៤សហគមន៍គ្រោងធ្វើបាតុកម្ម«១ខែ» នៅទីលានប្រជាធិបតេយ្យ
- ដោយ: ប្រាថ្នា អត្ថបទ៖ ប្រាថ្នា ([email protected]) យកការណ៍៖ ស្រ៊ុន ទិត្យ - ភ្នំពេញ ថ្ងៃទី១២ មករា ២០១៥
- កែប្រែចុងក្រោយ: January 13, 2015
- ប្រធានបទ: ជ្រុងមួយ
- អត្ថបទ: មានបញ្ហា?
- មតិ-យោបល់
-
សហគមន៍ រងគ្រោះដោយការរំលោកដីធ្លីរួមមាន សហគមន៍បូរីកីឡា៣មករា សហគមន៍ព្រលានយន្តហោះអន្តរជាតិភ្នំពេញ (SOS) សហគមន៍បឹងកក់ និងបណ្តាញអតីតស្ត្រីបឹងកក់ បានធ្វើសេចក្តីជូនដំណឹងដាក់សំណើរ ទៅសាលារាជធានីភ្នំពេញ ពីគម្រោងធ្វើបាតុកម្មរាល់ថ្ងៃពីម៉ោង៧ព្រឹក ដល់ម៉ោង៥កន្លះល្ងាច គឺចាប់ពីថ្ងៃទី២០ ខែមករា ដល់ថ្ងៃទី២០ ខែកុម្ភៈ ឆ្នាំ២០១៥ ។
អ្នកស្រី យ៉ោម បុប្ផា អ្នកដឹកនាំគម្រោងធ្វើបាតុកម្មនេះ បានឱ្យដឹងថា មូលហេតុដែលក្រុមជនរងគ្រោះ ដោយសារបញ្ហាដីធ្លីធ្វើបាតុកម្ម៖ ទី១.ដោយសារតែ ការដោះស្រាយបញ្ហាដីធ្លីទាំងបួនសហគមន៍ នៅមិនទាន់មានដំណោះស្រាយ ទី២.ទាមទារឱ្យដោះលែងជនជាប់ចោទជាសកម្មជនដីធ្លី ព្រះសង្ឃ រួមនឹងសកម្មជនគណបក្សសង្រ្គោះជាតិ ទាំង១៩នាក់ និងទី៣.ស្នើឱ្យគណបក្យនយោបាយទាំងពីរ បញ្ចប់ជម្លោះនយោបាយ។
អ្នកស្រីថា បើទោះបីជាគ្មានការអនុញ្ញាត ពីសាលារាជធានីភ្នំពេញក៏ដោយ ក្រុមសហគមន៍ដែលរងគ្រោះ ដោយសារបញ្ហាដីធ្លីទាំង៤ ក៏នឹងនៅតែបន្តដដែល។ សកម្មជនដីធ្លី និងអតីតទណ្ឌិតរូបនេះ បានឱ្យដឹងបន្តថា ការធ្វើបាតុកម្មនៅថ្ងៃខាងមុខនេះ គឺមិនបានកំណត់ពីចំនួនអ្នកចូលរួមធ្វើបាតុកម្មនោះទេ តែអ្នកស្រីសង្ឃឹមថា នឹងមានអ្នកចូលរួមច្រើនដូចការរំពឹងទុក ។ នៅពេលនេះដែរ អ្នកស្រីក៏ដូចជាសហគមន៍ទាំងបូន ក៏កំពុងអំពាវនាវឱ្យមានការចូលរួមច្រើនពីប្រជាពលរដ្ឋ។
អ្នកបន្ថែមថាថា៖ «តាមពិតយើងទាំងអស់គ្នាអត់ចង់ទេ រឿងបាតុកម្មរឿងអី ព្រោះកន្លងមកយើងឈឺចាប់ច្រើនណាស់ អញ្ចឹងយើងអត់ចង់ទេ បើសិនណាសាលាក្រុង រដ្ឋាភិបាលចង់ដោះស្រាយពិតប្រាកដមែន មិនចង់ឱ្យយើងធ្វើបាតុកម្មខូចមុខមាត់អី ដល់រាជរដ្ឋភិបាលដល់ប្រទេសជាតិ ត្រូវតែដោះស្រាយឱ្យពួកយើងវាចប់បញ្ហាហើយ»។
សេចក្តីជូនដំណឹង ពីគម្រោងធ្វើបាតុកម្មរបស់សហគមន៍ទាំង៤ សាលារាជធានីភ្នំពេញបានទទួលរួចហើយ នៅម៉ោងជិត២រសៀលថ្ងៃទី១២ ខែមករា ឆ្នាំ២០១៥នេះ ដែលនឹងយកទៅពិចារណាថា អនុញ្ញាត ឬមិនអនុញ្ញាត និងជូនដំណឹងនៅពេលក្រោយ៕