ខណៈប្រទេស ត្រូវបានប្រកាស ឲ្យស្ថិតក្នុងភាពអាសន្ន ដើម្បីទប់ស្កាត់ ការរីករាលដាល នៃមេរោគ «Covid-19» ស្ដេចថៃ រាមា ទី១០ ព្រះបាទ មហា វិជ្ជរាឡុងកន (Maha Vajiralongkorn) ឯណោះ កំពុងតែស្ថិតក្នុងសណ្ឋាគារដ៏ប្រណិតមួយ ជាមួយនឹងស្រីស្នំ២០នាក់ នៅឯប្រទេសអាល្លឺម៉ង់។
របាយការណ៍មួយ របស់សារព័ត៌មានអាល្លឺម៉ង់ «Bild» បង្ហើបឲ្យដឹងថា ព្រះមហាក្សត្រ ដែលរាស្ត្រថៃ តែងចាត់ទុក ជាកំពូលមនុស្ស ពាក់កណ្ដាលអាទិទេព កំពុងសំងំព្រះកាយ គេចចេញពីមេរោគ «Covid-19» ក្នុងសណ្ឋាគារផ្កាយបួនមួយ ឈ្មោះ «Grand Hotel Sonnebichl» ដែលស្ថិតនៅភាគខាងត្បូង នៃប្រទេសអាល្លឺម៉ង់ ជាប់ព្រំដែននៃប្រទេសអូទ្រីស។
សារព័ត៌មានបន្តថា ផ្ទុយពីការដាក់ប្រទេស នៅក្នុងភាពអាសន្ន ខណៈអ្នកស្លាប់ នឹងជំងឺ«Covid-19» កាន់តែកើនឡើងនោះ ព្រះបាទ រាមា ទី១០ ទទួលបាន«ច្បាប់ពិសេស» ដើម្បីគង់នៅក្រៅប្រទេស និងនៅក្នុងសណ្ឋាគារ នៅលើភ្នំ ដ៏ប្រណិតថែមទៀត។
តាមពិតទៅ សណ្ឋាគារខាងលើនេះ ត្រូវបានបង្ខំឲ្យបិទទ្វារ ជាបណ្ដោះអាសន្នរួចហើយ ក្រោមវិធានការទប់ស្កាត់ ការឆ្លងរាលដាលជំងឺខាងលើ។ តែសណ្ឋាគារបានបើកទ្វារយ៉ាងពិសេស ដើម្បីទទួលព្រះមហាក្សត្រថៃ ឲ្យព្រះអង្គគង់នៅ។ សារព័ត៌មាន «Bild» បានស្រង់សំដីអ្នកទទួលខុសត្រូវ ក្នុងក្រុងមួយរូប មកបញ្ជាក់ថា៖
«បើកទ្វារពិសេសទទួលអតិថិជន ក្នុងខណៈមានបម្រាម ពីរដ្ឋាភិបាលអាល្លឺម៉ង់នេះ ដោយហេតុថា អតិថិជនទាំងនេះ ជាក្រុមមនុស្ស ដែលមានប្រភពតែមួយ និងមិនមានទំនាក់ទំនង ចេញក្រៅសណ្ឋាគារ ឬជាមួយនរណាឡើយ។»
ក្រុមមនុស្ស ដែលអ្នកទទួលខុសត្រូវ លើកមកបរិយាយនេះ គឺគ្មាននរណាផ្សេង ក្រៅពីស្ដេចរាមាទី១០ របស់រាជាណាចក្រថៃ និងស្ត្រីស្នំហែហម ក្មេងៗ ចំនួន២០នាក់នោះឡើយ។ ដោយឡែក មន្ត្រីក្រមការផ្សេងទៀត រួមនឹងព្រះមហាក្សត្រីយ៉ានី ស៊ុតធីតា ទិតចៃ (Suthida Tidjai) មិនមានវត្តមាន នៅក្បែរការគង់ប្រថាប់នេះទេ។ សារព័ត៌មានបន្តបង្ហើបទៀតថា ព្រោះមន្ត្រីទាំងនោះ និងព្រះមហាក្សត្រីយ៉ានី បានជាប់សង្ស័យ ថាបានឆ្លងជំងឺ «Covid-19»។
ការបែកធ្លាយ ពីព្រះរាជដំណើរ «យ៉ាងពិសេស» នេះ បានបង្កការក្ដៅក្រហាយមិនតិចទេ នៅក្នុងប្រទេសថៃ ជាពិសេសនៅលើបណ្ដាញសង្គម។ ពួកគេបានបង្ហោះ និងបានចែករំលែកតៗគ្នា នូវ«hashtag»មួយ ដែលមានអត្ថន័យ ជាខេមរភាសាថា #ហេតុអ្វីយើងត្រូវការស្ដេច?
នេះ មិនមែនជាលើកទីមួយទេ ដែលព័ត៌មានប្រភេទនេះ បានចេញផ្សាយ ទាក់ទងនឹងព្រះករុណា ពាក់កណ្ដាលអាទិទេព របស់ប្រទេសថៃ។ ព្រះមហាក្សត្រ ដែលមានព្រះជន្ម ៦៧ព្រះវស្សាអង្គនេះ មានទ្រព្យសម្បត្តិ មិនតិចជាង ៣០ពាន់លានដុល្លារ និងបានរៀបការ ចំនួន៥ដង ក្នុងនោះ រៀបការជាមួយ ប្អូនស្រីជីដូនមួយម្នាក់ សិល្បៈការិនីម្នាក់ អតីតស្ត្រីបម្រើលើយន្ដហោះម្នាក់ និងគិលានុបដ្ឋាកម្នាក់៕