នាយករដ្ឋមន្ត្រីកម្ពុជា លោក ហ៊ុន សែន បានឲ្យដឹងថា «វ៉ាក់សាំងចិន»ដើម្បីបង្ការជំងឺកូវីដ-១៩ (Covid-19) ដែលជាជំនួយរបស់ប្រទេសចិន នឹងបញ្ជូនមកដល់កម្ពុជា នៅថ្ងៃទី០៧ ខែកុម្ភៈខាងមុខ។ នេះបើតាមសារជាសម្លេងមួយ ដែលទស្សនាវដ្ដីមនោរម្យ.អាំងហ្វូ ទទួលបានក្នុងថ្ងៃព្រហស្បត្តិ៍ ទី០៤ ខែកុម្ភៈ មុននេះបន្តិច។
បើតាមសារសម្លេង ដែលមានរយៈពេលជិត៦នាទី ប្រមុខរដ្ឋាភិបាលបញ្ជាក់ជាថ្មីថា កម្ពុជានឹងរៀបចំពិធីដ៏ធំដុំ ដើម្បីទទួលវ៉ាក់សាំងទាំងនោះ ដល់ព្រលានយន្ដហោះពោធ៍ចិនតុង ក្រោមវត្តមានរបស់រូបលោក លោក ទៀ បាញ់ រដ្ឋមន្ត្រីការពារជាតិ និងលោក ហោ ណាំហុង ឧបនាយករដ្ឋមន្ត្រី។
លោក ហ៊ុន សែន បានបញ្ជាក់ទៀតថា ក្រោយការមកដល់ នៃវ៉ាក់សាំងចិនទាំងនេះ លោកនឹងរៀបចំពិធីចាក់វ៉ាក់សាំង សម្រាប់រូបលោកដំបូងគេ នៅថ្ងៃទី១០ ខែកុម្ភៈ។ លោកថា៖
«កម្មវិធីទី៣ គឺខ្ញុំកំណត់តែម្ដង គឺយកថ្ងៃ១០ខែ២ (ខែកុម្ភៈ) ចំថ្ងៃពុធមុនចូលឆ្នាំចិន ដើម្បីធ្វើពិធីចាក់វ៉ាក់សាំងដំបូង ដោយខ្ញុំមិនអាចថា ត្រូវរងចាំឲ្យគ្រូពេទ្យយើង ទទួល(ចាក់)វ៉ាក់សាំងសិន ចាំទទួល(ចាក់តាម)ក្រោយទេ។ មុនក្រោយ ដូចតែគ្នាទេ។ អញ្ចឹងទេ គឺខ្ញុំនឹងទទួលវ៉ាក់សាំង នៅថ្ងៃទី១០ ហើយថ្ងៃទី១០នេះ គឺធ្វើនៅមន្ទីរពេទ្យកាលម៉ែត្រ។»
ការបញ្ជាក់ខាងលើ របស់បុរសខ្លាំងនៅកម្ពុជា ជាការប្ដូរ«ជំហរ»ថ្មីទៀត បន្ទាប់ពីលោកបានអះអាង កាលពីព្រឹកថ្ងៃអាទិត្យកន្លងមកថា លោកទុកឲ្យក្រុមគ្រូពេទ្យ ទទួលបានថ្នាំវ៉ាក់សាំងមុនលោកសិន។ ក្រោយការអះអាងនោះ ការរិះគន់បានផ្ទុះឡើងព្រោងព្រាត ដោយលើកឡើងថា លោក ហ៊ុន សែន មានបំណងយកពលរដ្ឋខ្លួនឯង ធ្វើជា«សត្វកណ្តុរ» ដើម្បីធ្វើការពិសោធន៍ ឲ្យថ្នាំវ៉ាក់សាំងរបស់ប្រទេសចិន។
សំនុំរឿងថ្នាំវ៉ាក់សាំង នៅក្នុងប្រទេសកម្ពុជា ត្រូវបានលោក ហ៊ុន សែន និងរដ្ឋាភិបាលរបស់លោក ចាត់ទុកថា ជារឿង«បន្ទាន់» ខណៈប្រទេសកម្ពុជា មានតួលេខអ្នកឆ្លងជំងឺកូវីដ-១៩ មានចំនួន៤៦៧នាក់ និងគ្មានអ្នកជំងឺស្លាប់ទេ។ នៅក្នុងសារជាសម្លេងដដែល លោកនាយករដ្ឋមន្ត្រីបានបញ្ជាក់ពីមូលហេតុ ដែលលោកថាមិនអាចចាំបាននោះ គឺដោយសារវ៉ាក់សាំង របស់ប្រទេសចិន ជាទំនិញយុទ្ធសាស្ត្រ និងជានយោបាយក្នុង-ក្រៅប្រទេសរបស់លោក។
លោក ហ៊ុន សែន បានឲ្យដឹងថា៖
«យើងនឹងចុះឈ្មោះ នូវមន្ត្រីជាន់ខ្ពស់មួយចំនួនរបស់យើង ក្នុងការិយាល័យនយោបាយ ក្នុងរាជរដ្ឋាភិបាល ថា(មានចំនួន)ប៉ុន្មាននាក់ ទៅចាក់នៅកន្លែងនោះ គឺយើងមិនត្រូវរង់ចាំទេ គឺខ្ញុំបានបញ្ជាក់ហើយ ថានេះវាជាទំនិញយុទ្ធសាស្ត្រ ហើយវាបានក្លាយ ទៅជាបញ្ហា នយោបាយក្នុងស្រុកផង នយោបាយក្រៅប្រទេសផង៕»