ក្នុងការចេញប្រកួតជាលើកដំបូង ជាមួយក្រុម ឆែលស៊ី (Chelsea FC – អង់គ្លេស) លោក តូម៉ាស់ ធូហែល (Thomas Tuchel) ដែលទើបត្រូវបានតែងតាំងជាគ្រូបង្វឹក កាលពីថ្ងៃអង្គារម្សិលម៉ិញ (ថ្ងៃទី២៦ ខែមករា) បានទទួលលទ្ធផលត្រឹមស្មើ ០-០ ជាមួយនឹងក្រុម «Wolverhampton» ក្នុងយប់ថ្ងៃពុធនេះ។
បើទោះជាក្នុងការប្រកួតជុំទី២០ នៃការប្រកួតក្របខណ្ឌ «Premier League» នេះ ក្រុមតោខៀវមានប្រៀប ខាងផ្នែកបច្ចេកទេស ទៅលើក្រុម«Wolverhampton»ក្ដី តែក្រុមបាល់ទាត់ ដែលស្ថិតក្រោមការគ្រប់គ្រង១ថ្ងៃ របស់លោក ធូហែល បានរកគន្លឺះមិនបានសោះឡើយ ដើម្បីបំបែករនាំងការពារដ៏រឹងមាំ របស់ក្រុមគូប្រជែង។
មិនត្រឹមតែប៉ុណ្ណឹង ក្រុម«Wolves»ថែមទាំងមានឱកាស ក្នុងការបង្កើតគ្រោះថ្នាក់ សម្រាប់ក្រុម ឆែលស៊ី បានជាច្រើនដងនោះទៀត។
ងាកមកមើលចំណាត់ថ្នាក់វិញ ក្រុមឆែលស៊ី បានឡើងមួយថ្នាក់ (លេខ៨) បើធៀបនឹងម្សិលម់ីញ (លេខ៩) ខណៈក្រុម «Wolverhampton» ទទួលបានចំណាត់ថ្នាក់ លេខ១៣។