លោក ហ៊ុន សែន នាយករដ្ឋមន្ត្រីតាំងពីឆ្នាំ១៩៨៥ នៅប្រទេសកម្ពុជា។ (រូបថតឆ្នាំ២០២០ បង្ហោះលើទំព័រហ្វេសប៊ុក)
ក្រៅពីសម្រេច«ឲ្យបិទសាលារៀន» ក្នុងរយៈពេលពីរសប្ដាហ៍ លោកនាយករដ្ឋមន្ត្រី ហ៊ុន សែន បានប្រកាសចាត់វិធានការបន្ថែមមួយចំនួនទៀត នៅក្នុងរាជធានីភ្នំពេញ និងខេត្តកណ្ដាល។ នេះ បើតាមរយៈសារពិសេសមួយ ដែលលោកបានបង្ហោះ នៅលើបណ្ដាញសង្គម នៅយប់ថ្ងៃចន្ទទី២២ ខែកុម្ភៈ ឆ្នាំ២០២១។
ខាងក្រោមនេះ ជាចំណុចដកស្រង់សំខាន់ៗ ពីក្នុងសារជាសម្លេងរបស់លោក ដែលមានរយៈពេល ប្រមាណជាង១២នាទី៖
របាយការណ៍របស់ក្រសួងសុខាភិបាលកម្ពុជា ដែលចេញផ្សាយ នៅព្រឹកថ្ងៃទី២២ ខែកុម្ភ: ឆ្នាំ២០២១ បានបង្ហាញថា កម្ពុជាមានករណីជំងឺកូវីដ-១៩ (Covid-19) សរុបចំនួន៥៦៨នាក់ ក្នុងនោះអ្នកឆ្លងក្នុងព្រឹត្តិការណ៍សហគមន៍២០កុម្ភៈ មានចំនួន៨០នាក់ ខណៈចំនួនអ្នកជំងឺ ដែលកំពុងសំរាកព្យាបាល នៅក្នុងមន្ទីរពេទ្យ មានចំនួន៩៣នាក់។
យ៉ាងណា នៅក្នុងសាររបស់លោក ហ៊ុន សែន ក្នុងយប់ថ្ងៃចន្ទទី២២ ខែកុម្ភៈ បុរសខ្លាំងនៅកម្ពុជា បានអះអាងថា មានសំណាកជាច្រើនទៀត កំពុងស្ថិតក្នុងការពិសោធន៍ ហើយចំនួនអ្នកឆ្លង ដែលត្រូវបានរកឃើញ ក្នុងល្ងាចថ្ងៃដដែល មានចំនួន១៣ករណីរួចជាស្រេចហើយ ធ្វើឲ្យចំនួនអ្នកឆ្លងសរុប ក្នុងព្រឹត្តិការណ៍២០កុម្ភៈ កើនឡើងដល់ជិត១០០នាក់ តែក្នុងរយៈពេល៣ថ្ងៃប៉ុណ្ណោះ៕