ក្រុមរៀល របស់ប្រទេសអេស្ប៉ាញ កំពុងអបអរសាទរ អំពីការឈ្នះរបស់ពួកគេ ជាជើងឯកម្ដងទៀត សម្រាប់រដូវកាលឆ្នាំ ២០១៩-២០២០។ (រូបភាពរបស់ក្រុមរៀល)
ក្នុងរដូវកាល២០១៩-២០២០ ក្រុមរៀល ម៉ាឌ្រីត (Real Madrid) បានឈ្នះជាជើងឯក លើកទី៣៤ នៃក្របខណ្ឌបូកពិន្ទុវិលជុំ «La Liga» បន្ទាប់ពីខ្លួនបានប្រកួតឈ្នះ ក្រុម វីឡារៀល (Villarreal) ២-១ ហើយក្រុមបាសឺឡូន (FC Barcelone) ដែលដេញចំណាត់ថ្នាក់ពីក្រោយ បានប្រកួតចាញ់ក្រុមអូសាស៊ូណា (Osasuna) ១-២ ក្នុងជុំប្រកួតទី៣៧នេះ។
ជ័យជំនះរបស់ក្រុមអធិរាជសេះស ទទួលបាន ក្រោមពិន្ទុ២-១ ដែលរកបានដោយកីឡាករ ការីម ប៊ែនសហ្សេម៉ា (Karim Benzema) នៅនាទីទី២៩ និងនាទីទី៧៧ (គ្រាប់បាល់ទីពីរ ជាគ្រាប់បាល់ពិន័យ ១១ម៉ែត្រ)។
ជាជ័យជំនះមួយ ពីក្នុងជ័យជំនះ១០បន្តបន្ទាប់ និងផ្ទួនៗគ្នា ដែលអនុញ្ញាតឲ្យក្រុមនេះ ឈ្នះក្រុមអ្នកមានបុណ្យ បាសឺឡូន ដែលមានពិន្ទុបូកជុំ ដេញតាមក្រោយក្រុមរៀល យ៉ាងប្រកិតប្រកើយនោះ។
សម្រាប់លោក ហ្សីណាឌីន ហ្សីដាន (Zinédine Zidane) វាជាការលើកពានជើងឯក ជាលើកទីពីររបស់លោក ក្នុងឋានៈលោក ជាគ្រូបង្វឹករបស់ក្រុមមួយនេះ។ ការលើកពានលើកមុន គឺនៅក្នុងរដូវកាល ឆ្នាំ២០១៦-២០១៧៕