ព្រះរាជអាជ្ញាអមសាលាឧទ្ធរណ៍ បានចេញដីកាកោះហៅ លោក សម រង្ស៊ី មេបក្សប្រឆាំងដែលកំពុងនិរទេសខ្លួន ឲ្យបង្ហាញ​ខ្លួននៅសវនាការនាថ្ងៃទី១២ ខែមីនា ឆ្នាំ២០១៣ វេលាម៉ោង ៨ ព្រឹក ដើម្បីចូលរួមសវនាការ ពីដំណើររឿងបរិហារកេរ្តិ៍ និង​ការផ្សព្វផ្សាយព័ត៌មាន«មិនពិត» ពីលោក ហោ ណាំហុង ឧបនាយករដ្ឋមន្ត្រី និងរដ្ឋមន្ត្រីការបរទេសកម្ពុជា។

លោក សម រង្ស៊ី អតីតមេដឹកនាំគណបក្សសម រង្សី។ រូបថតគណបក្សសមរង្សី។

ដីកាកោះនេះត្រូវបានធ្វើឡើង បន្ទាប់ពីរដ្ឋាភិបានកម្ពុជាបានបដិសេធ នូវសំណើរបស់អាមេរិក ដែលស្នើឲ្យកម្ពុជា​ពិចារណា​បទចោទលើ លោក សម រង្ស៉ី ដើម្បីឲ្យប្រធានគណបក្សប្រឆាំងរូបនេះ បានចូលរួមការបោះឆ្នោតជាតិក្នុងខែកក្កដា ឆ្នាំ​២០១៣នេះ។ ជា​សំណុំរឿងក្តី ចុងក្រោយតែមួយគត់ របស់លោក សម រង្ស៊ី នៅក្នុងប្រព័ន្ធតុលាការកម្ពុជាបច្ចុប្បន្ន។

ដីកាកោះ ដែលមិនបានបញ្ជាក់ពីឈ្មោះដើមបណ្តឹង ចុះថ្ងៃទី១៥ខែកុម្ភៈឆ្នាំ២០១៣ មួយនេះ ចេញដោយលោក ង៉ែត សារ៉ាត ក្នុងសំណុំរឿងព្រហ្មទណ្ឌ ចុះថ្ងៃទី៥ ខែធ្នូ ឆ្នាំ២០១១ របស់មេបក្សប្រឆាំង។ សំណុំរឿងនេះ បានកើតមាន នៅបន្ទាប់ពី​ចៅ​ក្រមជំនុំជម្រះ សាលាដំបូងរាជធានីភ្នំពេញ លោក សេង នាង បានតម្កល់នូវសេចក្តីសម្រេច របស់ចៅក្រមលើកមុន ដែល​ផ្តន្ទាទោសកំបាំងមុខលោក សម រង្ស៊ី ដាក់ពន្ធនាគារ ២ឆ្នាំ កាលពីថ្ងៃទី១៣ ខែតុលា ឆ្នាំ២០១១។

អតីតមេធាវីការពារក្តី ឲ្យលោកសមរង្ស៊ី លោក ជូង ជូងី បានថ្លែងថា លោកបានទទួលព័តមានពីខាងគណបក្ស ថានឹងមាន​សវនាការរឿងលោក សម រង្សី នៅខែក្រោយ តែលោកពុំទាន់ទទួលបាន ព័ត៌មានជាផ្លូវការណាមួយថា នឹងឡើងការពារក្តី​នោះឬយ៉ាងណាទេ ដោយហេតុថា មកទល់នឹងពេលនេះ លោកនៅពុំទាន់ទទួលបាន ការពឹងពាក់ពីលោក សម រង្សី នៅ​ឡើយ។

លោក យឹម សុវណ្ណ អ្នកនាំពាក្យគណបក្ស សម រង្ស៊ី បានបង្ហាញថានេះជា «រឿងនយោបាយ ជាឆាកល្ខោនមិនបានការ» គណបក្សសមរង្សី មិនខ្ចាយខ្វល់ចំពោះសំណុំរឿងក្តីនេះទេ។ ប៉ុន្តែលោកថា ករណីលោក សម រង្សី «ក្នុងរយៈពេល​ជាង​ប្រាំខែខាងមុខ នឹងធានាឲ្យមានវត្តមាន លោក សម រង្សី ក្នុងការបោះឆ្នោត» ដែលនឹងត្រូវដោះស្រាយ តាមរយៈការទូត និងការគាបសង្កត់ពីអន្តរជាតិ។

អ្នកគ្រប់គ្រងបច្ចេកទេស ឃ្លាំមើលការរំលោភសិទ្ធិមនុស្សនៃអង្គការ លីកាដូ លោក អំ សំអាត យល់ថា លោកសមរង្សី ជា​អ្នកនយោបាយ រឿងកន្លងមក ច្រើនទាក់ទងនឹងនយោបាយ។ ការបោះឆ្នោតមួយមានលក្ខណៈប្រជាធិបេតយ្យ យុត្តិធម៌ ទាល់តែមានការចូលរួម ពីមេបក្សប្រឆាំងសំខាន់ៗ។ មន្ត្រីរូបនេះបន្តថា គួរតែមានការដោះស្រាយ តាមរូបភាព​នយោបាយ​មួយ អនុវត្តតាមព្រះរាជតម្រិះសម្តេចឪ អតីតព្រះមហាវីរក្សត្រ។ «លោក សម រង្សី នឹងអាចវិលចូលមកវិញបាន ប្រសិន​ណាជាគណបក្សកាន់អំណាច គាត់មានការយោគយល់ ហើយដោះស្រាយគ្នាតាមបែបអ្នកនយោបាយ និងបង្ហាញពីឆន្ទៈ ឲ្យមានការបោះឆ្នោតដោយសេរីនាពេលខាងមុខ»។

សូមរម្លឹកថា ក្នុងប្រទេសបារាំង លោកហោ ណាំហុង រដ្ឋមន្រ្តីក្រសួងការបរទេសកម្ពុជា បានប្តឹងលោកសម រង្សី ពី​បទ​បរិហារ​កេរ្តិ៍ ទៅតុលាការបារំាង កាលពីឆ្នាំ២០០៨ ក្រោយពេលលោកសម រង្សីបានចេញសៀវភៅ មួយក្បាល​ដែលមាន​ចំណង​ជើងថា«ឬសចាក់ក្នុងថ្ម» និងបន្ទាប់ពីលោក បានថ្លែងដោយផ្ទាល់មាត់ នៅឯវាលពិឃាដបឹងជើងឯកកាលពីថ្ងៃ១៧ មេសា ឆ្នាំ២០០៨ ដែលរៀបរាប់ពីឈ្មោះ លោក ហោ ណាំហុង ថាជាមេគុកបឹងត្របែកក្នុងរបបខ្មែរក្រហម ដែលបានធ្វើឲ្យ​មនុស្ស​ស្លាប់ជាច្រើន។ លោកសម រង្សី ក៏បានទាមទារឲ្យនាំលោកហោ ណាំហុង ទៅកាន់សាលាក្តីខ្មែរក្រហម។ ប៉ុន្តែលោក ហោ ណាំហុង បានធ្វើការបដិសេធវិញថា លោក និងក្រុមគ្រួសារជាជនរងគ្រោះ ហើយប្អូនស្រីពីរនាក់ក៍ត្រូវបានសម្លាប់ដោយ របបខ្មែរក្រហមនេះដែរ។

ក្នុងឆ្នាំ២០០៩-២០១០ លោក សម រង្សី ត្រូវតុលាការដំបូង និង ឧទ្ធរណ៍បារាំងសម្រេចឲ្យចាញ់ក្តីលោកហោ ណាំហុង ពី​បទបរិហារកេរ្តិ៍ និងបានបង្គាប់ឲ្យលោកសម រង្សី បង់ជំងឺចិត្តទៅឲ្យលោកហោ ណាំហុងនូវទឹកប្រាក់ចំនួន«មួយយូរ៉ូ (ស្មើរ​នឹងប្រហែល៦០០០រៀលកម្ពុជា)»។ ឆ្នាំ២០១១ តុលាការកំពូលបារាំង បានច្រានចោលសេចក្តីសម្រេចរបស់សាលាដំបូង និង សាលាឧទ្ធរណ៍ នៃប្រទេសបារាំងនេះ។

ចំណែកនៅក្នុងប្រទេសកម្ពុជា មកដល់ពេលនេះ លោកសមរង្ស៊ី ត្រូវបានតុលាការសម្រេចផ្តន្ទាទោស កំបាំងមុខលើសំណុំ​រឿងបីផ្សេងគ្នា សរុបទោសដែលត្រូវជាប់ជាប់ពន្ធនាគារទាំងអស់ ជាងដប់ឆ្នាំ។ ទីមួយ ទាក់ទងបទចោទដក​តម្រុយ​បង្គោល​ព្រំដែនកម្ពុជាវៀតណាម នៅខេត្តស្វាយរៀង ជាប់ពន្ធនាគារពីរឆ្នាំ បានចូលជាស្ថាពរ។ បទចោទទីពីរ រឿងក្លែងឯកសារ​ផែនទី ជាប់ទោសប្រាំបីឆ្នាំ ដែលបច្ចប្បន្នកំពុងស្ថិតក្នុង សមត្ថកិច្ចតុលាការកំពូល និងទីបីសំនុំរឿងបរិហារកេរ្តិ៍លោក ហោ ណាំហុង ដែលនឹងបើកសវនាការនៅថ្ងៃទី១២ ខែមីនា ឆ្នាំ២០១៣ វេលាម៉ោង ៨ ព្រឹក។

រាល់ការចោទប្រកាន់ទាំងនេះ ត្រូវបានគណបក្សប្រឆាំង សង្គមស៊ីវិល សហគមន៍ជាតិ និងអន្តរជាតិជាច្រើន  ចេញសេចក្ដី​ថ្លែងការណ៍ជាបន្តបន្ទាប់ ចាត់ទុកថា ជា«រឿងនយោបាយ»។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៥ កុម្ភៈ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ