សហគ្រាស«AstraZeneca»នៃចក្រភពអង់គ្លេស បានចេញមុខ មកការពារវ៉ាក់សាំងរបស់ខ្លួន ដោយអះអាងថា គ្មានភស្ដុតាងណាមួយ បង្ហាញពីហនិភ័យធ្ងន់ធ្ងរ បង្កឲ្យមានជំងឺ«ឈាមកក» សម្រាប់អ្នកដែលបានទទួលវ៉ាក់សាំងនោះឡើយ។ ប្រតិកម្មរបស់សហគ្រាសផលិតឱសថ ធ្វើឡើងបន្ទាប់ពីប្រទេសជាច្រើន ទាំងក្នុងសហភាពអ៊ឺរ៉ុប និងនៅទ្វីបអាស៊ី បានសម្រេចផ្អាកការប្រើវ៉ាក់សាំង «AstraZeneca» ក្នុងសប្ដាហ៍នេះ។
សេចក្ដីប្រកាសព័ត៌មាន របស់សហគ្រាស «AstraZeneca» បានសរសេរឲ្យដឹងថា៖
«នៅលើការវិភាគ នៃទិន្នន័យសុវត្ថិភាព ដែលទទួលបានជាង១០លានករណី យើងមិនបានរកឃើញភស្តុតាង នៃការកើនឡើងនូវហានិភ័យ ដែលអាចបង្កឲ្យមានជំងឺ ស្ទះសរសៃឈាមក្នុងសួត ឬដុំសាច់នៅក្នុងសួតនោះទេ។»
«បើនិយាយឲ្យស៊ីជម្រៅ តួលេខដែលទទួលបាន ទាក់ទងនឹងបញ្ហាប្រភេទនេះ មានកម្រិតទាបបំផុត ចំពោះអ្នកដែលទទួលបានការចាក់វ៉ាក់សាំង បើធៀបទៅនឹងអ្វីដែលបានរំពឹងទុក នៅក្នុងចំនួនប្រជាជនទាំងមូល។»
កាលពីថ្ងៃព្រហស្បត្តិ៍ទី១១ ខែមីនា ប្រទេសដាណឺម៉ាក អាយឡេន និងណ័រវេស បានប្រកាសផ្អាកការចាក់ថ្នាំវ៉ាក់សាំង «AstraZeneca» ដោយអះអាងថា វាជា«គោលការណ៍នៃការប្រុងប្រយ័ត្ន»។ បន្ទាប់មក នៅថ្ងៃសុក្រទី១២ ខែមីនា ប្រទេសប៊ុលហ្គារី ក៏បានធ្វើដូចគ្នា ខណៈប្រទេសថៃ បានប្រកាសពន្យាពេលយុទ្ធនាការចាក់វ៉ាក់សាំង ដែលប្រើថ្នាំវ៉ាក់សាំងខាងលើ។
សម្រាប់អង្គការសុខភាពពិភពលោក (WHO /OMS) ដែលបានប្រកាសទទួសស្គាល់វ៉ាក់សាំងបង្ការជំងឺកូវីដ-១៩ (Covid-19) របស់សហគ្រាស«AstraZeneca» បានលើកឡើងកាលពីថ្ងៃសុក្រថា គ្មានហេតុផលណាមួយ ដែលតម្រូវមិនឲ្យប្រើវ៉ាក់សាំងនេះ ហើយមកដល់ពេលនេះ មិនទាន់មានការពាក់ព័ន្ធណាមួយ ដែលបង្កឲ្យមានជំងឺ«ឈាមកក» តាមរយៈការចាក់ថ្នាំវ៉ាក់សាំងនេះនៅឡើយ។
ភ្នាក់ងារសុខាភិបាលជាតិ របស់ប្រទេសដាណឺម៉ាក ដែលបានផ្អាកការចាក់វ៉ាក់សាំង «AstraZeneca» មុនគេ បានព្រមានឲ្យប្រុងប្រយ័ត្ន នៅចំពោះការកកើតជំងឺឈាមកក ដែលមានលក្ខណៈធ្ងន់ធ្ងរ ទៅលើមនុស្សដែលបានទទួលចាក់ថ្នាំវ៉ាក់សាំង។ ប៉ុន្តែភ្នាក់ងារជាតិមួយនេះ មិនបានបញ្ជាក់ថា ការកកើតជំងឺឈាមកក មានជាប់ពាក់ព័ន្ធដោយផ្ទាល់ ជាមួយនឹងថ្នាំវ៉ាក់សាំងទេ។
លោក «Jon Gibbins» នាយកវិទ្យាស្ថានស្រាវជ្រាវ ផ្នែកបេះដូង និងប្រព័ន្ធរំលាយអាហារ នៃសាកលវិទ្យាល័យ «Reading» (ចក្រភពអង់គ្លេស) ត្រូវបានសារព័ត៌មានអង់គ្លេស ស្រង់សំដីមកបញ្ជាក់ថា ជំងឺឈាមកក អាចបណ្ដាលមកពីបញ្ហាច្រើនយ៉ាង និងអាចបង្កឲ្យមានអ្នកឈឺ ត្រឹមតែ១ឬ២នាក់ ពីក្នុងចំណោមមនុស្ស១០០០នាក់ប៉ុណ្ណោះ ហើយអាត្រានេះ វាច្រើនលើសពីចំនួនអ្នកសង្ស័យមានជំងឺ (ជាង២០នាក់ ពីក្នុងចំណោមមនុស្សរាប់លាននាក់) ដែលត្រូវបានលើកឡើង ដោយភ្នាក់ងារអ៊ឺរ៉ុបទទួលបន្ទុកឱសថ «EMA»។
លោកនាយកវិទ្យាស្ថានបន្តថា ដូច្នេះហានិភ័យ ដែលអាចកើតជំងឺឈាមកក ទំនងជាមានអាត្រាតិចតួចជាទីបំផុត៕