ចាប់ពីថ្ងៃចន្ទនេះតទៅ និស្សិតស្ត្រីទាំងឡាយ នៅក្នុងប្រទេសអាហ្វហ្គានីស្ដង់ ត្រូវកំហិត ឲ្យពាក់ស្បៃបិទមុខ (ទុកប្រឡោះភ្នែក) និងគ្របបាំងកាយ «Abaya / Niqab» ដើម្បីទៅរៀន។ នេះ បើតាមក្រឹត្យមួយ ដែលជាក្រឹត្យដំបូង ចេញផ្សាយដោយក្រុមតាលីបង់ (Taliban) នៅថ្ងៃអាទិត្យទី៥ ខែកញ្ញា មួយថ្ងៃមុនថ្ងៃបវេស្សនកាល ដែលនឹងមកដល់ ក្នុងថ្ងៃចន្ទ។
ក្នុងក្រឹត្យដែលចុះថ្ងៃខែ តាំងពីថ្ងៃសៅរ៍ ក្រុមតាលីបង់បានកំហិតឲ្យនិស្សិតស្ត្រីទាំងឡាយ ត្រូវចេញពីថ្នាក់រៀន ឲ្យបាន៥នាទីមុននិស្សិតបុរស និងត្រូវចូលទៅរង់ចាំក្នុងបន្ទប់មួយ រហូតលុះត្រានិស្សិតបុរសចាកចេញអស់។
រីឯសាកលវិទ្យាល័យវិញ ត្រូវរើសបន្ថែម នូវគ្រូបង្រៀនស្ត្រី ឬយ៉ាងហោចណាស់ ត្រូវរើសរកគ្រូបង្រៀនបុរស ដែលមានវ័យ«ចំណាស់» និងមានឫកពារស្មារតី«ស្មាតស្អំ» ដើម្បីបង្រៀនតែនិស្សិតស្ត្រី។
ក្នុងពេលចូលកាន់អំណាច ជាលើកទី១ រវាងពីឆ្នាំ១៩៩៦ មកទល់នឹងឆ្នាំ២០០១ ក្រុមតាលីបង់បានអនុវត្តន៍ច្បាប់ឥស្លាមដ៏តឹងរ៉ឹង ដោយកាត់ផ្ដាច់ស្ត្រី ពីការទាក់ទងជាមួយបុរស ហាមស្ត្រីសឹងតែទាំងអស់ ពីការសិក្សារៀនសូត្រ។ កាលពេលនោះ ស្ត្រីចាំបាច់ត្រូវប្រើស្បៃ«Burka»ដ៏វែង ដើម្បីគ្របបិទបាំងរាងកាយ និងមុខ (ប្រឡោះភ្នែក ក៏ត្រូវបានបាំង ដោយស្បៃដែរ តែមានទុកប្រហោងធំជាង)៕