ដីការកោះហៅ របស់តុលាការចំនួនពីរសន្លឹក ដែលទស្សនាវដ្ដីមនោរម្យ.អាំងហ្វូ ទើបនឹងទទួលបាន ក្នុងថ្ងៃទី៣ ខែឧសភានេះ បានធ្វើឡើង និងចុះហត្ថលេខាដោយ ព្រះរាជអាជ្ញារង សៀង សុខ ដោយបង្គាប់ឲ្យលោក តុ វ៉ាន់ចាន់​ តំណាងរាស្រ្ត​ខេត្ត​កណ្តាល (គណបក្សសង្គ្រោះជាតិ) និងលោក ពិន រតនា តំណាងរាស្រ្ត​ខេត្ត​បាត់​ដំបង (គណបក្ស​សង្គ្រោះ​​ជាតិ) ចូលខ្លួនមកបំភ្លឺ នៅថ្ងៃទី១៦ ខែឧសភា ឆ្នាំ២០១៦ខាងមុខនេះ។

ដីកាទាំងពីរនោះ មិនបានបញ្ជាក់ថា ការកោះហៅនេះ ធ្វើឡើងក្នុងក្របខណ្ឌ នៃសំនុំរឿង ឬការស៊ើប​អង្កេត​ករណី​អ្វី ឬទៅតាមពាក្យបណ្ដឹង​ណាមួយឡើយ ដោយគ្រាន់តែបញ្ជាក់ថា «ដើម្បីសាកសួរ ពីដំណើរ​រឿង​ទាក់ទង​នឹង​អំពើ​ពេស្យាចារ»។

ដីការបង្គាប់ឲ្យចូលខ្លួន របស់តុលាការ ធ្វើទៅលើតំណាងរាស្ត្រ ក្នុងនាមជា«ជនសង្ស័យ»នេះ មានលក្ខណៈ​ប្រទាំងប្រទើស ទៅនឹងរដ្ឋធម្មនុញ្ញា ដែលជាច្បាប់កំពូលរបស់ជាតិ និងដែលបានហាម មិនឲ្យធ្វើការ​ចោទ​ប្រកាន់ ទៅលើតំណាងរាស្ត្រណាម្នាក់ ដែលស្ថិតក្នុងអភ័យឯកសិទ្ធិសភាឡើយ។

មាត្រា ៨០ នៃរដ្ឋធម្មនុញ្ញចែងថា៖ «តំណាងរាស្ត្រ មានអភ័យឯកសិទ្ធិសភា។ តំណាងរាស្ត្ររូបណាក៏ដោយ មិន​អាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុពីបានសំដែងយោបល់ ឬបញ្ចេញមតិ ក្នុង​ការ​បំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួន សមាជិកណា​មួយ​នៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍ របស់​រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។»

តុលាការ និងអាជ្ញាធរកម្ពុជា បានធ្វើការកោះហៅមនុស្សជាច្រើននាក់ និងជាបន្តបន្ទាប់ ក្រោយពីអ្នក​ប្រើប្រាស់​បណ្ដាញសង្គម និងសារព័ត៌មានស្និត​នឹងគណបក្សកាន់អំណាចមួយចំនួន បានលើកយកមក​ផ្សព្វផ្សាយ នូវ​សំនុំ​រឿង​ស្នេហា​ ដ៏ចម្រូងចម្រាសមួយ  ដែលត្រូវបានគេចោទថា ជាទំនាក់ទំនងរវាង ស្ត្រីជាងធ្វើ​សក់​អាយុ​២៥ឆ្នាំ ឈ្មោះ ខុម ចាន់តារាទី ហៅស្រីមុំ និងលោក កឹម សុខា អនុប្រធានគណបក្សសង្គ្រោះជាតិ។

ដំបូងឡើយ នាង ខុម ចាន់តារាទី បានធ្វើការបដិសេធ ថាខ្លួននាងមិនមានទំនាក់ទំនងស្នេហាអ្វី ជាមួយលោក កឹម សុខា នោះឡើយ។ ប៉ុន្តែនៅក្នុងការចូលខ្លួនទៅបំភ្លឺ កាលពីថ្ងៃទី១៩ ខែមេសា ក្នុងសាលា​ដំបូង​រាជធានី​ភ្នំពេញ នាង ខុម ចាន់តារាទី បានឆ្លើយផ្ទុយស្រឡះមកវិញ ថានាងជាតួអង្គមួយ នៅក្នុងរឿងរ៉ាវ​ស្នេហា​នេះ។ បន្ទាប់ពីនោះមក នៅថ្ងៃទី២២ ខែមេសា នាង ខុម ចាន់តារាទី បានដាក់ពាក្យប្ដឹងលោក កឹម សុខា ពីបទ​ធ្វើ​ឲ្យ​នាង​ខូច​កេរ្តិ៍ឈ្មោះ និងបានទាមទារសំណង ចំនួន៣សែនដុល្លារ។

បន្ថែមពីលើនេះ នាង ខុម ចាន់តារាទី បានបញ្ចេញលិខិតចំហរមួយ ដែលនាងបានសរសេរចោទប្រកាន់ មន្ត្រី​របស់អង្គការ​សង្គមស៊ីវិលជាច្រើននាក់ ថាបានលួងលោមនាង ឲ្យផ្ដល់ចម្លើយក្លែងក្លាយ នៅចំពោះ​មុខ​តុលាការ។ ដោយសារលិខិតចំហររបស់នាង មន្ត្រីការពារសិទ្ធិមនុស្សបួនរូប របស់សមាគមអាដហុក ត្រូវ​បាន​ចាប់ខ្លួន យកទៅឃុំនៅពន្ធនាគារព្រៃស ហើយមន្ត្រីជាន់ខ្ពស់មួយរូបទៀត របស់គណៈកម្មាធិការជាតិ​រៀបចំ​ការ​បោះឆ្នោត ត្រូវបានចាប់ខ្លួន យកទៅឃុំខ្លួន នៅពន្ធនាគារប៉េហ្សី របស់នគរបាលរាជធានីភ្នំពេញ។ នេះគេ​នៅ​មិន​ទាន់​និយាយ​ដល់មន្ត្រីម្នាក់ទៀត របស់ការិយល័យឧត្ដមស្នងការ របស់អង្គការ​សហប្រជាជាតិ ទទួល​បន្ទុក​សិទ្ធិមនុស្ស នៅកម្ពុជា ដែលកំពុងត្រូវបានអង្គភាព​ប្រឆាំងអំពើពុករលួយ របស់លោក ឱម យ៉ិនទៀង ស្វែង​រក​ការ​នាំ​ខ្លួន ឲ្យខាងតែបាននោះផង៕