ព្រលានយន្ដហោះ «អន្តរជាតិ» ទាំងបីនៅក្នុងប្រទេសកម្ពុជា ទទួលអ្នកដំណើរក្នុងឆ្នាំកន្លងទៅនេះ បានប្រមាណជា១០,៦លាននាក់។ នេះ បើតាមតួលេខផ្ដល់ដោយ «VINCI Airports» សហគ្រាសបារាំង ដែលគ្រប់គ្រង និងធ្វើអាជីវកម្ម ទៅលើព្រលានយន្ដហោះទាំងនោះ។
តួលេខដែលចេញផ្សាយឲ្យដឹង បានអះអាងថា ចំនួនអ្នកដំណើរ ដែលបានឆ្លងកាត់ព្រលានយន្ដហោះអន្តរជាតិ នៃរាជធានីភ្នំពេញ ក្រុងសៀមរាប និងក្រុងព្រះសីហនុ បានកើនឡើង២០១%។ ហើយអ្នកដំណើរ ដែលបង្គ្រប់តួលេខ ១០លាននាក់ដំបូង គឺអ្នកដំណើរដែលបានឆ្លងកាត់ព្រលានយន្ដហោះ នៅថ្ងៃទី១៨ ខែធ្នូ ឆ្នាំ២០១៨។
របាយការណ៍«VINCI Airports»បានឲ្យដឹងថា ព្រលានយន្ដហោះអន្តរជាតិភ្នំពេញ មានអ្នកដំណើរឆ្លងកាត់ប្រមាណជា ៥,៥លាននាក់ កើនឡើង ២៧,៩% បើធៀបនឹងឆ្នាំ២០១៧។ ព្រលានយន្ដហោះក្រុងសៀមរាប មានអ្នកដំណើរឆ្លងកាត់ ៤,៤៨លាននាក់ កើនឡើង ៦,៤% បើធៀបនឹងឆ្នាំកន្លងទៅ។ ចំណែកព្រលានយន្ដហោះក្រុងព្រះសីហនុ ទទួលអ្នកដំណើរបានប្រមាណជា ៦៥១ ០០០នាក់ កើនឡើង៩២,៦% បើធៀបនឹងឆ្នាំមុន។
ចំនួនអ្នកដំណើរ ដែលធ្វើដំណើរតាមព្រលានយន្ដហោះទាំងបី បានកើតឡើងទ្វេដង ក្នុងរយៈពេល៥ឆ្នាំចុងក្រោយ។ ចំនួនអ្នកដំណើរ ដែលកើនឡើងខ្លាំងជាងគេ គឺមកពីប្រទេសថៃ និងចិន។
សហគ្រាស «VINCI Airports» ដែលបានធ្វើអាជីវកម្ម ទៅលើព្រលានយន្ដហោះ ក្នុងប្រទេសកម្ពុជា តាំងពីឆ្នាំ១៩៩៥ បានបន្តអះអាងថា នឹងពង្រីកទុនបន្ថែមទៀត ដើម្បីពង្រីកផ្លូវចុះចត និងជាពិសេស ធ្វើទំនើបកម្មទៅលើព្រលានយន្ដហោះទាំងនេះ។
នាយកផ្នែកទំនាក់ទំនងនៃក្រុមហ៊ុន «Cambodia Airports» (ដៃគូរបស់«VINCI Airports»នៅកម្ពុជា) លោក ខែក នរិនដា បានថ្លែងប្រាប់សារព័ត៌មានក្នុងស្រុកថា ទិសដៅនៃការធ្វើដំណើរមកកាន់ប្រទេសកម្ពុជា រួមមានទាំងទេសចរណ៍ និងការធ្វើជំនួញ គឺជាមូលហេតុសំខាន់ ដែលធ្វើតួលេខកើនឡើងដូច្នេះ។ លោកបន្តថា នេះគឺជាលទ្ធផល នៃយុទ្ធសាស្រ្តរបស់ប្រទេស សម្រាប់ការអភិវឌ្ឍផ្លូវអាកាស និងការតភ្ជាប់ព្រលានយន្តហោះទាំងបីនេះ ទៅកាន់គោលដៅជាច្រើនទៀត៕