ការរំលើកម្ដងហើយ ម្ដងទៀត ពីគុណូបការៈ នៃប្រទេសវៀតណាម ចំពោះទង្វើ ដែលត្រូវបានហៅថា ជា«ការរំដោះ» ប្រជាជនកម្ពុជា ពីរបបវាលពិឃាត ខ្មែរក្រហមនោះ វាជារឿងមួយ។ ហើយសម្រាប់ការគោរពដឹងគុណ ពីសំណាក់គណបក្សប្រជាជនកម្ពុជា ចំពោះគណបក្សកុម្មុយនីស្ដិ៍វៀតណាម ដែលធ្លាប់មានចំណងមេត្រីភាព តាំងពីជាង៦០ឆ្នាំមកនោះ ជារឿងមួយទៀត។
តែរឿង ដែលមានសារៈសំខាន់ដូចគ្នានោះ គឺប្រទេសកម្ពុជា ក៏ធ្លាប់មានគុណ ចំពោះប្រទេសវៀតណាមដែរ។
លោក មាស នី អ្នកវិភាគផ្នែកសង្គម និងនយោបាយ បានលើកឡើងថា នោះជាអ្វី ដែលពលរដ្ឋកម្ពុជា ចង់ឮនិងចង់ឃើញ ឲ្យមានការដឹងគុណ ពីសំណាក់ប្រទេសវៀតណាម ចំពោះប្រទេសកម្ពុជា ដែលបានអនុញ្ញាត ឲ្យកងទ័ពវៀតណាមខាងជើង ប្រើប្រាស់ទឹកដីខ្លួន ដើម្បីវាយរំដោះ វៀតណាមខាងត្បូង។
លោកបណ្ឌិត បានសរសេរ នៅលើបណ្ដាញសង្កមថា៖
«ការដឹងគុណវៀតណាម វាជាកាតព្វកិច្ច របស់គណបក្សនយោបាយ ដែលបានទទួលការបីបាច់ថែរក្សា និងទំនាក់ទំនងគ្នា អស់រយះកាល ជាង៦០ឆ្នាំកន្លងមក។»
«តែអ្វីដែលពលរដ្ឋខ្មែរចង់ឮ គឺការបង្ហាញ នូវការដឹងគុណរបស់វៀតណាម ចំពោះការជួយជ្រោមជ្រែង របស់កម្ពុជា កាលពីចុងទស្សវត្ស ១៩៦០ ដែលវៀតណាមខាងជេីង បានត្រូវកម្ពុជាអនុញ្ញាត អោយប្រេីប្រាស់ទឹកដីខ្មែរ ធ្វេីជាមូលដ្ឋានទ័ពវៀតកុង ដេីម្បីវាយរំដោះ វៀតណាមខាងត្បូង បានរហូតមកទល់សព្វថ្ងៃ។»
លោកបន្តថា៖
«យេីងគួររំលឹកប្រវត្តិសាស្រ្ត ផ្នែកត្រង់នេះបន្តិច ឡេីងវិញផង បេីមិនដូច្នោះ ខ្មែរនឹងនៅតែអរគុណវៀតណាមរហូត ក្នុងខណះដែលវៀតណាម និងអ្នកនយោបាយខ្មែរ មិនដែលលេីកឡេីង ពីការដឹងគុណគ្នា វិញទៅមក ដោយស្មេីភាព ក្នុងនាមជាប្រទេសជិតខាង។»៕