ជាដំណឹងដែលបានបញ្ចេញឲ្យដឹង តាំងពីច្រើនថ្ងៃហើយ នៅឡើយតែការប្រកាសចេញជាផ្លូវការប៉ុណ្ណោះ។ លោក ហ្សីណាឌីន ហ្សីដាន (Zinédine Zidane) លែងជាគ្រូបង្វឹករបស់ក្រុម រៀលម៉ាឌ្រីដ (Real Madrid) ទៀតហើយ។ នេះបើតាមសេចក្ដីប្រកាសព័ត៌មាន របស់ក្រុមអធិរាជអាវស កាលពីប៉ុន្មាននាទីមុន (ព្រឹកថ្ងៃព្រហស្បត្តិ៍ទី២៧ ខែឧសភា ឆ្នាំ២០២១)។
លោក ហ្សីដាន បានប្រកាសប្រាប់ក្រុមកីឡាករ តាំងពីល្ងាចថ្ងៃពុធម្សិលម៉ិញ អំពីការសម្រេចរបស់លោក មុននឹងជួបជាមួយនាយកក្រុម រៀលម៉ាឌ្រីត លោក«Florentino Pérez» នៅព្រឹកថ្ងៃព្រហស្បត្តិ៍នេះ។ ការលាឈប់របស់លោក ធ្វើឡើងមុនការកំណត់ នៅក្នុងកិច្ចសន្យា ដែលនឹងត្រូវបញ្ចប់ នៅចុងរដូវកាលក្រោយ(២០២២)។
ក្នុងរដូវកាលនេះ(២០២០-២០២១) ក្រុមអធិរាជអាវស មិនទទួលបានជោគជ័យ នៅក្នុងក្របខណ្ឌណាមួយទេ។ ក្រុម រៀល បានបញ្ចប់រដូវកាល ដោយទទួលបានចំណាត់ថ្នាក់ទី២ ក្នុងក្របខណ្ឌ«La Liga» បន្ទាប់ពីត្រូវបានជំរុះចេញ ពីក្របខណ្ឌ«Champions League» ដោយក្រុម តោខៀវអង់គ្លេស«Chelsea» នៅត្រឹមវគ្គពាក់កណ្ដាលផ្ដាច់ព្រ័ត្រ កាលពីខែមេសាកន្លងមក។
គ្រូបង្វឹកជាតិបារាំងរូបនេះ បានមកបង្វឹកក្រុមរៀលម្ដងហើយ រវាងពីឆ្នាំ២០១៦ មកទល់នឹងឆ្នាំ២០១៨។ នៅខែមីនា ឆ្នាំ២០១៩ លោក ហ្សីដាន បានវិលត្រឡប់មកបង្វឹកក្រុមនេះជាថ្មី និងរកជ័យជំនះរបស់ក្រុម នៅឆ្នាំបន្ទាប់មក ក្នុងក្របខណ្ឌ«La Liga» និងក្របខណ្ឌ«Supercoupe» របស់ប្រទេសអេស្ប៉ាញ។
សម្រាប់ក្រុមរៀលវិញ នៅមិនទាន់ប្រកាសឲ្យដឹង អំពីអនាគតគ្រូបង្វឹកថ្មីរបស់ខ្លួននៅឡើយ។ ប្រព័ន្ធផ្សព្វផ្សាយនៅក្នុងទ្វីបអ៊ឺរ៉ុបបានបង្ហើបថា លោក អង់តូនីញ៉ូ កុងតេ (Antonio Conte) ជាតិអ៊ីតាលី ដែលទើបនឹងចេញពីក្រុម អ៊ិនធើមីឡង់ (Inter Milan) ទំនងជាមកស្នងតំណែង ជាគ្រូបង្វឹកបន្តទៀត។ ប៉ុន្តែលោក«Raul Blanco» អតីតកីឡាកររបស់ក្រុម ក៏អាចមានលទ្ធភាព ត្រូវបានជ្រើសតាំងឲ្យចូលមកបង្វឹកក្រុមអធិរាជអាវសនេះដែរ៕