ក្ដីសុបិន្ដរបស់ក្រុម វីឡារ៉េអាល (Villarreal – អេស្ប៉ាញ) មានជីវិតត្រឹមតែ៤៥នាទីដំបូង ក្នុងការប្រកួតល់នឹងក្រុម លីវើភូល (Liverpool – ) ប៉ុណ្ណោះ។ ជាការប្រកួតជុំទី២ វគ្គពាក់កណ្ដាលផ្ដាច់ព្រ័ត្រ ដើម្បីដណ្ដើមសំបុត្រ ឡើងទៅទាត់នៅវគ្គផ្ដាច់ព្រ័ត្រ ក្របខណ្ឌ«Champions League» ឆ្នាំ២០២១-២០២២។
សម្រាប់ពាក់កណ្ដាលម៉ោងដំបូង ក្រុមបាល់ទាត់នៃក្រុង «Vila-Rea» ប្រទេសអេស្ប៉ាញ បានរក្សាក្ដីសង្ឃឹមនេះ ដោយវាយសន្ធាប់លើក្រុម លីវើភូល នៅគ្រប់ជ្រុងនៃការប្រកួត។ ជាពិសេស ក្រុមវីឡារ៉េអាល ដែលឈ្នះពាន«Europa League»ឆ្នាំកន្លងទៅ រកបានគ្រាប់បាល់ តាំងពីនាទីទី៣ នៃការប្រកួត និងរកបានមួយគ្រាប់ទៀត នៅនាទីទី៤១។
តែនៅពាក់ម៉ោងទី២ ក្រុមហង្សក្រហមអង់គ្លេស បានផ្លាស់ប្ដូរកីឡាករ និងក្រឡារបៀបលេងបាល់ ដផយបើកការវាយសន្ធាប់ តបមកក្រុម វីឡារ៉េអាល វិញ។ ជាលទ្ធផល ក្រុមលីវើភូលរកបានគ្រាប់បាល់ ជាបន្តបន្ទាប់ រហូតដល់ទៅបីគ្រាបន់ គឺនៅនាទីទី៦២ នាទីទី៦៧ និងនាទីទី៧៤។
ការប្រកួតជុំទីពីរដែលបានប្រព្រឹត្តិទៅ ក្នុងយប់ថ្ងៃអង្គារនេះ នៅកីឡដ្ឋាន«Estadio de la Cerámica» នៃក្រុង«Vila-real» ប្រទេសអេស្ប៉ាញ បានបញ្ចប់ទៅ ដោយលទ្ធផល២-៣ (ជ័យជំនះរបស់ក្រុម លីវើភូល៌។ បើបូកពិន្ទុទាំងក្នុងការប្រកួតជុំដំបូង កាលពីសប្ដាហ៍មុនផង ក្រុម វីឡារ៉េអាល រកបានត្រឹមតែ២គ្រាប់ ខណៈក្រុម លីវើភូល រកបានគ្រាប់បាល់ រហូតដល់៥គ្រាប់។
យ៉ាងណា ក្រុម វីឡារ៉េអាល មិនបានបាក់មុខអ្វីសោះឡើយ បើគេនិយាយពីទំហំរបស់ក្រុមមួយនេះ និងភាពជោគជ័យក្នុងការប្រកួតកន្លងមក ជាពិសេសក្រុម វីឡារ៉េអាល បានបំបាក់ក្រុម បាយ៉ើន (Bayern Munich – អាល្លឺម៉ង់) យក្សអាល្លឺម៉ង់ នៅក្នុងវគ្គ១ភាគ៤ មុននឹងឡើងមកជួបក្រុម លីវើភូល។
ការប្រកួតផ្ដាច់ព្រ័ត្រ នឹងប្រព្រឹត្តិទៅក្នុងកីឡដ្ឋាន «Stade de France» នៃរដ្ឋធានីប៉ារីស ប្រទេសបារាំង វេលាម៉ោង២១យប់ (ម៉ោងក្នុងស្រុកបារាំង) នៅថ្ងៃសៅរ៍ ទី២០ ខែឧសភាខាងមុខ។ ក្រុមហង្សក្រហមអង់គ្លេស ដែលឈ្នះសំបុត្រដំបូងគេនេះ ត្រូវរង់ចាំលទ្ធផល នៃការប្រកួតរវាងក្រុម វៀល (Real Madrid – អេស្ប៉ាញ) និងក្រុម មេនស៊ីធី (Manchester City – អង់គ្លេស) នៅយប់ថ្ងៃពុធស្អែក ដើម្បីដឹងពីគូប្រកួតរបស់ខ្លួន៕