ការបាត់បង់វិចារណញ្ញា ក្នុងពេលមួយភ្លែត អាចជួបបញ្ហាធំ ក្នុងជីវិត។ នាង តាបាថា លីហ្គ្រូម (Tabatha Lee Grooms) អាយុ៣៥ឆ្នាំ ត្រូវបានអាជ្ញាធរចាប់ខ្លួន និងចោទប្រកាន់ពីបទបង្ករបួសស្នាម ទៅលើមិត្តប្រុស​របស់​ខ្លួន កាលពីថ្ងៃទី២៤ ខែមិថុនាកន្លងទៅ។ មូលហេតុ៖ ដោយហេតុថា ការឡូស រ៉ូឌ្រឺគូស ហ្គ្រាស (Carlos Rodrecus Grace) ដែលជាមិត្តប្រុសរបស់នាង បានបដិសេធមិនព្រមរួមរ័ក្ស ជាមួយនាង។ ហើយនាង តាបាថា មិន​ត្រឹមតែខ្វាច មុខបុរសស្នេហ៍របស់ខ្លួនទេ តែបន្ទាប់មក នាងបានទៅបង្ករឿង នឹងម្ដាយខ្លួនឯង​ថែម​ទៀត។

នៅថ្ងៃនោះ នាង តាបាថា ដែលរស់នៅ ជាមួយមិត្តប្រុស និងម្ដាយរបស់ខ្លួន ក្នុងក្រុង អ័ហ្គឹស្តា (Augusta) នៃ​រដ្ឋចរចា សហរដ្ឋអាមេរិក មានចំណង់ខាងផ្លូវភេទ ហើយបានស្នើរ ទៅបុរសស្នេហ៍របស់នាង។ ប៉ុន្តែ ការឡូស បានបដិសេធ និងបានច្រាននាងចេញ។ ទំនងជាមួម៉ៅក្ដៅក្រហាយ និងការបដិសេធរបស់មិត្តប្រុស នាង តាបាថា បានចេញទៅក្រៅ«ផឹក» ហើយបានត្រឡប់មកវិញ នៅវេលាម៉ោង២៣ និង៣០នាទី ដោយ​មាន​អាការៈ​ស្រវឹង។

ភ្លាមនោះ នាង តាបាថា បានលោតពីលើមិត្តប្រុសនាង ដែលកំពុងដេករងចាំនាង នៅលើសាឡុង ហើយបាន​ប្រើ​ក្រចករបស់នាង ខ្វាចទៅលើមុខ ក្បាល និងក របស់ប្រុសស្នេហ៍ រហូតដល់ដាច់រយៈចេញឈាម។ បន្ទាប់​មក នាង​បានវាយយ៉ាងសន្ធាប់ ទៅលើដៃខាងឆ្វេង របស់ ការឡូស បង្កការរងរបួស យ៉ាងធ្ងន់ធ្ងរ។ ស្ត្រីកំណាច​ថែមទាំងបាននិយាយទ្រគោះ ទៅ ការឡូស ទៀតថា នាងបាន«ដេក» ជាមួយមនុស្សម្នាគ្រប់គ្នា ព្រោះ ការឡូស មិនចង់រួមរ័ក្សជាមួយនាង។

ការឡូស បានគេចខ្លួន ពីការវាយប្រហាររបស់មិត្តស្រីខ្លួន ហើយបានរត់ចូលទៅពួន នៅក្នុងបន្ទប់ទឹក និង​បាន​ទូរស័ព្ទហៅនគរបាល ឲ្យជួយអន្តរាគមន៍។ ប៉ុន្តែនៅមុនការមកដល់ របស់នគរបាល នាង ថាបាថា ដែល​នៅ​មិន​ទាន់អស់ចិត្តនោះ បានទៅវាយម្ដាយរបស់នាង ឲ្យរបួសភ្នែកមួយចំហៀងទៀត។

នាង តាបាថា ត្រូវបាននាំខ្លួន ទៅកាន់ស្នងការនគរបាល និងបានទទួលស្គាល់ថា នាងបាន«ផឹក»ពិតមែន។ នាង​ត្រូវបានចោទប្រកាន់ ពីបទប្រើអំពើហិង្សា នៅក្នុងគ្រួសារ ហើយនគរបាលបានដាក់នាង នៅ​ក្នុងការ​ឃុំឃាំង ជាបណ្ដោះអាសន្ន ដើម្បីរងចាំថ្ងៃបើកសវនាការ នាពេលខាងមុខ៕

» រូបថតរបស់នាង តាបាថា៖