ក្នុងថ្ងៃសុក្រនេះ សកម្មនារីមួយក្រុម នៃចលនា «FEMEN» បាននាំគ្នាធ្វើបាតុកម្ម នៅលើទីលាន «Puerta de Alcala» នៃរាជធានី ម៉ាឌ្រីត (ប្រទេសអេស្ប៉ាញ) ដើម្បីថ្កោលទោស អំពើហិង្សាផ្នែកភេទ ជាពិសេសអំពើហិង្សា ដែលបានកើតឡើង នៅក្នុងរយៈពេល នៃបម្រាមរដ្ឋាភិបាល កាលពីប៉ុន្មានសប្ដាហ៍កន្លងមក។
ក្រុមសកម្មនារី បានពាក់ម៉ាស់ គ្របពីលើមាត់ និងច្រមុះរបស់ពួកគេ។ ពួកនាងៗខ្លះ បានលែងដងខ្លួនខាងលើ និងខ្លះទៀត បានពាក់ស្បៃ គ្របពីលើក្បាល រហូតមកដល់ដងខ្លួន ដែលចង់បង្ហាញ ពីការកាន់មរណទុក្ខ។
នៅលើដើមទ្រូង របស់ពួកគេ មានសរសេរអក្សរថា៖ «ជំងឺរាតត្បាត នៃបុរសភេទ ដ៏កោងកាច»។
ប្រព័ន្ធផ្សព្វផ្សាយក្នុងប្រទេសអេស្ប៉ាញ បានឲ្យដឹងថា ការចោទប្រកាន់ទៅលើបុរស ដែលបានប្រព្រឹត្តិហិង្សាផ្នែកភេទ បានកើនឡើងប្រមាណជា៦១% នៅក្នុងរយៈពេល នៃបម្រាមហាមពលរដ្ឋ មិនឲ្យដើរចេញក្រៅផ្ទះ៕