យន្ដហោះ AirAsia បាត់ខ្លួនពីប្រព័ន្ធរលកសញ្ញា នៅចន្លោះឥណ្ឌូនេស៊ី និងសាំងហ្គាពួរ
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៨ ធ្នូ ២០១៤
- កែប្រែចុងក្រោយ: December 28, 2014
- ប្រធានបទ: បាត់ខ្លួន
- អត្ថបទ: មានបញ្ហា?
- មតិ-យោបល់
-
យន្ដហោះដែលបាត់ខ្លួននេះ ធុនអ៊ែរប៊ូស ៣២០-២០០ (Airbus 320-200) បានភ្ជាប់ជើងហោះហើរលេខ QZ8501 មានមនុស្សជិះ១៦២នាក់ ក្នុងននោះ៧នាក់ ជាសមាជិកបម្រើការនៅលើយន្ដហោះ។ នេះបើតាមអ្នកនាំពាក្យ របស់ក្រសួងគមនាគមន៍ឥណ្ឌូនេស៊ី លោក ហាឌី ម៊ូស្តូហ្វា (Hadi Mustofa)។
បើតាមព័ត៌មានដែលទទួលបានភ្លាមៗ បានឲ្យដឹងថា យន្ដហោះនេះ បានស្នើសុំឲ្យមានការផ្លាស់ប្ដូរផ្លូវហោះហើរខុសពីធម្មតាមួយ មកកាន់ការិយាល័យត្រួតពិនិត្យការហោះហើរនៅលើដី មុននឹងយន្ដហោះនេះ បានបាត់ខ្លួន។ យន្ដហោះបានបាត់ការទាក់ទងជាមួយនឹងប្រព័ន្ធត្រួតពិនិត្យ នៅម៉ោង៧និង៥៥នាទី ម៉ោងក្នុងស្រុក ព្រឹកថ្ងៃទី២៨ ខែធ្នូនេះ បន្ទាប់ពីវាបានងើបខ្លួនហោះចេញពីដី បានរយៈពេល៤២នាទី ហើយទំនងជាបានបាត់ខ្លួន នៅលើលំហសមុទ្រហ្សាវ៉ា (Java) ដែលស្ថិតនៅរវាងក្រុង កាលីម៉ាន់តាន់ (Kalimantan) និងកោះហ្សាវ៉ា។
ក្រុមហ៊ុនអាកាសចរណ៍ អ៊ែរអេសៀ បានទទួលស្គាល់ពីការបាត់ខ្លួន របស់យន្ដហោះខ្លួន តាមរយៈសេចក្ដីប្រកាសព័ត៌មានមួយ។ សេចក្ដីប្រកាសខ្លីនោះ បានសរសេរថា៖ «នៅពេលនេះ យើងនៅមិនទាន់មានព័ត៌មានលំអិត ទៅលើស្ថានភាពនៃអ្នកដំណើរ និងសមាជិកអ្នកបម្រើការនៅលើយន្ដហោះនោះនៅឡើយ»។ ក្រុមហ៊ុនបាននិយាយទៀតថា ខ្លួនកំពុងធ្វើការងារយ៉ាងពេញទំហឹង ជាមួយនឹងអាជ្ញាធរមានសមត្ថភាព ដើម្បីរកតួយន្ដហោះមកវិញ និងថែមទាំងបានដាក់ខ្សែទូរស័ព្ទបន្ទាន់មួយ ដើម្បីឲ្យក្រុមគ្រួសាររបស់អ្នកដំណើរ អាចសាកសួរពីព័ត៌មាននានាបាន។
ព័ត៌មានបានបង្កឲ្យមានការភ្ញាក់ផ្អើលភ្លាមៗ ពេញបណ្ដាញសង្គម។ នៅលើហ្វេសប៊ុក អ្នកប្រើប្រាស់បណ្ដាញសង្គម បានចូលរួមជួយឈឺឆ្អាល ហើយបានសុំឲ្យឆាប់រកឃើញយន្ដហោះវិញ និងបន់សុំឲ្យអ្នកដំណើរទាំងអស់ កុំឲ្យជួបគ្រោះអ្វីឲ្យសោះ។ ទូរទស្សន៍ក្នុងប្រទេសឥណ្ឌូនេស៊ី MetroTV បានបង្ហាញពីរូបភាពរបស់ក្រុមគ្រួសារជាច្រើននាក់ នៅព្រលានយន្ដហោះ កំពុងជ្រួលច្របល់នៅក្នុងរយៈពេលនៃការរង់ចាំដំណឹង ពីញាតិមិត្តរបស់ខ្លួនដែលស្ថិតនៅលើយន្ដហោះ។
ចំណែកអាជ្ញាធរវិញ បានបើកយុទ្ធនាការរុករកមួយ ដោយបានបញ្ចេញនូវនាវាជាច្រើនគ្រឿង និងយន្ដហោះធុន C-130 ចំនួនពីរគ្រឿង មកក្នុងសមុទ្រ។ រវាងពីកោះ ស៊ូរ៉ាប៉ាយ៉ា (Surabaya) ប្រទេសឥណ្ឌូនេស៊ី មកប្រទេសសាំងហ្គាពួរ មានចំងាយផ្លូវ ១៣៧០គីឡូម៉ែត្រ។