កាំជ្រួចនុយក្លេអ៊ែររ៉ូស្ស៊ី បានមកដល់មាត់ទ្វាអង្គការ«ណាតូ»
- ដោយ: សេក មនោរកុមារ ([email protected]) - បារីស ថ្ងៃទី១០ តុលា ២០១៦
- កែប្រែចុងក្រោយ: December 28, 2016
- ប្រធានបទ: សង្គ្រាមត្រជាក់
- អត្ថបទ: មានបញ្ហា?
- មតិ-យោបល់
-
ប្រទេសរ៉ូស្ស៊ី បានបញ្ជូនកាំជ្រួច «Iskander» ជាច្រើនដើម មកកាន់ក្រុង «Kaliningrad» ដែលស្ថិតក្នុងទឹកដីរ៉ូស្ស៊ី ដាច់ដោយឡែកមួយ មានព្រំដែននៅជាប់ នឹងប្រទេសសមាជិករបស់អង្គការ នៃសន្ធិសញ្ញាអាត្លង់ទិកខាងជើង (ពាក្យកាត់ជាភាសាអង់គ្លេស៖ NATO - និងភាសាបារាំង៖ OTAN) ចំនួនពីរ៖ ប្រទេសប៉ូឡូញ និងប្រទេសលីទួអានី។
កាំជ្រួច «Iskander» ទាំងនេះ សុទ្ធតែមានសមត្ថភាព អាចត្រូវបំពាក់ដោយក្បាលគ្រាប់នុយក្លែអ៊ែរបាន។ នេះបើតាមការប្រកាស របស់ក្រសួងការបរទេស នៃប្រទេសលីទួអានី ដោយបានចាត់ទុក ការដាក់ពង្រាយនូវកាំជ្រួចទាំងនេះ ថាជាការរំលោភ ទៅលើសន្ធិសញ្ញាអន្តរជាតិ ស្ដីពីអាវុធនុយក្លេអ៊ែរ។
រដ្ឋមន្ត្រីការបរទេស របស់ប្រទេសលីទួអានី លោក «Linas Linkevicius» បានថ្លែងឲ្យដឹងថា៖ «ប្រទេសរ៉ូស្ស៊ីបានធ្វើសមយុទ្ធយោធា ដ៏ខ្លាំងក្លាមួយ នៅក្រុង "Kaliningrad" ហើយសេណារីយ៉ូ (Scénario) របស់ប្រទេសនេះ គ្រោងនឹងដាក់ពង្រាយ នូវប្រព័ន្ធកាំជ្រួច "Iskander" នៅក្នុងតំបន់ ហើយនឹងប្រើប្រាស់កាំជ្រួចទាំងនេះ ក្នុងពេលខាងមុខ»។
កាំជ្រួចប្រភេទនេះ របស់ប្រទេសរ៉ូស្ស៊ី អាចបាញ់បានចំងាយ ៧០០គីឡូម៉ែត្រ ដែលជាចំងាយមួយ អាចលាតសន្ធឹងមកដល់រដ្ឋធានីប៊ែរឡាំង របស់ប្រទេសអាល្លឺម៉ង់ ប្រសិនជាកាំជ្រួច ត្រូវបានបាញ់ចេញ ពីខេត្តរ៉ូស្ស៊ីមួយនេះ។ លោករដ្ឋមន្ត្រី «Linas Linkevicius» បានថ្លែងរំពឹងថា ប្រទេសរ៉ូស្ស៊ីកំពុងរៀបចំផែនការនេះឡើង ដើម្បី«ទាមទារនូវសម្បទានអ្វីមួយ ពីលោកខាងលិច»។
ដើម្បីហ្វឹកហាត់ប៉ុណ្ណោះ...
ដោយឡែក ក្រសួងការពារជាតិ របស់ប្រទេសរ៉ូស្ស៊ីវិញ បានទាត់ចោល ការព្រួយបារម្ភទាំងឡាយ ពីសំណាក់ក្រុមប្រទេស នៅបស្ចឹមលោក។ អ្នកនាំពាក្យរបស់ក្រសួង បានថ្លែងឲ្យដឹងថា៖ «ការបញ្ជូនកាំជ្រួចខាងលើ ទៅកាន់ក្រុង "Kaliningrad" ត្រូវបានធ្វើ ជាច្រើនដងរួចមកហើយ និងនៅតែបន្តបញ្ជូន ទៅកាន់ទីនោះទៀត សម្រាប់ក្របខណ្ឌ នៃការហ្វឹកហាត់យុទ្ធសាស្ត្រ របស់កងទ័ពរ៉ូស្ស៊ី»។
អ្នកនាំពាក្យរ៉ូស្ស៊ី បានបន្តទៀតថា ករណីនេះ ជាការហ្វឹកហាត់ក្បួនធ្វើសឹកសុទ្ធសាធ ដែលកងទ័ពរ៉ូស្ស៊ី នៅគ្រប់ទិសទីទាំងអស់ ចាំបាច់ត្រូវបង្កើតសមត្ថភាពរបស់ខ្លួន។ លោកថា កងទ័ពនៅក្នុងតំបន់ «Kaliningrad» មិនមានអ្វីពិសេស ខុសពីកងទ័ពដែលឈរជើង នៅតំបន់ដទៃនោះទេ។
ក្រុមអ្នកសង្កេតការណ៍ នៅក្នុងតំបន់ បានមើលឃើញថា តាំងពីវិបត្តិនៅក្នុងប្រទេសអ៊ុយក្រែន បានកើតឡើង នៅឆ្នាំ២០១៤នោះមក ប្រទេសរ៉ូស្ស៊ីបានបង្ហាញ សាច់ដុំយោធារបស់ខ្លួន ជាញឹកញាប់ ជាពិសេសតាមរយៈការហ្វឹកហាត់ ឬការធ្វើសមយុទ្ធនៅក្នុងតំបន់ ដែលសុទ្ធសឹងជាព្រំដែន របស់ប្រទេសសមាជិកនៃអង្គការសន្ធិសញ្ញាអាត្លង់ទិកខាងជើង៕