សហរដ្ឋអាមេរិក និងសហភាពអ៊ឺរ៉ុប ដើរទន្ទឹមគ្នា ក្នុងការគាំទ្រដល់គំរូលទ្ធិប្រជាធិបតេយ្យ ដែលជាមូលដ្ឋានគ្រឹះ នៃគោលនយោបាយរួមរបស់ពួកគេ។ នេះជាការអះអាងឡើង របស់លោក ឆាល មីឆែល (Charles Michel) ប្រធានក្រុមប្រឹក្សាអ៊ឺរ៉ុប នៅក្នុងជំនួបកំពូល (តាមរយៈប្រព័ន្ធវីដេអូ) នៃបណ្ដាមេដឹកនាំនៃរដ្ឋសមាជិកទាំង២៧ ដោយមានការចូលរួម ពីប្រធានាធិបតីអាមេរិក លោក ចូ បៃដិន (Joe Biden) ផង។
លោក ឆាល មីឆែល បានបញ្ជាក់បន្ថែម នៅតាមបណ្ដាញសង្គមទ្វីសធើរ កាលពីថ្ងៃព្រហស្បត្តិ៍ថា៖
«តាមរយៈការដើរទន្ទឹមគ្នា សហភាពអ៊ឺរ៉ុបនិងសហរដ្ឋអាមេរិក អាចបង្ហាញថា លទ្ធិប្រជាធិបតេយ្យនឹងការពារប្រជាជនរបស់ខ្លួន លើកកម្ពស់ឧត្ដមភាព និងនឹងបង្កើតឲ្យមាន នូវភាពរុងរឿង។»
ការលើកឡើងខាងលើ ធ្វើឡើងក្នុងខណៈពេល ដែលសហភាពអ៊ឺរ៉ុប និងសហរដ្ឋអាមេរិក កំពុងពង្រឹកភាពជាដៃគូរបស់ពួកគេ ដើម្បីដាក់ទណ្ឌកម្ម ប្រឆាំងនឹងប្រទេសរុស្ស៊ី ជាពិសេសប្រឆាំងនឹងប្រទេសចិន។
ភ្ជាប់ជាមួយនឹងសារខាងលើ លោក ឆាល មីឆែល ក៏បានបង្ហោះឲ្យឃើញដែរ នូវរូបភាពបង្ហាញពីមេដឹកនាំ នៃបណ្ដាប្រទេសធំៗ នៅក្នុងសហភាពអ៊ឺរ៉ុប រួមនឹងលោក ចូ បៃដិន ដែលបានជួបជជែកគ្នា តាមរយៈវីដេអូ (Video Conference)។
សម្រាប់នាយករដ្ឋមន្ត្រី នៃរាជាណាចក្រប៊ែលហ្សិក លោក «Alexander De Croo» បានវាយតម្លៃថា ការចូលរួមក្នុងជំនួបកំពូល ពីសំណាក់ប្រធានាធិបតីអាមេរិក ជា«សញ្ញាដ៏សំខាន់»មួយ។ លោក បានសរសេរសារ នៅលើបណ្ដាញសង្គមទ្វីសធើរដែរថា៖
«នៅពេលដែលសហភាពអ៊ឺរ៉ុប និងសហរដ្ឋអាមេរិក ធ្វើការរួមគ្នា យើងអាចបង្កើតបាន ជាកម្លាំងដ៏ខ្លាំងក្លាមួយ ដើម្បីកសាងពិភពលោកមួយ ដែលមានភាពយុត្តិធម៌ ពណ៌បៃតង (បរិស្ថាន) និងរីកចម្រើនជាងមុន៕»