អាជ្ញាធរសុខាភិបាល នៃរដ្ឋអូហៃយ៉ូ (Ohio – USA) បានពន្យល់តាមរយៈវីដេអូមួយខាងក្រោម បង្ហាញពីសារសំខាន់ នៃ«គម្លាតសុវត្ថិភាពរវាងគ្នា» ដើម្បីការពារ និងបង្ការការឆ្លងមេរោគ «Covid-19» ដ៏ចង្រៃ។
នោះ គឺជាការប្រៀបធៀប រវាងការនៅជិតគ្នា ឬនៅឆ្ងាយពីគ្នា នៃអង្គប់ដាក់កូនបាល់ និងកូនបាល់មួយគ្រាប់ ដែលបានបំផ្លោងខ្លួន ទៅក្នុងចំណោមអង្គប់ទាំងនោះ។ ហើយករណីនេះ មិនពិបាកពន្យល់ច្រើនឡើយ ក្នុងការបញ្ជាក់ថា «គម្លាតសុវត្ថិភាពរវាងគ្នា» នៃបណ្ដាអង្គប់ទាំងនោះ អនុញ្ញាតឲ្យកូនបាល់ អាចលោតផុត និងមិនបានប៉ះអង្គប់ សូម្បីតែមួយឡើយ។
វីដេអូខ្លី ដែលមានរយៈពេលត្រឹមតែ៣០វិនាទី បានទទួលការចុចចូលទស្សនា ជាង២០លានដងហើយ នៅលើបណ្ដាញសង្គមទ្វីសធើរ។
ជាពិសេស នៅចុងបញ្ចប់នៃវីដេអូ សារមួយបានពន្លេចខ្លួនឡើង ដើម្បីរំឭកអ្នកទស្សនាដូច្នេះថា៖
«ត្រូវបញ្ឈប់ការចម្លងមេរោគ។ គម្លាតសុវត្ថិភាពរវាងគ្នា មានប្រសិទ្ធិភាពណាស់។ ចន្លោះបន្តិចបន្តួចទាំងនេះ នឹងធ្វើឲ្យយើងមានសុវត្ថិភាព ទាំងអស់គ្នា៕»