ខេត្ត សាមុតសាខន ដែលស្ថិតនៅភាគនារតី ជាប់រាជធានីបាងកក បានប្រកាសរកឃើញ ករណីឆ្លងជំងឺកូវីដ-១៩ (Covid-19) ចំនួន ៥៤៩ករណី (៥៧៦ករណី ជាតួលេខនៅទូទាំងប្រទេស) ត្រឹមតែមួយថ្ងៃទី១៩ ខែធ្នូនេះ។ តួលេខដែលរកឃើញ បង្ហាញថា ភាគច្រើនលើសលប់ នៃអ្នកជំងឺ សុទ្ធសឹងជាពលករភូមា ដែលចូលទៅធ្វើការ ក្នុងខេត្តនេះ ជាកម្មករនេសាទ។
នៅចំពោះការហក់ឡើងខ្លាំង នៃករណីឆ្លង ដែលមិនធ្លាប់មានពីមុនមក តម្រូវឲ្យអាជ្ញាធរ ប្រកាសបិទខេត្តមួយនេះ ជាលក្ខណៈប្រកាសអាសន្ន និងមានសុពលភាព រហូតដល់ថ្ងៃទី៣ ខែមករា ឆ្នាំ២០២១ខាងមុខ។
អ្នកឆ្លើយឆ្លងព័ត៌មាននៅនឹងកន្លែង បានឲ្យប្រាប់ទស្សនាវដ្ដីមនោរម្យ.អាំងហ្វូ ក្នុងយប់ថ្ងៃសៅរ៍ ទី១៩ ខែធ្នូនេះថា ទិដ្ឋភាពក្នុងខេត្តសាមុតសាខន មានភាពស្ងាត់ខុសធម្មតា ដោយសារអាជ្ញាធរបានបញ្ជា ឲ្យបិទសាលារៀន មជ្ឈមណ្ឌលពាណិជ្ជកម្ម ទីផ្សារ ហាងសំអាងកាយ ឬទីកន្លែងកម្សាន្ដផ្សេងៗ។
ទីផ្សារដែលលក់ទំនិញស្រស់ (ត្រីសាច់ បន្លែ…) ត្រូវបានអនុញ្ញាតិឲ្យបើក សម្រាប់រយៈពេល៦ម៉ោងយូរបំផុត ក្នុងមួយថ្ងៃ ខណៈភោជនីយដ្ឋាន ឬតៀមអាហារ ត្រូវបានអនុញ្ញាត ឲ្យលក់ចំណីអាហារឆ្អិនស្រាប់ ដោយត្រឹមតែការវេចខ្ចប់ យកទៅទទួលទាន នៅផ្ទះប៉ុណ្ណោះ។
រាល់ការផ្លាស់ទី របស់ពលករចំណាកស្រុក (ជាពិសេសជនជាតិភូមា និងខ្មែរ) ត្រូវបានហាមឃាត់ ខណៈការធ្វើដំណើរចេញ-ចូលខេត្តសាមុតសាខន ក៏ត្រូវបានរឹតបន្ដឹងដែរ។
ចំនួនករណីឆ្លង ដែលត្រូវបានរកឃើញខាងលើ ជាករណីមិនធ្លាប់មាន នៅក្នុងប្រទេសថៃ រាប់ពីពេលដែលប្រទេសនេះ បានរកឃើញករណីឆ្លងដំបូង នៅខែមករា ឆ្នាំ២០២០។ ក្នុងពេលកន្លងមក ករណីឆ្លងដែលច្រើនបំផុត ដែលរកឃើញក្នុងមួយថ្ងៃ គឺមានចំនួន ១៨៨ករណី នៅក្នុងខែមីនា ឆ្នាំ២០២០ ពីក្នុងព្រឹត្តិការណ៍ប្រដាល់មួយ កណ្ដាលរាជធានីបាងកក។
ការរកឃើញករណីឆ្លង ជាថ្មីក្នុងថ្ងៃសៅរ៍ ទី១៩ ខែធ្នូនេះ បានធ្វើឲ្យប្រទេសថៃ ក្លាយជាប្រទេស ដែលងាយរងគ្រោះ នឹងជំងឺរាតត្បាដ៏ចង្រៃនេះឡើងវិញ បន្ទាប់ពីករណីឆ្លង បានធ្លាក់ចុះសឹងដល់ចំណុចសូន្យ រាប់ពីខែឧសភានោះមក៕