នៅក្នុងការលូកដៃ ចូលទៅកកូរកកាយ ស្ថាប័នទូរទស្សន៍ឯកជនមួយ ដើម្បីគម្រាមអគ្គនាយកនៃស្ថាប័ននោះ ឲ្យចាកចេញពីតំណែង លោកនាយករដ្ឋមន្ត្រី ហ៊ុន សែន បានប្រើពាក្យខ្លាំងៗ ថា បើទោះជាជននោះ ជា«ឪស្ដេច ម៉ែស្ដេច» ក៏លោកមិនប្រណីដែរ។
ការគម្រាមនោះ ធ្វើឡើង តាមសារជាសម្លេង ប្រវែងជាង១០នាទី ដែលលោក ហ៊ុន សែន ថតផ្ញើរទៅឲ្យលោក អ៊ុក វរ៉ា អគ្គនាយកទូរទស្សន៍ CNC និងដែលគេស្គាល់ថា ជាក្មួយប្រុស របស់អ្នកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច និងជាសមាជិកគណៈអចិន្ត្រៃយ៍ នៃគណបក្សប្រជាជនកម្ពុជា។
ហើយដើម្បីបញ្ជា ឲ្យលោក អ៊ុក វរ៉ា ត្រូវចុះចេញពីតំណែង ហើយត្រូវដើរចេញ ពីស្ថាប័នឯកជនខាងលើ ឲ្យខាងតែបាននោះ បុរសខ្លាំងកម្ពុជា បានស្រដីឡើងថា៖
«កុំលើកពីបញ្ហា ក្មួយជំទាវ ម៉ែន សំអន។ ជាមួយខ្ញុំ គឺកុំនិយាយឲ្យសោះ។ ឪស្ដេច ម៉ែស្ដេច ក៏ខ្ញុំដាក់ដែរ។ កុំនិយាយអាបញ្ហា កូនអ្នកធំ ក្មួយអ្នកធំ ឬក៏ក្មួយអញ្ចេះ… ឬការយោគយល់ គឺអត់ទេ។ ខ្ញុំយល់ដល់លោកហើយ បានជាខ្ញុំនិយាយ។ បើខ្ញុំមិនយល់ទេ ខ្ញុំប្រាប់ គិត ម៉េង ឲ្យដេញចោល បើ ម៉េង មិនហ៊ានដេញចោល គឺម៉េង សាកល្បងជាមួយខ្ញុំ (…) គឺម៉េង ក្លាយជាសត្រូវរបស់ខ្ញុំ។»
ប្រព័ន្ធផ្សព្វផ្សាយមួយចំនួន បានអះអាងថា សារសម្លេងខាងលើ ត្រូវបានបែកធ្លាយ ចេញពីប្រភពច្បាស់ការណ៍ ដែលស្ថិតនឹងស្ថានីយ៍ទូរទស្សន៍ CNC មុននឹងសារសម្លេងនេះ ត្រូវបានចែកផ្សាយបន្ត នៅពាសពេញបណ្ដាញសង្គម។ តែក្នុងពេលកន្លងមក សារសម្លេងផ្សេងទៀត របស់លោក ហ៊ុន សែន ក៏បានបង្ហាញវត្តមានខ្លួន នៅលើបណ្ដាញសង្គមដែរ ហើយសារសម្លេងទាំងនោះ ត្រូវបានគេគិតថា គឺលោក ហ៊ុន សែន ខ្លួនលោកមានបំណង ឲ្យបែកធ្លាយតែម្ដង៕