូតដល់ថ្ងៃទី១ ខែមករា ឆ្នាំ២០២១ខាងមុខ។
ការហាមឃាត់នេះ ជាការអនុវត្តច្បាប់ថ្មី ដែលទើបនឹងត្រូវបានអនុម័ត កាលពីដើមឆ្នាំ២០២០ ដោយផ្អែកទៅលើរបាយការណ៍ វាយតម្លៃ របស់កងទ័ព និងស្ថាប័នចារកម្ម របស់ប្រទេសស៊ុយអែត។
អាជ្ញាធរជាតិ ទទួលបន្ទុកទូរគមនាគម បានពន្យល់ក្នុងសេចក្ដីប្រកាសព័ត៌មាន របស់ខ្លួនថា៖
«ការហាមឃាត់នេះមានគោលបំណង ដើម្បីធានា ចំពោះការប្រើប្រាស់បច្ចេកវិទ្យាថ្មី ថានឹងមិនបង្កគ្រោះថ្នាក់ ដល់សន្តិសុខជាតិ របស់ប្រទេសស៊ុយអែត៕»