លោក «Mohsen Fakhrizadeh» អ្នកប្រាជ្ញជាតិអៀរ៉ង់ ដែលមានជំនាញខាងអាវុធនុយក្លេអ៊ែរ ត្រូវបានសម្លាប់ដោយគ្រាប់កាំភ្លើង ដែល«បញ្ជាពីផ្កាយរណប»។ នេះ បើតាមការអះអាងរបស់រដ្ឋាភិបាលក្រុងតេអៀរ៉ង់ ក្នុងថ្ងៃអាទិត្យទី ៦ ខែធ្នូនេះ។
អ្នកប្រាជ្ញាខាងលើ បានស្លាប់កាលពីថ្ងៃទី២៧ ខែវិច្ឆិកាកន្លងមក នៅខណៈលោកធ្វើដំណើរជាមួយភរិយា លើវិថីល្បឿនលឿនមួយខ្សែ ដែលមានការការពារយ៉ាងម៉ត់ចត់ ពីកងអង្គរក្សរបស់លោក។
របាយការណ៍ចុងក្រោយបំផុត ចេញផ្សាយដោយទីភ្នាក់ងារព័ត៌មានផ្លូវការ «Mehr» ឲ្យដឹងថា របស់ប្រទេសអៀរ៉ង់ បានចាត់ទុកការស្លាប់ របស់លោក «Mohsen Fakhrizadeh» ថាជាការធ្វើឃាត ហើយចោទប្រទេសអ៊ីស្ត្រាអែល និងក្រុមចាត់តាំងនយោបាយឈ្មោះ «Moudjahidine» ថានៅពីក្រោយព្រឹត្តិការណ៍នេះ។
អគ្គមេបញ្ជាការរង នៃឆ្មាំបដិវត្តន៍អៀរ៉ង់ លោក «Ali Fadavi» ត្រូវបានទីភ្នាក់ងារព័ត៌មានស្រង់សំដី មកចុះផ្សាយថា កាំភ្លើងស្វ័យប្រវត្តិ«ទំនើប»មួយគ្រឿង បានតម្រង់មុខអ្នកប្រាជ្ញ ជំនាញខាងនុយក្លេអ៊ែរ ពីចំងាយ ហើយបានបាញ់ចេញគ្រាប់កាំភ្លើង ចំនួន១៣គ្រាប់ តែបាញ់ត្រូវមុខអ្នកប្រាជ្ញ តែ៤គ្រាប់ប៉ុណ្ណោះ។
លោក «Ali Fadavi» បន្តទៀតថា ផ្ទុយទៅវិញ ភរិយាលោក «Mohsen Fakhrizadeh» ដែលអង្គុយចំងាយ២៥សង់ទីម៉ែត្រ ពីរូបលោក មិនបានរងគ្រោះ នឹងការវាយប្រហារ ដោយកាំភ្លើងខាងលើទេ។
លោកមេទ័ពរងបានបន្តថា កាំភ្លើងខាងលើ «បញ្ជាពីផ្កាយរណប» តាមរយៈប្រព័ន្ធអ៊ិនធើណែត និងមានបំពាក់ដោយកាមេរ៉ា «Robot» ដ៏ពិសេស ដើម្បីកំណត់ពីមុខសញ្ញារបស់វា។ បើកាំភ្លើងដ៏ទំនើប ត្រូវបានកងកម្លាំងអៀរ៉ង់រកឃើញ នៅនឹងលើរថយន្ដកាត់កន្ទុយមួយ ដែលចតចោលនោះ តែមិនមានភេរវជនណាម្នាក់ ត្រូវបានចាប់ខ្លួន ក្នុងព្រឹត្តិការណ៍នេះទេ។
ក្នុងពេលភ្លាមៗ នៅក្រោយហេតុការណ៍នោះ លោក «Amir Hatami» រដ្ឋមន្ត្រីការពារជាតិអៀរ៉ង់ បានអះអាងថា លោក «Mohsen Fakhrizadeh» ត្រូវបានសម្លាប់ ដោយការបំផ្ទុះគ្រាប់បែក និងការបាញ់ប្រហារមួយ។
តែការលើកឡើងរបស់ប្រទេសអៀរ៉ង់ ត្រូវបានប្រទេសអ៊ីស្ត្រាអែលទាត់ចោល និងចាត់ទុកថា ករណីខាងលើជាការរៀបចំ«លេស»មួយឡើង ដើម្បីអនុញ្ញាតឲ្យអៀរ៉ង់ អាចវាយប្រហារប្រឆាំងអ៊ីស្ត្រាអែល ឬប្រឆាំងទៅលើផលប្រយោជន៍អ៊ីស្ត្រាអែល នៅជុំវិញពិភពលោក៕