លោក អ៊ូ ច័ន្ទឫទ្ធិ អតីតតំណាងរាស្ត្រ និងជាប្រធានគណៈកម្មាធិការវិន័យ នៃគណបក្សសង្គ្រោះជាតិ បានចេញលិខិតចំហរមួយ ប្រកាសគាំទ្រលោក សម រង្ស៊ី ឡើងកាន់តំណែង ជាប្រធានស្ដីទីគណបក្ស សម្រាប់កាលៈទេសៈនេះ។ នេះ បើតាមលិខិតមួយរបស់លោក ចុះហត្ថលេខានៅថ្ងៃទី១៩ ខែធ្នូ និងធ្លាក់មកដល់ ដៃអ្នកសារព័ត៌មាន កាលពីម្សិលម៉ិញ។
លោក អ៊ូ ច័ន្ទឫទ្ធិ ដែលគេស្គាល់ថា ជាមន្ត្រីកូតាមកពីគណបក្សសិទ្ធិមនុស្ស និងស្និតនឹងលោក កឹម សុខា ប្រធានគណបក្សសង្គ្រោះជាតិនោះ បានសរសេរ នៅក្នុងលិខិតចំហរនោះថា លោកគាំទ្រចំពោះការផ្ដួចផ្ដើមគំនិត របស់សាខាគណបក្សសង្គ្រោះជាតិ ឯនាយសមុទ្រ ក្នុងការបង្កើតក្បាលម៉ាស៊ីនដឹកនាំគណបក្ស ជាបណ្ដោះអាសន្ន នៅរយៈពេលអន្តរកាល ដឹកនាំដោយលោក សម រង្ស៊ី។
មន្ត្រីជាន់ខ្ពស់គណបក្សប្រឆាំងរូបនេះ បានហៅលោក សម រង្ស៊ី ថាជា«ឥស្សរជន ដែលមានសក្ដានុពល ហើយ[ត្រូវបាន]សាធារណមតិជាតិ និងអន្តរជាតិ ទទួលស្គាល់ថា ជាថ្នាក់ដឹកនាំកំពូល របស់គណបក្សសង្គ្រោះជាតិ ដោយយោងលើកត្តាប្រវត្តិសាស្ត្រ និងកត្តាប្រជាប្រិយភាព»។
ជំហររបស់លោក អ៊ូ ច័ន្ទឫទ្ធិ មានសភាពផ្ទុយគ្នា ទៅនឹងបងប្រុសរបស់លោក គឺលោក អ៊ូ ច័ន្ទរ័ត្ន ក៏ដូចជាអតីតតំណាងរាស្ត្រ មួយចំនួនទៀត ដែលបានសំដែងការមិនខ្វាយខ្វល់ ចំពោះការផ្ដួចផ្ដើមគំនិត ក្នុងការបង្កើតក្បាលម៉ាស៊ីនគណបក្ស ជាបណ្ដោះអាសន្ននេះទេ។ លោក អ៊ូ ច័ន្ទរ័ត្ន បានប្រកាសប្រាប់សារព័ត៌មានក្នុងស្រុក កាលពីម្សិលម៉ិញថា លោកនឹងចូលធ្វើនយោបាយវិញ បើទោះជាគ្មានវត្តមាន របស់លោក សម រង្ស៊ី នៅក្នុងដំណោះស្រាយនយោបាយ នោះក៏ដោយ។
លោក ច័ន្ទរ័ត្ន បានបញ្ជាក់ថា៖
«បើទោះបីលោកប្រធាន សម រង្ស៊ី មិនបានចូលរួម ក្នុងនយោបាយក៏ដោយ ឲ្យតែមានដំណោះស្រាយ ចំពោះគណបក្សសង្គ្រោះជាតិ ដែលចាប់ផ្តើមមានវិបត្តិនោះ ដូចជាការចាប់ខ្លួនលោកប្រធាន កឹម សុខា បានដកសិទ្ធិ ១១៨រូប រំលាយសង្គ្រោះជាតិ ដកហូតតំណែងឃុំ-សង្កាត់ក្តីហ្នឹង។»
យ៉ាងណា ប្អូនប្រុសរបស់លោក គឺលោក អ៊ូ ច័ន្ទឫទ្ធិ បានថ្លែងអំពាវនាវជាថ្មី ឲ្យមានការរួមរួម នៅជុំវិញគណបក្សសង្គ្រោះជាតិ ដែលមានលោក សម រង្ស៊ី និងលោក កឹម សុខា ជា«សហស្ថាបនិក» ក្រោមគោលការណ៍ «សម រង្ស៊ី – កឹម សុខា ជាមនុស្សតែមួយ»៕