ព្រោះជំងឺរាតត្បាត កូវីដ-១៩ (Covid-19) រាល់ការប្រកួតទាំងឡាយ ត្រូវបានធ្វើឡើង ក្នុងកីឡដ្ឋាន«ដែលគ្មានទស្សនិកជន ឬអ្នកគាំទ្រ។ នៅជប៉ុន សហគ្រាស«Softbank» មានវិធីដោះស្រាយមួយ ដើម្បីផ្ដល់ជាកម្លាំងចិត្ត ទៅដល់កីឡាករទាំងឡាយ នៅលើទីលានប្រកួត៖ នោះគឺជំនួសបណ្ដាអ្នកគាំទ្រ ដែលអង្គុយនៅលើកៅអីជាថ្នាក់ៗ ដោយ«មនុស្សយន្ដ» ដែលអាចរាំច្រៀងបាន។
ដំណោះស្រាយខាងលើបានធ្វើរួចហើយ នៅក្នុងការប្រកួតវាយបាល់ «Baseball» ជាលក្ខណៈអាជីព (Nippon Professional Baseball) របស់ប្រទេសអាស៊ីខាងកើតមួយនេះ។ ជាពិសេស គំនិតរបស់សហគ្រាស«Softbank» កាន់តែត្រូវយកមកអនុវត្តន៍ ដោយសារតែ សហគ្រាស មានក្រុមវាយបាល់មួយរបស់ខ្លួន ដែលមានឈ្មោះ«Fukuoka SoftBank Hawks» និងដែលត្រូវចូលរួមការប្រកួត ទល់នឹងក្រុមផ្សេងទៀតដែរ។
ក្នុងវីដេអូខាងក្រោម ជាទិដ្ឋភាពនៃមនុស្សយន្ដ«អ្នកគាំទ្រ» នៅក្នុងការប្រកួតរវាងក្រុម«Fukuoka SoftBank Hawks» និងក្រុម«Rakuten Eagles» ដែលបានប្រព្រឹត្តិទៅ ក្នុងពេលកន្លងមក។ ក្រុមមនុស្សយន្ដ«Pepper & Spot»បានច្រៀងនិងរាំ ទៅតាមចង្វាក់ភ្លេង ដែលប្រគុំឡើងក្នុងពេលប្រកួត ជាពិសេសភ្លេងជ័យជំនះ របស់ក្រុម«Fukuoka SoftBank Hawks»ម្ដងៗ៕