លោក ហ៊ុន សែន នាយករដ្ឋមន្ត្រីកម្ពុជា។ (រូបថត AFP)
បន្ទាប់ពីអវត្តមាន មិនឃើញលោក បង្ហាញខ្លួនជាសាធារណៈ អស់រយៈពេលជាច្រើនសប្ដាហ៍ លោក ហ៊ុន សែន នឹងបង្ហាញខ្លួន នៅចំពោះអ្នកផងឡើងវិញ នៅថ្ងៃចន្ទ ទី១ ខែមិថុនាស្អែក។
ប្រព័ន្ធឃោសនារបស់ក្រុងភ្នំពេញ បានអះអាងដូច្នេះ នៅក្នុងអត្ថបទរបស់ខ្លួនមួយ ដែលទើបនឹងចេញផ្សាយ កាលពីប៉ុន្មាននាទីមុន ដោយសរសេរថា លោក ហ៊ុន សែន នឹងអញ្ជើញត្រួតពិនិត្យការស្ថាបនាផ្លូវ នៅក្នុងក្រុងព្រះសីហនុ នៅព្រឹកថ្ងៃចន្ទ។
លោកនាយករដ្ឋមន្ត្រី ហ៊ុន សែន មិនបានបង្ហាញខ្លួន ជាសាធារណៈ តាំងពីច្រើនសប្ដាហ៍ហើយ រាប់តាំងពីដើមខែមេសាមក។
គេមិនសូវឃើញលោក មានវត្តមាននៅខាងក្រៅទេ រាប់តាំងពីផ្ទុះឡើង នូវការរាតត្បាត ជំងឺ«Covid-19»។ នៅលើបណ្ដាញសង្គម គេឃើញលោកបង្ហោះរូបថត ជាលក្ខណៈគ្រួសារ ជំនួបជាមួយមន្ត្រីបរទេស ឬកិច្ចប្រជុំគណៈរដ្ឋមន្ត្រី តែគ្មានរបៀបវារៈ ជាលក្ខណៈបើកទ្វានោះឡើយ៕