មានសញ្ញាជាច្រើន បានបង្ហាញឲ្យឃើញថា ការប៉ុងប៉ុងធ្វើរដ្ឋប្រហារ នៅក្នុងប្រទេសហ្គាបុង (ភាគខាងលិខទ្វីបអាហ្វ្រិក) កំពុងប្រព្រឹត្តិទៅ។ តាំងពីម៉ោង៦ ព្រឹកថ្ងៃទី៧ ខែមករា ឆ្នាំ២០១៩នេះ ថ្នាក់ដឹកនាំកងទ័ព បានថ្លែងសារផ្ទាល់ នៅក្នុងវិទ្យុផ្សាយសម្លេងរបស់រដ្ឋ ដោយប្រកាសឲ្យដឹងថា «ក្រុមប្រឹក្សាស្ដារជាតិ» មួយ ត្រូវបានបង្កើតឡើង។
គួរបញ្ជាក់ដែរថា ប្រធានាធិបតីជាប់ឆ្នោត របស់ប្រទេសហ្គាប៊ុង លោក «Ali Bongo Ondimba» មានជំងឺតាំងពីច្រើនខែមកហើយ និងកំពុងសម្រាកព្យាបាល នៅក្នុងប្រទេសម៉ារ៉ុក។
អ្នកយកព័ត៌មាន ប្រចាំឲ្យទូរទស្សន៍អ៊ឺរ៉ុប «EuroNews» បានរាយការណ៍ថា បានឃើញវត្តមានរថពាសដែកជាច្រើន ដែលត្រូវបានបញ្ជូន មកបិទមាត់មហាវិថី «ជ័យជំនះ» ដែលជាផ្លូវដ៏សំខាន់ ឆ្ពោះទៅកាន់បេះដូង នៃរដ្ឋធានី។ នៅជុំវិញស្ថានីយ៍វិទ្យុ គេបានស្ដាប់ឮ ស្នូរបាញ់កាំភ្លើង ជាច្រើនគ្រាប់៕