Posts in ‘វប្បធម៌ សិល្បៈ ប្រពៃណី’ Category

ទូរទស្សន៍​អ៊ឺរ៉ុប៖ ​កម្ពុជាអបអរ​ការ​បញ្ចូល​តំបន់​ប្រាសាទ​សំបូរ​ព្រៃ​គុក ជា​បេតិកភណ្ឌ​ពិភពលោក

ទូរទស្សន៍​អ៊ឺរ៉ុប៖ ​កម្ពុជាអបអរ​ការ​បញ្ចូល​តំបន់​ប្រាសាទ​សំបូរ​ព្រៃ​គុក ជា​បេតិកភណ្ឌ​ពិភពលោក

ព្រឹត្តិការណ៍ នៃការដាក់បញ្ចូលតំបន់​ប្រាសាទសំបូរ​ព្រៃគុក ដែលស្ថិតក្នុងខេត្តកំពង់ធំ របស់ប្រទេសកម្ពុជា ទៅក្នុងបញ្ជីបេតិកភណ្ឌពិភពលោក ដោយអង្គការយូនេស្កូ កាលពីដើមខែមកនេះ បានទាក់ទាញឲ្យបណ្ដាញទូរទស្សន៍​ដ៏ធំមួយ នៅអ៊ឺរ៉ុប ធ្វើសេចក្ដីរាយការណ៍ ហើយផ្សព្វផ្សាយកាលពីម្សិលម៉ិញ នៅក្នុងកម្មវិធីព័ត៌មានរបស់ខ្លួន។

ទូរទស្សន៍ «EuroNews» របស់អ៊ឺរ៉ុប ដែលផ្សាយចម្រុះភាសា ចំនួន១៣ភាសា បានលើកឡើងថា កម្ពុជានឹងរៀបចំប្រារព្ធពិធីអបអរសាទរ សម្រាប់ព្រឹត្តិការណ៍នេះ នៅល្ងាចថ្ងៃចន្ទនេះ។ អ្នកឆ្លើយឆ្លងព័ត៌មានរបស់ទូរទស្សន៍ ដែលបានចុះទៅដល់ តំបន់សំបូរព្រៃគុកផ្ទាល់ បានសម្ភាសជាមួយលោក សែម ណម មន្ត្រីអភិរក្ស នៃតំបន់ប្រាសាទសំបូរព្រៃគុក និងបានស្រង់សំដីរបស់លោក មកបញ្ជាក់ថា លោកសប្បាយរកអ្វីប្រៀបផ្ទឺមមិនបាន ដោយបានទទួលបានដំណឹងនេះ។

មន្ត្រីដែលធ្វើកិច្ចការអភិរក្ស តាំងពីឪពុកលោករហូតមកនេះ បានថ្លែងឡើងថា៖ «ប្រាសាទទាំងនេះ ត្រូវបានបោះបង់ចោល អស់រយៈពេលជាយូរហើយ។ នៅឆ្នាំ១៩៩៤ យើងបានចាប់ផ្ដើមបោសសម្អាត និងថែរក្សារហូតមកដល់សព្វថ្ងៃ។ ឥឡូវតំបន់នេះ ត្រូវបានក្លាយជាសម្បត្តិបេតិកភណ្ឌពិភពលោក។ (...) ខ្ញុំសំដែងការអរគុណ ទៅដល់បុព្វបុរសខ្មែរយើង ដែលបានសាងសង់ប្រាសាទទាំងនេះ ហើយបានបន្សល់ទុករហូតមកដល់សព្វថ្ងៃ។»។

តំបន់រមណីយដ្ឋាននេះ ជាបេះដូងនៃរាជធានី ឦសានបុរៈ របស់ចក្រភព ចេនឡា ដែលបានលាតសន្ធឹង​ឥទ្ធិពលរបស់ខ្លួន នៅចុងសតវត្សន៍ទី៦ រហូតដល់ដើមសតវត្សន៍ទី១២។ រាជធានីបូរណនេះ លាតសន្ធឹងនៅលើផ្ទៃក្រឡា ប្រមាណជា២៥គីឡូម៉ែត្រការ៉េ និងរចនាលំអ ដោយប្រាសាទជាច្រើន ក្នុងនោះប្រាសាទចំនួន១០ ត្រូវបាន​សាង​សង់​ឡើង​នៅកណ្ដាលក្រុង ដែលជាគំរូសំណង់បូរាណ មានតែមួយគត់ នៅក្នុងតំបន់អាស៊ីអាគ្នេយ៍។ រូបរាងប្រាសាទ និងក្បាច់ក្បូរចម្លាក់ នៅក្នុងតំបន់​រមណីយដ្ឋាននេះ ជាសក្ខីកម្មដ៏សំខាន់ និងដ៏មានតម្លៃ សម្រាប់ស្ថាបត្យកម្ម «មុនសម័យអង្គរ» ដែលក្រុមអ្នកស្រាវជ្រាវហៅថា ជារចនាបថ«សំបូរព្រៃគុក»៕

» សេចក្ដីរាយការណ៍របស់ទូរទស្សន៍ «EuroNews» ជាភាសាអង់គ្លេស៖

ការ​ថត​រូប​ដ៏​ចម្លែក​របស់​ប្រធានាធិបតី ហូឡង់ នៅ​បី​ថ្ងៃ​មុន​ផុត​តំណែង

ការ​ថត​រូប​ដ៏​ចម្លែក​របស់​ប្រធានាធិបតី ហូឡង់ នៅ​បី​ថ្ងៃ​មុន​ផុត​តំណែង

លោក ហ្វ្រង់ស៊័រ ហូឡង់ (François Hollande) តែងសុបិន្តចង់ក្លាយជា «ប្រធានាធិបតីសាមញ្ញ» ដែលនៅជិត ជាមួយពលរដ្ឋបារាំងបំផុត។ តែជាលទ្ធផលចុងក្រោយ លោកនឹងត្រូវចាកចេញពីវិមានប្រធានាធិបតី អេលីហ្សេ (Elysée) ជាមួយនឹង «អប្រជាប្រិយភាពដ៏ខ្លាំង» មិនដែលធ្លាប់ជួប ក្នុងចំណោមប្រធានាធិបតីបារាំង រហូតមកដល់ថ្ងៃនេះ។ អាណត្តិជាប្រធានាធិបតីរបស់លោក ក៏បានបញ្ចប់ទៅ ជាមួយនឹងតុល្យភាពនយោបាយបែកបាក់យ៉ាងសម្បើមដែរ នៅក្នុងគណបក្សសង្គមនិយម (PS) របស់លោក។

រឿងដែលពិបាកទទួលយក ជាងរឿងខាងលើនោះ គឹលោក ហូឡង់ នឹងត្រូវប្រគល់អំណាច ជាប្រមុខរដ្ឋប្រទេសបារាំង នៅថ្ងៃទី១៤ ខែឧសភានេះ ទៅឲ្យលោក អេម៉ានុយអែល ម៉ាក្រុង (Emmanuel Macron) ដែលមានវ័យត្រឹមតែ៣៩ឆ្នាំ ហើយធ្លាប់ជាទីប្រឹក្សា និងរដ្ឋមន្ត្រីរបស់លោកនោះផងទៀត។ លោក ម៉ាក្រុង ដែលទើបនឹងហក់ចូលប្រឡូក ក្នុងនយោបាយ តែបែរជាទទួលបាន នូវភាពជោគជ័យ ដោយសារតែលោក បានសន្យាបង្កើតគោលនយោបាយថ្មី ខុសពីនយោបាយរបស់លោក ហូឡង់។

បើសិនជាលោក ហ្វ្រង់ស៊័រ ហូឡង់ មិនសូវជាសប្បាយចិត្ត ជាមួយម្ចាស់វិមានអេលីហ្សេថ្មីនោះ តែលោកគ្មានអំណាចអ្វី ដើម្បីជំទាស់ការសម្រេចចិត្ត របស់ប្រជាជនបារាំងនោះឡើយ។ រឿងដែលលោកគួរធ្វើ នៅពេលនេះ គឺត្រូវបន្យល់ទុករឿងដែលល្អៗ ឲ្យបានច្រើនបំផុត សម្រាប់មនុស្សជំនាន់ក្រោយ និងសម្រាប់ប្រវត្តិសាស្ត្រ។

ដូច្នេះហើយ លោកប្រធានាធិបតីផុតអាណត្តិ បានជ្រើសរើសការថតរូបផ្លូវការ ជាលើកចុងក្រោយបំផុត កាលពីថ្ងៃទី១១ ខែឧសភាកន្លងមក នៅក្នុងសាលទទួលភ្ញៀវ នៃវិមានអេលីហ្សេ ក្រោមស្នាដៃរបស់លោក «Joel Saget» ជាងថតរូបដ៏ល្បីម្នាក់ របស់ទីភ្នាក់ងារព័ត៌មានបារាំង «AFP»។ កម្រងរូបថតទាំងនោះ បានថតរូបលោក ហូឡង់ ជាមួយនឹងកាយវិការប្លែកៗជាច្រើន ដែលគេកម្រ ឃើញលោកធ្វើជាសាធារណៈ។ ទស្សនាវដ្ដីបារាំងមួយ ឈ្មោះ «Gala» បានហៅការថតរូបនោះ ថាមានលក្ខណៈដ៏«ចម្លែក»៕

» រូបថតមួយចំនួន ដែលត្រូវបានដាក់បង្ហោះ នៅលើបណ្ដាញសង្គម៖

អេនជឺលីណា ជូលី កំពុង​រៀបចំ​សម្ពោធ​ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ» នៅ​ក្រុង​សៀមរាប

អេនជឺលីណា ជូលី កំពុង​រៀបចំ​សម្ពោធ​ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ» នៅ​ក្រុង​សៀមរាប

នៅក្នុងកម្មវិធី ចាក់បញ្ចាំងដំបូង នៃភាពយន្ដរឿង «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ (ជាភាសា​​អង់គ្លេស First They Killed My Father/ ជាភាសាបារាំង D'abord ils ont tué mon père)» នឹងត្រូវចាប់ផ្ដើម​ធ្វើ នៅ​ថ្ងៃ​សៅរ៍​ទី១៨ ខែ​កុម្ភៈ​នេះ​ហើយ ចាប់ពីម៉ោង ៦ល្ងាចទៅ នៅលើលានជល់ដំរី ក្នុងបរិវេណ​ប្រាសាទ​អង្គរធំ។

ដំណឹងដែលទស្សនាវដ្ដីមនោរម្យ.អាំងហ្វូ ទទួលបានពីខេត្តសៀមរាប នៅមុននេះបន្តិច បាន​អះអាង​ថា នៅ​ខណៈ​នេះ កំពូលតារាហូលីវូដ ដែលបានក្លាយជា​អ្នកដឹកនាំរឿង នាង អេនជឺលីណា ជូលី (Angelina Jolie) កូន​ប្រុស​ស្រី​របស់​អ្នកស្រី រួមនឹងក្រុមការងារផង បានបង្ហាញខ្លួន​ នៅខាងមុខ​ព្រះរាជ​ដំណាក់ ក្នុងខេត្ត​សៀម​រាប។ ការ​បង្ហាញ​វត្តមាន ដែលគេជឿថា អ្នកស្រីទំនងជា​មាន​ជំនួប​ផ្លូវការ​អ្វីមួយនៅទីនោះ មុននឹង​អ្នកស្រី ធ្វើ​សន្និសីទ​សារព័ត៌មាន នៅ​វេលា​ម៉ោង ១២ (ក្នុងថ្ងៃដដែលនេះ) ​នៅ​សណ្ឋាគារ «Raffles Grand Hotel d'Angkor»។

ភាពយន្ដហូលីវូដ ដែលថតជាភាសាខ្មែរ និងមានការចូលរួម ពីតារាជាតិជាច្រើននេះ នឹងត្រូវ​ចាក់​បញ្ចាំង នៅ​​ពាស​ពេញ​ផ្ទៃ​ប្រទេស​កម្ពុជា។ កម្មវិធីចាក់បញ្ចាំង ដែលគេបានដឹង តាមរយៈទំព័រហ្វេសប៊ុក «Angelina Jolie / Angie» បានអះអាងថា៖ «ការចាក់បញ្ចាំង នៅរាជធានីភ្នំពេញ នឹងធ្វើនៅថ្ងៃទី ២១ ខែកុម្ភៈ ចាប់​ពី​ម៉ោង ៦ល្ងាច​ នៅ​ពហុ​កីឡាដ្ឋាន​អូឡាំពិក។ ការចាក់បញ្ចាំង នៅក្រុងបាត់ដំបង នឹងធ្វើនៅថ្ងៃទី ២៣ ខែកុម្ភៈ (ទី​កន្លែង និងពេល​វេលា នៅ​មិន​ទាន់​ឲ្យ​ដឹង នៅឡើយ)»។

» ទិដ្ឋភាព នៃការរៀបចំចាក់​បញ្ចាំង​ភាពយន្ដ នៅលើលានជល់ដំរី ក្នុងបរិវេណប្រាសាទអង្គរធំ៖

ភាពយន្ដ «មុន​ដំបូង ​ខ្មែរ​ក្រហម​សម្លាប់​ប៉ា​របស់​ខ្ញុំ» ជាការដកស្រង់រសជាតិ នៃជីវិត«ពិត»ដ៏​ខ្លោច​ផ្សារ នៅ​​ក្រោម​​របប​ប្រល័យ​ពូជសាសន៍ ខ្មែរក្រហម របស់​ប្រជាជនខ្មែរមួយរូប ឈ្មោះ លឿង អ៊ឹង។ ទោះ​នៅ​ក្នុង​​សម័យ​​នោះ អ្នកស្រី លឿង អ៊ឹង នៅមានវ័យជាកុមារភាពម្នាក់ (អាយុ៥ឆ្នាំ) ក៏ដោយ តែអ្នកស្រី​​បាន​​ចងចាំ​​ហេតុការណ៍ ដ៏​រន្ធត់​តក់ស្លុត ពីសង្គ្រាមព្រាត់ប្រាស់ ដែលបានកើតឡើង ក្នុងទសវត្សន៍ឆ្នាំ៧០ ជាពិសេស​ហេតុការណ៍ នៅ​នឹង​ភ្នែក នៃ​​ការ​​បណ្ដើរ នាំឪពុក​អ្នកស្រីចេញទៅ ពីសំណាក់ក្រុមខ្មែរក្រហម ដែលគ្មានថ្ងៃ​វិល​ត្រឡប់។ ទិដ្ឋភាពនៅ​ក្នុង​ចិត្ត​អស់​ទាំងនោះ បានជំរុញឲ្យអ្នកស្រី សរសេរ​ប្រលោមលោក «មុន​ដំបូង ​ខ្មែរ​ក្រហម​​សម្លាប់​​ប៉ា​​​របស់​ខ្ញុំ» នេះ​ឡើង មុន​នឹង​បោះពុម្ភ​ផ្សាយ ជាសៀវភៅ​នៅក្នុងឆ្នាំ២០០០៕

ទស្សនាវដ្ដី​អាល្លឺម៉ង់​ផ្សាយ​រូប ត្រាំ កាត់​ក្បាល​ស្ត្រី​«​សេរីភាព»

ទស្សនាវដ្ដី​អាល្លឺម៉ង់​ផ្សាយ​រូប ត្រាំ កាត់​ក្បាល​ស្ត្រី​«​សេរីភាព»

ជាគម្របទស្សនាវដ្ដី ដែលបានបង្កភាព«តក់ស្លុត» ដល់ពិភពលោក។ ទស្សនាវដ្ដីអាល្លឺម៉ង់ ចេញផ្សាយ​ប្រចាំ​សប្ដាហ៍ ឈ្មោះ «Der Spiegel» ដែល​គេ​ដឹងថា មាននិន្នាការឆ្វេងនិយម បានដាក់​រូប​គំនូរ​នេះ នៅ​លើ​គម្រប​លេខ​ចេញ​ផ្សាយ របស់​ខ្លួន កាលពីចុង​សប្ដាហ៍មុន។

រូបគំនូរ ដែលគូរដោយវិចិត្រករជាតិ អាមេរិក-គុយបា លោក «Edel Rodriguez» បានបង្ហាញឲ្យ​ឃើញ​លោក ដូណាល់ ត្រាំ (Donald Trump) ប្រធានាធិបតីអាមេរិកថ្មី កំពុងកាន់ក្បាលស្ត្រី «តំណាង​ឲ្យ​សេរីភាព» របស់​ពិភពលោក នៅ​នឹង​ដៃ​ម្ខាង និងកាំបិត​ផ្គាក់ដ៏ធំ ដែលមាន​ប្រលាក់ឈាម នៅនឹងដៃ​ម្ខាង​ទៀត។ នៅ​ខាង​ក្រោម​ផ្នែក​ខាង​ស្ដាំ  វិចិត្រករបានសរសេរ​ពាក្យ​ពីរម៉ាត់ ជាភាសាអង់គ្លេសថា «America first» (ផល​ប្រយោជន៍​អាមេរិក ជា​អាទិភាព​មុន​គេ) ដែលត្រូវបាន​គេ​ដឹងថា ជាពាក្យស្លោកមួយ ក្នុងចំណោម​ពាក្យ​ស្លោក​ជា​ច្រើន ​​របស់​លោក ត្រាំ នៅក្នុង​​យុទ្ធនាការ​​រក​​សម្លេង​​ឆ្នោត កាលពីឆ្នាំមុន។

នាយកនិពន្ធ របស់ទស្សនាវដ្ដីខាងលើ លោក «Klaus Brinkbäumer» បានថ្លែងប្រាប់ ទីភ្នាក់ងារ​​ព័ត៌មាន​​អាល្លឺម៉ង់ «DPA» ឲ្យដឹង​ថា៖ «នៅខាងលើ​គម្របទស្សនាវដ្ដី​​របស់​យើង បានបង្ហាញពី​ប្រធានាធិបតី កាត់​ក្បាល​រូបចម្លាក់​​​ជា​និមិត្តរូប​​មួយ ដែល​បង្ហាញ ពីការ​ទទួល​ស្វាគមន៍ ជនអន្តោប្រវេសន៍ និងជន​ភៀស​ខ្លួន​ទាំង​ឡាយ នៅ​លើ​ទឹកដី​អាមេរិក តាំង​ពី​ឆ្នាំ​១៨៨៦។ រូបចម្លាក់​នេះ ក៏ជានិមិត្តរូប នៃលិទ្ធិ​ប្រជាធិបតេយ្យ និង​សេរីភាព​ដែរ។»។

» នេះ ជារូបភាពពេញទាំងមូល នៃគម្របទស្សនាវដ្ដីនោះ៖

គំនូរនេះរបស់ទស្សនាវដ្ដី ក៏ចង់បង្ហាញពីការប្រៀបធៀប ទៅនឹងយុទ្ធជនស្ម័គ្រប្រយុទ្ធ ដើម្បី​ព្រះ​ជា​ម្ចាស់​ម្នាក់​ របស់​ក្រុម​រដ្ឋ​អ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ដែល​ធ្លាប់​បាន​ថត​រូប ជា​មួយ​​កាយវិការ​​កាត់​ក្បាល​ចំណាប់​ខ្មាំង ជាច្រើននាក់ យកមក​ដាក់​ផ្សាយ ដើម្បីគម្រាម​បស្ចឹម​លោក ​កាល​ពី​ឆ្នាំ​កន្លង​ទៅ។ ជននេះ ដែលមាន​សញ្ជាតិ​អង់គ្លេស ត្រូវបានគេ​ស្គាល់ ថា​មាន​រហស្សនាម «Jihadi John»។

លោក «Alexander Lambsdorff» អនុប្រធានសភាអ៊ឺរ៉ុប ត្រូវបានសារព័ត៌មានអាល្លឺម៉ង់ «Bild» ស្រង់​សំដី​យក​មក​ផ្សាយ ដោយ​ចាត់​ទុក​គម្រប​ទស្សនាវដ្ដី​ខាង​លើ ថាមានលក្ខណៈ «ខុស​ទំនង» និងយក​ជីវិត​ជន​រងគ្រោះ ពី​ការ​កាត់​ក្បាល​​របស់​ក្រុម​រដ្ឋអ៊ីស្លាម យក​មក​ធ្វើការ«លេងសើច»។ ចំពោះ​​សារព័ត៌មាន​អាល្លឺម៉ង់ «Die Welt» ដែល​មាន​និន្នាការ​ស្ដាំនិយម​វិញ បានវាយតម្លៃ​​​ទស្សនាវដ្ដីនេះ បានបានធ្វើ​ឲ្យ​ខូច​​តម្លៃ ទៅដល់​វិជ្ជាជីវៈ ជា​អ្នក​សារព័ត៌មាន។

រូប​គំនូរនេះ ត្រូវបានយកទៅបង្ហោះ និងចែករំលែក យ៉ាងព្រោងព្រាត នៅតាមបណ្ដាញ​សង្គម។ ហើយ​បណ្ដាបាតុករ ប្រឆាំងនឹង​នយោបាយ​របស់លោក ដូណាល់ ត្រាំ នៅគ្រប់ជ្រុងជ្រោយ លើពិភពលោក ក៏​បាន​បោះ​ពុម្ភ​រូប​គំនូរនេះ ដើម្បី​លើក​តាំង​បង្ហាញ នៅក្នុងបាតុកម្ម​របស់​ពួក​គេ​ដែរ។

ដោយឡែក នៅសហរដ្ឋ​អាមេរិកវិញ សារព័ត៌មាន «Washington Post» បានវាយ​តម្លៃរូបគំនូរ របស់​ទស្សនាវដ្ដី​អាល្លឺម៉ង់ ថា​មាន​លក្ខណៈ «គួរ​ឲ្យព្រឺព្រួច» ខណៈគេហទំព័រ​របស់​ទូរទស្សន៍ «Fox News» ដែល​មាន​និន្នាការ​អភិរក្ស​និយម បាន​សំដែង «ភាព​ចម្លែក» ទៅ​លើ​រូប​គំនូរ​នេះ​ទៅ​វិញ៕

ចូលឆ្នាំ​ចិន ឆ្នាំ​មាន់ និយាយ​ពី​រូប​ចម្លាក់ ត្រាំ ជា​សត្វ​មាន់

ចូលឆ្នាំ​ចិន ឆ្នាំ​មាន់ និយាយ​ពី​រូប​ចម្លាក់ ត្រាំ ជា​សត្វ​មាន់

ថ្ងៃចូលឆ្នាំចិន​ ទើបនឹងចាប់ផ្ដើម នៅថ្ងៃទី២៨ ខែមករានេះប៉ុណ្ណោះ តែមជ្ឈមណ្ឌលពាណិជ្ជកម្មមួយ ក្នុងក្រុង «Taijiquan» នៃខេត្ត «Shanxi» ភាគកណ្ដាល​ប្រទេសចិន បានប្រារព្ធនិមិត្តរូប នៃឆ្នាំមាន់នេះ តាំង​ពី​ចុង​ឆ្នាំ​កន្លង​ទៅ។ នោះគឺការដាក់តាំងបង្ហាញ នូវរូប​សំណាក​លោក ដូណាល់ ត្រាំ (Donald Trump.) ប្រធានាធិបតី​អាមេរិក ដោយ​ឆ្លាក់​តាមបែបសត្វមាន់ នៅខាងមុខ​អាគារ​មជ្ឈមណ្ឌល។

ជាការពិតហើយ ដែលលោក ដូណាល់ ត្រាំ មិនសូវជាធ្វើ​ឲ្យរដ្ឋាភិបាលក្រុង ប៉េកាំង សប្បាយចិត្តប៉ុន្មានទេ រាប់​ចាប់​តាំងពីពេលលោក ធ្វើយុទ្ធនាការបោះឆ្នោតជំហានដំបូង នៅក្នុងគណបក្ស​សាធារណរដ្ឋនោះម្លេះ។ ជា​ពិសេស គឺ​ជំហរ​របស់​លោក ត្រាំ ក្នុងការគាំទ្រ «ឯករាជ្យភាព» របស់កោះតៃវ៉ាន់ ដែលប្រទេសចិន តែងចាត់ទុក ថា​ជា​«កោះ​ឧទ្ទាម»មួយ នៅសមុទ្រចិនខាងកើត។

ទំនងជាភាព​ក្ដៅក្រហាយ ខាងលើនេះហើយ ទើបវិចិត្រករចម្លាក់ ជាតិចិនមួយរូប មានគំនិតបង្កើត ជារូប​ចម្លាក់​កំពស់ ៩.៧៥ម៉ែត្រ នេះឡើង។ រូបចំលាក់នេះ មិនត្រឹមតែទទួលបាន ការពេញចិត្ត ពីសំណាក់​​នាយក​​គ្រប់គ្រង​មជ្ឈមណ្ឌលខាងលើ រហូត​យក​រូបនេះ មកតាំងជាសាធារណៈ​នោះទេ តែបណ្ដាជនចិន​ជាច្រើននាក់ ក៏បាន​សំដែង​ការ​ពេញ​ចិត្ត ពេញថ្លើម ហើយខ្លះទៀត ថែម​ទាំង​បាន​ថតរូប ទៅចែកគ្នាសើចសប្បាយ នៅ​តាម​បណ្ដាញ​សង្គម​នោះ​ផង។

អ្នកលក់ដូរម្នាក់ នៅក្នុងមជ្ឈមណ្ឌល បានថ្លែងប្រាប់បណ្ដាញទូរទស្សន៍ «CNN» របស់អាមេរិកថា៖ «រូប​ចម្លាក់​នេះ គួរ​ឲ្យស្រឡាញ់ផង និង​គួរ​ឲ្យអស់សំណើចផង។ ម៉ូដសក់ និងចិញ្ចើម​របស់រូបសំណាក មាន​លក្ខណៈ​ដូច ​ទៅ​នឹង​សក់​ក្បាល និងចិញ្ចើម​របស់​លោក ដូណាល់ ត្រាំ។ ខ្ញុំ​ច្បាស់​ក្នុង​ចិត្ត​ថា រូបនេះនឹង​ជួយ​​​ទាក់ទាញ​​អតិថិជន ឲ្យ​មក​​កាន់​​ទី​នេះ កាន់​តែ​ច្រើន​ឡើង។»

មិនខុសទេ ព្រោះក្នុងពេលនេះ ប៉េងប៉ោងធំជាច្រើន ដែលផ្លុំបំប៉ោងចេញ ទៅជារូបចម្លាក់ខាងលើ ត្រូវបានផលិត​ឡើង​ និងយកមក​ដាក់​លក់នៅទីនោះ យ៉ាងច្រើន៕