បារាំងកំពុងគ្រោងប្រកាស ដាក់ប្រទេសទៅក្នុង«ភាពអាសន្ន»ផ្នែកសុខភាព ដើម្បីប្រយុទ្ធប្រឆាំងនឹងមេរោគ «កូរូណា» ឬ «Covid-19»។ នាយករដ្ឋមន្ត្រីបារាំងបានថ្លែងឡើងដូច្នេះ កាលពីយប់ម្សិលម៉ិញ នៅខណៈពេលដែលប្រទេសនេះ បានឈានមកដល់ថ្ងៃទី៣ នៃការដាក់ពលរដ្ឋ ឲ្យធ្វើការបង្ខាំងខ្លួន រស់នៅក្នុងផ្ទះ និងបម្រាមការចេញធ្វើដំណើរ។
ដើម្បីឈានទៅដាក់ប្រទេស ក្នុង«ភាពអាសន្ន» រដ្ឋសភាបារាំងនឹងត្រូវបោះឆ្នោតអនុម័ត្រ ក្នុងថ្ងៃព្រហស្បត្តិនេះ ឬយ៉ាងយូរបំផុត ក្នុងថ្ងៃសុក្រស្អែក។ ការអនុម័ត្រនេះ នឹងត្រូវនាំមកជាមួយផងដែរ នូវផែនការដើម្បីសង្គ្រោះសេដ្ឋកិច្ច ខណៈប្រទេសទាំងមូល បានជាប់គាំង តាំងពីថ្ងៃចន្ទមក។
បន្ទាប់ពីការប្រកាស«ភាពអាសន្ន» ត្រូវបានរដ្ឋសភាបារាំង អនុម័ត្រយល់ព្រមរួច រដ្ឋាភិបាលបារាំងនឹងចេញក្រឹត្យមួយ ដើម្បីពន្យល់ពីផែនការរបស់ខ្លួន ក្នុងការស្ដារស្ថានភាពប្រទេស ទល់នឹងវិបត្តិមួយនេះ ដែល«មិនធ្លាប់មានពីមុនមក»។
ល្បឿននៃការរាតត្បាតរោគ «Covid-19» កំពុងបោះពួយទៅមុខ។ គ្រាន់តែអ្នកជំងឺ ដែលបានស្លាប់ កាលពីម្សិលម៉ិញ (ក្នុងរយៈពេល២៤ម៉ោងចុងក្រោយ) មានចំនួន៨៩នាក់ ពីក្នុងចំណោមអ្នកស្លាប់ ២៦៤នាក់ បើរាប់តាំងពីដំបូងមក។ អ្នកឆ្លងជំងឺនេះ ចំនួន ៣៦៣៦នាក់ កំពុងសម្រាកព្យាបាល នៅឯមន្ទីរពេទ្យ ក្នុងនោះ ៩៣១នាក់ កំពុងស្ថិតក្នុងសភាពធ្ងន់ធ្ងរ។
វិបត្តិសុខភាព ដែលពិភពលោកទាំងមូល កំពុងឆ្លងកាត់ បានតម្រូវឲ្យប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ប្រកាស«សង្គ្រាម» ប្រឆាំងនឹងមេរោគដ៏ចង្រៃ កាលពីយប់ថ្ងៃចន្ទ។
ពលរដ្ឋបារាំងក្នុងប្រទេស ទាំងជាង៦៦លាននាក់ ត្រូវបង្ខំឲ្យបង្ខាំងខ្លួន នៅក្នុងផ្ទះ និងហាមរាល់ការធ្វើដំណើរ ដែលមិនចាំបាច់។ កងកម្លាំងនគរបាល ប្រមាណជាង១០០ ០០០នាក់ ត្រូវបានដាក់ពង្រាយ នៅលើផ្ទៃប្រទេស ហើយការផាកពិន័យ នឹងធ្វើឡើង ចំពោះបុគ្គលណា ដែលល្មើសនឹងបម្រាមខាងលើ។
យ៉ាងណា ក្រសួងមហាផ្ទៃបារាំង បានបញ្ចេញតួលេខឲ្យដឹងថា ក្នុងរយៈពេល ២៤ម៉ោងចុងក្រោយ មនុស្ស៤០៩៥នាក់ បានរងការផាកពិន័យ (ក្នុងម្នាក់ ១៣៥អ៊ឺរ៉ូ) បន្ទាប់ពីពួកគេ ត្រូវបានកម្លាំងនគរបាល ត្រួតពិនិត្យ និងរកឃើញថា បានធ្វើដំណើរ ចេញក្រៅគេហដ្ឋាន ដោយគ្មានភាពចាំបាច់ និងគ្មានលិខិតបញ្ជាក់ត្រឹមត្រូវ៕