ជាហេតុការណ៍ដ៏ហួសចិត្ត លើទីលានបាល់ទាត់ ក្របខណ្ឌដណ្ដើមជើងឯកបូកពិន្ទុ ជុំទី៣០ នៅក្នុងប្រទេសទួរគី នារសៀលថ្ងៃអាទិត្យទី១៤ ខែមីនានេះ។
ខ្សែការពាររបស់ក្រុម «Denizlispor» កីឡាករ «Özer Özdemir» ទំនងជាភ្លេចគិតថា មានគូប្រកួតខ្លួននៅខាងក្រោយ ទើបលើកជើងឡើងដ៏ខ្ពស់ ដើមត្រៀមទប់បាល់ ដែលទាត់មកពីខ្សែបម្រើរបស់ក្រុម «Gaziantep» ដែលជាគូប្រជែងរបស់ខ្លួន។
តែសន្ទុះជើង«ផ្ដាច់ព្រលឹង» របស់កីឡាករ «Özer Özdemir» បានបញ្ចប់ទៅ នៅត្រង់កញ្ចឹង«ក»របស់កីឡាករ «Junior Maranhao» ដែលជាខ្សែស្លាបឆ្វេងរបស់ក្រុម «Gaziantep»។
បន្ទាប់ពីទទួលកាតក្រហម ពីអាជ្ញាកណ្ដាលរួច កីឡាករ «Özer Özdemir» បានសំដែងការសោកស្ដាយ ដោយបានចូលទៅសួរសុខទុក្ខ កីឡាកររងគ្រោះ ដែលអាចងើបឡើងវិញ និងបន្តការប្រកួតទៅមុខបាន។
កាតក្រហម (ស្មើនឹងការបណ្ដេញចេញ ពីការប្រកួត) របស់កីឡាករខាងលើ បានកាត់បន្ថយកម្លាំង របស់ក្រុម «Denizlispor» និងបានធ្វើឲ្យក្រុមនេះ ប្រកួតចាញ់ក្រុមម្ចាស់ផ្ទះ នៅទីបញ្ចប់នៃការប្រកួត ដោយគ្រាប់បាល់ ២-០៕